WTC Points Table 2025-27: ન્યુઝીલેન્ડની જીતથી ટીમ ઇન્ડિયા છઠ્ઠા સ્થાને સરકી

Team India WTC Points Table 2025-27 Update: વર્લ્ડ ટેસ્ટ ચેમ્પિયનશિપ (WTC) 2025-27માં ટીમ ઈન્ડિયાનો રેન્કિંગ વધુ ખરાબ બન્યો છે. ન્યુઝીલેન્ડે વેલિંગ્ટનમાં વેસ્ટ ઈન્ડિઝને નવ વિકેટથી હરાવીને 12 મહત્વપૂર્ણ WTC પોઈન્ટ મેળવ્યા, જેના કારણે તે સીધું ત્રીજા સ્થાને પહોંચી ગયું. આ જીતનો સીધો અસર ભારત પર પડ્યો અને ટીમ એક સ્થાન સરકી છઠ્ઠા સ્થાને આવી ગઈ.

ગયા મહિને સાઉથ આફ્રિકા સામે 0-2ની હાર બાદ ભારત પહેલેથી જ પાંચમા ક્રમે આવી ગયું હતું. પરંતુ ન્યુઝીલેન્ડની વિનાશક બોલિંગ અને ઝડપી જીતે ટેબલમાં મોટો બદલાવ લાવી દીધો.

ઓસ્ટ્રેલિયા હાલમાં 100% પોઈન્ટ્સ સાથે ટોચ પર છે, જ્યારે સાઉથ આફ્રિકા 75% સાથે બીજા ક્રમે છે. ચોથા અને પાંચમા ક્રમે શ્રીલંકા અને પાકિસ્તાન છે. ન્યુઝીલેન્ડે અત્યાર સુધી 66.67% પોઈન્ટ્સ મેળવી લીધા છે, જ્યારે ભારતની પોઈન્ટ ટકાવારી હવે માત્ર 48.15% છે.

ભારત માટે પરિસ્થિતિ આગલા સમયમાં વધુ મુશ્કેલ બની શકે છે. જો ઈંગ્લેન્ડ એશિઝમાં ઓસ્ટ્રેલિયા સામે વાપસી કરે છે, તો ભારત સાતમા ક્રમે પણ સરકી શકે છે. ટીમ ઈન્ડિયાનો આગામી ટેસ્ટ પ્રવાસ આવતા વર્ષના ઓગસ્ટમાં શ્રીલંકા સામે હશે.

તે જ સમયે, ન્યુઝીલેન્ડે ફરી WTC ફાઇનલમાં પહોંચવાની પોતાની શક્યતાઓ મજબૂત કરી છે. ત્રીજા દિવસે જેકબ ડફીની પાંચ વિકેટની ઝળહળતી પ્રદર્શનથી વેસ્ટ ઈન્ડિઝ માત્ર 128 રનમાં ઓલઆઉટ થઈ ગઈ. બાદમાં ડેવોન કોનવે (28*) અને કેન વિલિયમસન (16*)એ 56 રનના ટાર્ગેટને સરળતાથી ચેઝ કરી લીધો.

WTC Points System મુજબ જીત માટે 12, ટાઈ માટે 6 અને ડ્રો માટે 4 પોઈન્ટ મળે છે. રેન્કિંગ કુલ પોઈન્ટ પર નહીં પરંતુ પોઈન્ટસ ટકાવારી પર આધારિત હોય છે. ધીમા ઓવર-રેટ માટે પોઈન્ટ કાપવામાં આવે છે.