આંધ્રપ્રદેશના વિશ્વ પ્રસિદ્ધ તિરુપતિ બાલાજી મંદિરમાં લાડુમાં ઘીની ભેળસેળનો મુદ્દો ગરમ થઈ રહ્યો છે. તપાસમાં સામે આવ્યું છે કે એઆર ડેરીને માત્ર રૂ. 320 પ્રતિ કિલોના ભાવે ઘી સપ્લાય કરવાનો કોન્ટ્રાક્ટ આપવામાં આવ્યો હતો અને નંદિની ઘીનું ટેન્ડર રદ કરવામાં આવ્યું હતું. બાદમાં જુલાઈમાં ઘીમાં ભેળસેળ જોવા મળી હતી અને ફરીથી 470 રૂપિયા પ્રતિ કિલોના ભાવે નંદિની ઘીનો કોન્ટ્રાક્ટ આપવામાં આવ્યો હતો.
માછલીનું તેલ અને જાનવરોની ચરબીનો ઉપયોગ
એક અહેવાલને ટાંકીને આંધ્રપ્રદેશના સીએમ ચંદ્રબાબુ નાયડુએ દાવો કર્યો છે કે અગાઉની જગનમોહન રેડ્ડી સરકારમાં બાલાજી મંદિરના પ્રસાદમાં ઘીની જગ્યાએ માછલીનું તેલ અને જાનવરોની ચરબી ભેળવવામાં આવતી હતી. જગન મોહને કહ્યું કે આ દાવા ખોટા છે અને ચંદ્રબાબુ નાયડુ ભગવાનના નામે રાજનીતિ કરી રહ્યા છે.
ટેન્ડરની શરતોનો ભંગ કરવામાં આવ્યો
મીડિયા રિપોર્ટમાં જણાવ્યા અનુસાર, ઘીના ટેન્ડરની કોપી મળી આવતા ઘીની પ્રાપ્તિ પ્રક્રિયા પર સવાલો ઉભા કર્યા છે. ત્યારે સૂત્રોના જણાવ્યા અનુસાર ટેન્ડરની શરતોનો ભંગ કરવામાં આવ્યો હતો અને ઘી ટેસ્ટિંગ માટે મોકલવામાં આવ્યું ન હતું. ટેન્ડરની કલમ 80 મુજબ, સપ્લાય કરવામાં આવેલ ઘીના દરેક કન્સાઈનમેન્ટ માટે NABL પ્રમાણપત્ર સબમિટ કરવું જરૂરી છે.
TTDને ઘીના નમૂના મોકલવા ફરજિયાત
આ ઉપરાંત, ટેન્ડર કલમ 81 મુજબ, લેબ પરીક્ષણ માટે TTDને ઘીના નમૂના મોકલવા ફરજિયાત છે. સવાલો ઉભા થઈ રહ્યા છે કે ઓગસ્ટ 2023 અને જુલાઈ 2024 વચ્ચે બ્લેકલિસ્ટેડ કંપનીના અગાઉના સેમ્પલમાં આ ભેળસેળ કેવી રીતે મળી ન હતી? શું TTD એ NABL/લેબ પરીક્ષણ માટે નમૂનાઓ મોકલ્યા નથી? બ્લેકલિસ્ટેડ કંપનીએ જે બેચમાં ભેળસેળ મળી હતી તેનું NABL પ્રમાણપત્ર રજૂ કર્યું ન હતું?
કોન્ટ્રાક્ટરને બ્લેકલિસ્ટ કરવાની પ્રક્રિયા શરૂ
TTD EO રાવે જણાવ્યું હતું કે, “ચારેય સેમ્પલના રિપોર્ટમાં સમાન પરિણામો જોવા મળ્યા છે. તેથી, અમે તાત્કાલિક પુરવઠો બંધ કરી દીધો છે. કોન્ટ્રાક્ટરને બ્લેકલિસ્ટ કરવાની પ્રક્રિયા શરૂ કરવામાં આવી છે અને દંડ વસૂલવાની પ્રક્રિયા પણ શરૂ કરવામાં આવશે. હવે કાયદાકીય પ્રક્રિયા હાથ ધરાશે.” તેમણે વધુમાં કહ્યું કે સપ્લાયર્સે આ ખામીઓનો ફાયદો ઉઠાવ્યો અને રૂ. 320 થી રૂ. 411 વચ્ચે ઘી સપ્લાય કર્યું. તેમણે કહ્યું કે શુદ્ધ ગાયના ઘીના સપ્લાય માટે આ પ્રાઇસ બેન્ડ યોગ્ય નથી.
Source link
