ઝહીર ખાન BCCIએ સોંપી ખાસ જવાબદારી; ભારતીય ક્રિકેટમાં નવી પેઢીના ‘ગન’ બોલરો તૈયાર કરશે

Zaheer Khan Fast Bowling Camp : આ વિશેષ તાલીમ શિબિર 28 ફેબ્રુઆરીથી 2 માર્ચ દરમિયાન યોજાઈ રહી છે. આ કેમ્પમાં ભારતના વિવિધ રાજ્યોના ડોમેસ્ટિક ક્રિકેટમાંથી પસંદ કરાયેલા શ્રેષ્ઠ યુવા ફાસ્ટ બોલરો ભાગ લઈ રહ્યા છે. ઉલ્લેખનીય છે કે, ઓસ્ટ્રેલિયન કોચ ટ્રોય કુલીનો ચાર વર્ષનો કાર્યકાળ ગત ડિસેમ્બરમાં પૂર્ણ થયા બાદ સેન્ટર ઓફ એક્સેલન્સમાં ફાસ્ટ બોલિંગ કોચનું પદ ખાલી હતું. જોકે BCCIએ આ પદ માટે સત્તાવાર અરજીઓ મંગાવી છે, પરંતુ કાયમી નિમણૂક થાય તે પહેલાં ઝહીર ખાનને આ મહત્વપૂર્ણ ભૂમિકા સોંપીને બોર્ડે યુવા ખેલાડીઓને શ્રેષ્ઠ માર્ગદર્શન પૂરું પાડવાનો પ્રયાસ કર્યો છે.

ઝહીર ખાનનો બહોળો અનુભવ બનશે આશીર્વાદ
47 વર્ષીય ઝહીર ખાન પાસે આંતરરાષ્ટ્રીય ક્રિકેટનો અદ્ભુત અનુભવ છે. તેમણે ભારત માટે 92 ટેસ્ટ, 200 વનડે અને 17 T20 મેચોમાં કુલ 610 વિકેટ ઝડપી છે. ઝહીર ખાન માત્ર બોલિંગ જ નહીં, પણ રણનીતિ અને બેટ્સમેનને વાંચવાની કળામાં પણ માહિર ગણાય છે.

અગાઉ આઈપીએલમાં મુંબઈ ઇન્ડિયન્સ સાથેના તેમના કાર્યકાળ દરમિયાન તેમણે જસપ્રીત બુમરાહ જેવા બોલરોને તૈયાર કરવામાં પાયાની ભૂમિકા ભજવી છે. વિદેશી પિચો પર બોલને સ્વિંગ કરવાની કળા અને લાંબી સ્પેલમાં ફિટનેસ કેવી રીતે જાળવવી, તેનું જ્ઞાન ઝહીર પાસેથી મેળવવું એ યુવા બોલરો માટે સુવર્ણ તક સમાન છે. હવે જોવાનું એ રહેશે કે આ ટૂંકા ગાળાની જવાબદારી બાદ BCCI ઝહીર ખાનને સેન્ટર ઓફ એક્સેલન્સમાં કોઈ કાયમી પદ ઓફર કરે છે કે કેમ.

વીવીએસ લક્ષ્મણનો સંપૂર્ણ ટેકો
સેન્ટર ઓફ એક્સેલન્સના ક્રિકેટ વડા વીવીએસ લક્ષ્મણ આ પ્રોજેક્ટને સંપૂર્ણ સમર્થન આપી રહ્યા છે. લક્ષ્મણનું માનવું છે કે ભવિષ્યમાં ટેસ્ટ અને મર્યાદિત ઓવરોના ક્રિકેટમાં ભારત પાસે બોલિંગમાં ઊંડાણ હોવું જરૂરી છે. તાજેતરના સમયમાં મુખ્ય બોલરોની ઇજાઓ અને વર્કલોડ મેનેજમેન્ટના કારણે પસંદગીકારો પાસે મર્યાદિત વિકલ્પો બચ્યા છે. આવી સ્થિતિમાં, એક એવું માળખું તૈયાર કરવામાં આવી રહ્યું છે જ્યાંથી તૈયાર બોલરો સીધા જ આંતરરાષ્ટ્રીય સ્તરે પ્રદર્શન કરી શકે.