VIDEO: 22 વર્ષીય અર્જુન વર્લ્ડ નંબર-1 ચેસ ચેમ્પિયન કાર્લસનને હરાવ્યો; હાર પચાવી ન શકતા ટેબલ પર મુક્કો માર્યો

World Blitz Championship Doha 2025માં ભારતીય ચેસ સ્ટાર અર્જુન એરિગૈસીએ વિશ્વના નંબર-1 ખેલાડી મેગ્નસ કાર્લસનને હરાવીને વૈશ્વિક ચેસ જગતમાં મોટો ઝટકો આપ્યો છે. નવમા રાઉન્ડમાં રમાયેલી આ મેચમાં અર્જુને બ્લેક પીસ સાથે રમતાં કાર્લસનની તમામ વ્યૂહરચનાઓને નિષ્ફળ બનાવી દીધી.

કાર્લસન પાસે સફેદ મહોરાનો ફાયદો હોવા છતાં અર્જુને શાંતિ અને ચોકસાઈથી રમત પર કાબૂ મેળવ્યો. સતત દબાણ હેઠળ રહેલા કાર્લસન સમય નિયંત્રણમાં ફસાયા અને અંતે હાર સ્વીકારવી પડી. હાર બાદ કાર્લસનનો ગુસ્સો બેકાબૂ બન્યો અને તેણે ટેબલ પર જોરથી મુક્કો માર્યો, જેનો વીડિયો સોશિયલ મીડિયા પર વાયરલ થઈ રહ્યો છે.

Oops!…He Did It Again#RapidBlitz pic.twitter.com/O5N5CWoO2f

— International Chess Federation (@FIDE_chess) December 29, 2025

આ યાદગાર જીત સાથે અર્જુન એરિગૈસી 7.5 પોઈન્ટ સાથે પોઈન્ટ ટેબલમાં ટોચ પર પહોંચી ગયો છે. તે હાલમાં ઉઝબેકિસ્તાનના નોદિરબેક અબ્દુસત્તોરોવ સાથે સંયુક્ત રીતે પ્રથમ સ્થાને છે. નોંધનીય છે કે અગાઉ વર્લ્ડ રેપિડ ચેમ્પિયનશિપમાં કાર્લસને ગોલ્ડ અને અર્જુને બ્રોન્ઝ મેડલ જીત્યો હતો.

કાર્લસન અગાઉ પણ ભારતીય ખેલાડીઓ સામે હાર્યા બાદ ગુસ્સો વ્યક્ત કરી ચૂક્યો છે. જૂન 2025માં ડી. ગુકેશ સામેની હાર બાદ પણ આવું જ વર્તન જોવા મળ્યું હતું. નિષ્ણાતો માને છે કે કાર્લસનની અતિશય જીતની અપેક્ષા તેને વારંવાર સંયમ ગુમાવવાનું કારણ બને છે.

બીજી તરફ, અર્જુનની શાંતિ, સાતત્ય અને આત્મવિશ્વાસ તેને ભવિષ્યનો વિશ્વ ચેમ્પિયન બનવાનો મજબૂત દાવેદાર બનાવે છે. ભારતીય યુવા ગ્રાન્ડમાસ્ટર્સ વિશ્વના ટોપ ખેલાડીઓને પરાસ્ત કરી રહ્યા છે, જે ભારતીય ચેસના **‘સુવર્ણ યુગ’**ની શરૂઆત દર્શાવે છે.