WhatsAppનું નવું ફીચર લોન્ચ: ઓડિયો અને વીડિયો કોલિંગમાં સુધારો

WhatsApp : ઇન્સ્ટન્ટ મેસેજિંગ એપમાં એક નવું ફીચર ઉમેરાયું છે, જેની લાંબા સમયથી રાહ જોવાઈ રહી હતી. તેનું નામ વોઇસ કેન્સલેશન ફીચર છે. આ ફીચરથી કોલ દરમિયાન આસપાસનો અવાજ સામેની વ્યક્તિ સુધી પહોંચતો નથી. હાલમાં આ ફીચર બીટા વર્ઝનમાં સામેલ કરવામાં આવ્યું છે. આ માહિતી Wabetainfo દ્વારા શેર કરવામાં આવી છે.

WhatsApp આ ફીચર દ્વારા કોલિંગનો અનુભવ વધુ સારો બનાવવાનો પ્રયત્ન કરી રહ્યું છે. એન્ડ્રોઇડ સ્માર્ટફોન ઉપરાંત આ ફીચર WhatsApp Web પર પણ ઉપલબ્ધ રહેશે. કંપનીએ ગયા મહિને જ WhatsApp Web માટે વોઇસ અને વીડિયો કોલિંગ ફીચર લોન્ચ કર્યું હતું. WhatsApp લાંબા સમયથી કોલિંગ અનુભવ સુધારવા માટે કામ કરી રહ્યું છે. આ ફીચર ફક્ત WhatsApp Web પૂરતું મર્યાદિત નથી, પરંતુ એન્ડ્રોઇડ એપ પર પણ કાર્ય કરે છે. રિપોર્ટ મુજબ, પ્લે સ્ટોર પર ઉપલબ્ધ WhatsApp બીટા એન્ડ્રોઇડ 2.26.11.8 અપડેટમાં નવું નોઇઝ કેન્સલેશન ફીચર જોવા મળ્યું છે.

રિપોર્ટમાં કેટલાક સ્ક્રીનશોટ્સ પણ શેર કરવામાં આવ્યા છે, જેમાં બતાવવામાં આવ્યું છે કે આ ફીચર કેવી રીતે દેખાશે. સ્ક્રીનશોટ મુજબ, કોલ દરમિયાન યુઝર્સને સ્ક્રોલ અપ કરવું પડશે. ત્યારબાદ નોઇઝ કેન્સલેશન ફીચર દેખાશે, જેને ચાલુ કરવા માટે ટૉગલ ઑન કરવું પડશે. એન્ડ્રોઇડ પ્લેટફોર્મ પર હમણાં સુધી નોઇઝ કેન્સલેશનની સુવિધા ઉપલબ્ધ ન હતી. જ્યારે iOS પ્લેટફોર્મના ડિવાઇસમાં આ ફીચર પહેલેથી જ મળે છે. જેમ કે iPhone અને iPad પર WhatsApp કોલ આવે ત્યારે નોઇઝ કેન્સલેશન ફીચર આપમેળે ચાલુ થઈ જાય છે.

નોઇઝ કેન્સલેશન એક એવું ફીચર છે જે ઘણા ટ્રુ વાયરલેસ સ્ટીરિયો ઇયરફોન અને સ્માર્ટફોનમાં જોવા મળે છે. આ ફીચર આસપાસના ટ્રાફિકનો અવાજ, પવનનો અવાજ અને ભીડનો અવાજ અલગ કરીને તમારા અવાજને સ્પષ્ટ રીતે સામેની વ્યક્તિ સુધી પહોંચાડે છે.