પંચમહાલ-સુરતમાં કમોસમી વરસાદથી ખેડૂતોમાં ચિંતા ; હવામાનમાં અચાનક પલટો

છેલ્લાં કેટલાક દિવસોથી ગુજરાતમાં મિશ્ર હવામાનનો અનુભવ થઈ રહ્યો છે. વહેલી સવારે ઠંડો પવન, વાદળછાયું આકાશ અને છૂટાછવાયા ઝાપટાંને કારણે શિયાળાની અસર જણાઈ રહી છે, જ્યારે બપોર બાદ તાપમાનમાં અચાનક વધારો થતાં ઉનાળાની તીવ્રતા અનુભવાય છે. જેથી એક જ દિવસમાં બે ઋતુઓનો અનુભવ થઈ રહ્યો છે.

કમોસમી વરસાદ ખેડૂતો માટે ચિંતા

ખાસ કરીને રવિ પાક લણણીના તબક્કે પહોંચ્યો છે ત્યારે કમોસમી વરસાદ ખેડૂતો માટે ચિંતા વધારનાર સાબિત થઈ રહ્યો છે. ખેતરોમાં તૈયાર ઉભેલા ઘઉં અને ચણાના પાકને વરસાદથી નુકસાન થવાનું જોખમ છે. જો વધુ વરસાદ વરસે અથવા ભેજનું પ્રમાણ વધે, તો પાકની ગુણવત્તા પર અસર પડી શકે છે. ઉપરાંત ભેજયુક્ત વાતાવરણ જીવાતોના પ્રકોપ માટે અનુકૂળ બનતું હોવાથી ખેડૂતોમાં વધુ ચિંતા ફેલાઈ છે.

પંચમહાલ જિલ્લાના વિવિધ ગ્રામ્ય વિસ્તારોમાં પણ હળવા વરસાદના અહેવાલ

માત્ર ગોધરા જ નહીં, પરંતુ પંચમહાલ જિલ્લાના વિવિધ ગ્રામ્ય વિસ્તારોમાં પણ હળવા વરસાદના અહેવાલ મળ્યા છે. વાદળછાયા આકાશને કારણે સૂર્યપ્રકાશ ઓછો રહ્યો, જેના પરિણામે સવારે તાપમાનમાં ઘટાડો નોંધાયો હતો. વરસાદ બાદ વાતાવરણ તાજગીભર્યું બન્યું, પરંતુ અનિશ્ચિત હવામાનને કારણે રોજિંદી જિંદગી પર પણ અસર પડી છે. તાપમાનના ઉતાર-ચઢાવને કારણે લોકોમાં શરદી, ઉધરસ અને વાયરસજન્ય રોગોના કેસોમાં વધારો થવાની શક્યતા નિષ્ણાતો દર્શાવી રહ્યા છે.

છોટાઉદેપુરના બોડેલીમાં વહેલી સવારે કમોસમી માવઠું

છોટાઉદેપુરના બોડેલીમાં પણ આજે વહેલી સવારે ગાજવીજ સાતહ માવઠું પડ્યું હતું. બોડેલી, ઢોકલીયા, અલીપુરા સહીત આસપાસના વિસ્તારોમાં કમોસમી માવઠાની અસર જોવા મળી હતી.

સુરત શહેરમાં પણ હવામાનમાં અચાનક પલટો

આ વચ્ચે સુરત શહેરમાં પણ વહેલી સવારે હવામાનમાં અચાનક પલટો આવ્યો હતો. શરૂઆતમાં ઝાપટાં પડ્યા અને ત્યારબાદ કેટલાક વિસ્તારોમાં ભારે વરસાદ નોંધાયો. વરસાદી માહોલને કારણે વાતાવરણમાં ઠંડક પ્રસરી ગઈ અને ઠંડીનો અહેસાસ વધ્યો.