બોક્સ ઓફિસ પર ટક્કર! યશ vs વરુણ ધવન: ‘ટોક્સિક’ની રિલીઝ ડેટ બદલાતા વિવાદ ગરમાયો

કન્નડ સુપરસ્ટાર યશની આગામી ફિલ્મ “ટોક્સિક” ને લઈને ફિલ્મ જગતમાં મોટા સમાચાર સામે આવ્યા છે. 4 માર્ચના રોજ યશે અચાનક પોતાની મોસ્ટ અવેટેડ ફિલ્મની રિલીઝ ડેટ મુલતવી રાખવાની જાહેરાત કરીને સૌને ચોંકાવી દીધા હતા.

મધ્ય પૂર્વમાં ચાલી રહેલા યુદ્ધ અને વધતા તણાવને કારણે નિર્માતાઓએ આ વ્યૂહાત્મક નિર્ણય લીધો હોવાનું કહેવાય છે. જોકે, આ નવી તારીખને કારણે હવે બોલિવૂડ અને સાઉથ ફિલ્મ ઇન્ડસ્ટ્રી વચ્ચે નવા વિવાદના મંડાણ થયા છે.

નવી રિલીઝ ડેટ અને બોલિવૂડ સાથે ટક્કર

“ટોક્સિક” અગાઉ 19 માર્ચના રોજ રિલીઝ થવાની હતી, પરંતુ હવે તે 4 જૂન, 2026 ના રોજ સિનેમાઘરોમાં આવશે. રસપ્રદ વાત એ છે કે, આ જ તારીખે વરુણ ધવનની કોમેડી ડ્રામા ફિલ્મ “હૈ જવાની તો ઇશ્ક હોના હૈ” પણ રિલીઝ થવાની છે.

અગાઉ એવી અટકળો હતી કે ‘ટોક્સિક’ની ટક્કર ‘ધુરંધર 2’ સાથે થશે, પરંતુ હવે યશની ફિલ્મ બોલિવૂડના અભિનેતા વરુણ ધવન સાથે સીધી સ્પર્ધામાં ઉતરી છે. આ અથડામણને કારણે ફિલ્મી વ્યવસાય પર અસર પડવાની ભીતિથી વરુણ ધવનની ટીમમાં ચિંતાનો માહોલ છે.

સંવાદનો અભાવ કે ગેરસમજ?

અહેવાલો અનુસાર, વરુણ ધવન, દિગ્દર્શક ડેવિડ ધવન અને નિર્માતા રમેશ તૌરાનીને આ ટક્કર વિશે કોઈ પૂર્વ માહિતી નહોતી. તેમને આ અંગે ત્યારે ખબર પડી જ્યારે યશે સોશિયલ મીડિયા પર નવી તારીખની પોસ્ટ મૂકી.

બોલિવૂડમાં સામાન્ય રીતે રિવાજ છે કે જો કોઈ મોટી ફિલ્મ પહેલેથી જ તારીખ જાહેર કરી ચૂકી હોય, તો બીજી ફિલ્મના નિર્માતાઓએ ટક્કર ટાળવા માટે અગાઉથી ચર્ચા કરવી જોઈએ. આ કિસ્સામાં કોઈ પૂર્વ ચર્ચા ન થતા ‘હૈ જવાની તો ઇશ્ક હોના હૈ’ ની ટીમ નારાજ હોવાનું સૂત્રો જણાવી રહ્યા છે.