Veraval Road Accident: પ્રાંસલી પાસે ભયાનક અકસ્માત, ત્રણના ઘટનાસ્થળે મોત

Veraval Road Accident: વેરાવળ–કોડીનાર માર્ગ પર પ્રાંસલી ગામ નજીક રાત્રિના સમયે એક અત્યંત કરુણ અને ભયાનક માર્ગ અકસ્માત સર્જાયો, જેમાં ત્રણ લોકોના ઘટનાસ્થળે જ મોત નિપજ્યા, જ્યારે એક વ્યક્તિ ગંભીર રીતે ઈજાગ્રસ્ત બન્યો છે. આ અકસ્માતથી સમગ્ર પંથકમાં શોકની લાગણી ફેલાઈ ગઈ છે.

પ્રાપ્ત વિગતો મુજબ, રાત્રિના આશરે 11 વાગ્યાના સુમારે વણાકબારા તરફથી માછલી ભરેલી એક આઇસર ગાડી (GJ-32-T-4405) વેરાવળ GIDC સ્થિત વનિતા કોલ્ડ સ્ટોરેજ તરફ જઈ રહી હતી. પ્રાંસલી ગામ નજીક પહોંચતાં અચાનક આઇસર ગાડીમાં પંચર પડતાં વાહન રોડની સાઈડમાં ઉભું રાખવામાં આવ્યું હતું. ગાડીના ચાલક હુસેન મહમદ મલેક (ઉં. 51, રહે. ગરીબ નવાજ કોલોની, વેરાવળ) પંચર સુધારવાની કામગીરી કરી રહ્યા હતા.

આ દરમિયાન એ જ કંપનીની બીજી એક આઇસર ગાડી (GJ-14-BT-9972) ત્યાંથી પસાર થઈ રહી હતી. સ્થિતિ જોઈ તેના ચાલક રફિક ચાંદભાઈ ભાદરકા મદદ માટે થંભી ગયા. બંને ચાલકો સાથે ગોપાલભાઈ નામનો એક વ્યક્તિ પણ પંચર સુધારવામાં જોડાયો હતો.

એ જ સમયે પાછળથી પૂરપાટ ઝડપે આવી રહેલી માછલી ભરેલી બોલેરો પિકઅપ (GJ-32-T-8057) ના ચાલકે બેદરકારીપૂર્વક ડ્રાઈવિંગ કરતા આગળ ઉભેલી આઇસર ગાડી સાથે જોરદાર ટક્કર મારી હતી. ટક્કર એટલી ભયાનક હતી કે આઇસર અને બોલેરો બંનેને ભારે નુકસાન પહોંચ્યું અને ત્યાં હાજર લોકો દૂર ફંગોળાઈ ગયા હતા.

આ ગમખ્વાર અકસ્માતમાં બોલેરોના ચાલક રાજુભાઈ બાલુભાઈ પરમાર (ઉં. 27, રહે. નાથડ ગામ), આઇસરના ચાલક હુસેન મહમદ મલેક અને મદદ માટે ઊભેલા રફિક ચાંદભાઈ ભાદરકા—ત્રણેયના ઘટનાસ્થળે જ કમકમાટી ભર્યા મોત નિપજ્યા હતા. જ્યારે ગોપાલભાઈને ગંભીર ઈજાઓ થતાં તાત્કાલિક હોસ્પિટલમાં ખસેડવામાં આવ્યા છે, જ્યાં તેમની હાલત નાજુક હોવાનું જાણવા મળે છે.

ઘટનાની જાણ થતાં જ સુત્રાપાડા પોલીસ ઘટનાસ્થળે પહોંચી હતી. પોલીસે મૃતદેહોને પોસ્ટમોર્ટમ માટે ખસેડી અકસ્માત અંગે કાયદેસરની કાર્યવાહી શરૂ કરી છે. અકસ્માતને કારણે માર્ગ પર થોડા સમય માટે ટ્રાફિક ખોરવાયો હતો, જેને પોલીસે વ્યવસ્થિત રીતે નિયંત્રિત કર્યો હતો.

આ ઘટનાએ ફરી એકવાર રાત્રિના સમયે ભારે વાહનોની ઝડપ અને માર્ગ સલામતી અંગે ગંભીર પ્રશ્નો ઊભા કર્યા છે. સ્થાનિક લોકોએ આ માર્ગ પર સ્પીડ કંટ્રોલ, રિફ્લેક્ટર અને સુરક્ષા પગલાં વધારવાની માંગ ઉઠાવી છે.