UP: કાસગંજમાં લગ્ન સમારોહ દરમિયાન ડીજે મુદ્દે વિવાદ, સાળાએ કાર ચઢાવતા ત્રણના મોત

ઉત્તર પ્રદેશના કાસગંજ જિલ્લામાં ગુરુવારે આનંદમય લગ્ન સમારોહ પળવારમાં જ શોકમાં ફેરવાઈ ગયો. ઝેડએસ પેલેસ ગેસ્ટ હાઉસ ખાતે ચાલી રહેલા લગ્ન કાર્યક્રમ દરમિયાન ડીજે વગાડવા મુદ્દે વરરાજા અને કન્યા પક્ષ વચ્ચે નાનો વિવાદ શરૂ થયો હતો. પરંતુ આ નાની તકરાર તુરંત જ ધક્કામુક્કી અને મારામારીમાં બદલાઈ ગઈ.

સ્થાનિક સૂત્રો મુજબ, ઝઘડા દરમિયાન વરરાજાના પરિવારે કન્યાના પિતરાઈ ભાઈ પર હુમલો કર્યો હતો. ગુસ્સે ભરાયેલા આ યુવકે બદલો લેવા માટે પોતાની કાર મંગાવી અને સીધી જ ભીડમાં દોડાવી દીધી. ઘટનામાં વરરાજાના બે કાકા અને મામા સહિત ત્રણ લોકોનું સ્થળ પર જ મોત થયું, જ્યારે બે લોકો ગંભીર રીતે ઘાયલ થયા છે.

દુર્ઘટનાની જાણ થતાં જ ગંજદુંડવારા પોલીસ ઘટના સ્થળે પહોંચી. મૃતદેહોને પોસ્ટમોર્ટમ માટે મોકલવામાં આવ્યા છે અને ઘાયલોને હોસ્પિટલમાં દાખલ કરવામાં આવ્યા છે. પોલીસનું માનવું છે કે આ પગલું પૂર્વનિયોજિત નહોતું, પણ અચાનક ગુસ્સામાં લેવાયેલ આક્રમક નિર્ણય હતો. આરોપી યુવક હાલ ફરાર છે અને તેને શોધવા માટે અનેક ટીમો તહેનાત કરવામાં આવી છે.

લગ્ન જેવા ખુશીના પ્રસંગે સર્જાયેલી આ હૈયાદ્રાવક ઘટનાએ સમગ્ર વિસ્તારમાં તણાવના વાતાવરણનું નિર્માણ કર્યું છે. સમાજ અને રાજકીય વર્ગમાં આ પ્રકારની હિંસક પ્રવૃત્તિ અંગે ભારે ચિંતા વ્યક્ત કરવામાં આવી રહી છે.