ટીમ ઈન્ડિયાએ ચેન્નાઈ ટેસ્ટમાં બાંગ્લાદેશી ટીમ પર સંપૂર્ણ રીતે વર્ચસ્વ જમાવી દીધું છે. પાકિસ્તાનને હરાવનાર બાંગ્લાદેશ આ મેચમાં બેકફૂટ પર હોય તેવું લાગી રહ્યું છે. દરમિયાન, મુલાકાતી ટીમની બીજી ઇનિંગ્સમાં યશસ્વી જયસ્વાલે જબરદસ્ત ફિલ્ડિંગનું ઉદાહરણ રજૂ કર્યું હતું. તેણે ઝાકિર હસનનો ડાઈવ લગાવીને એક હાથે કેચ પકડ્યો અને ટીમ ઈન્ડિયાને પ્રથમ સફળતા અપાવવામાં મહત્વની ભૂમિકા ભજવી. જયસ્વાલના આ કેચનો વીડિયો સોશિયલ મીડિયા પર વાયરલ થઈ રહ્યો છે.
યશસ્વી જયસ્વાલે પકડ્યો શાનદાર કેચ
રોહિત શર્માની સેનાએ બાંગ્લાદેશને જીતવા માટે 515 રનનો વિશાળ ટાર્ગેટ આપ્યો છે. બીજા દાવમાં બાંગ્લાદેશની શરૂઆત સારી રહી હતી. શાદમાન ઇસ્લામ અને ઝાકિર હસન સારા ફોર્મમાં દેખાતા હતા, પરંતુ બુમરાહે આ જોડી તોડી નાખી હતી. ઝાકિરે 17મી ઓવરના બીજા બોલ પર એક ડ્રાઈવ ફટકાર્યો અને બોલ બેટની કિનારી સાથે અથડાઈને ગલીની દિશામાં હવામાં ગયો હતો. જયસ્વાલે બોલને હવામાં જોઈને તેણે ડાબી તરફ ડાઈવ લગાવી અને એક હાથથી શાનદાર કેચ પકડ્યો હતો. ઝાકિર હસન 47 બોલમાં 33 રન બનાવીને આઉટ થયો હતો.
ઉલ્લેખનીય છે કે જયસ્વાલે પ્રથમ દાવમાં બેટિંગમાં શાનદાર પ્રદર્શન કર્યું હતું. રોહિત શર્મા, શુભમન ગિલ અને વિરાટ કોહલીની શરૂઆતી વિકેટો બાદ તેણે રિષભ પંત સાથે મળીને ઇનિંગની કમાન સંભાળી હતી. આ દરમિયાન જયસ્વાલે 56 રનની સારી ઇનિંગ રમી હતી. જોકે, તે બીજી ઇનિંગમાં માત્ર 10 રનનું યોગદાન આપી શક્યો હતો.
ભારતીય ટીમે બાંગ્લાદેશને 515 રનનો ટાર્ગેટ આપ્યો હતો
મેચમાં ટીમ ઈન્ડિયાએ પ્રથમ દાવમાં 376 રન બનાવ્યા હતા જેના જવાબમાં નઝમુલ હુસૈન શાંતોની આગેવાની હેઠળની ટીમ 149 રનમાં ઓલઆઉટ થઈ ગઈ હતી. ભારતે પ્રથમ દાવમાં 227 રનની મહત્વની લીડ મેળવી હતી. આ પછી યજમાન ટીમે તેનો બીજો દાવ 287/4 રને ડિકલેર કર્યો હતો. શુભમન ગિલ (119*) અને રિષભ પંત (109)ની સદીની ઇનિંગ્સ આ સ્કોર સેટ કરવામાં ઉપયોગી હતી. હવે બાંગ્લાદેશને આ ટેસ્ટ જીતવા માટે 515 રન બનાવવા પડશે, જે અશક્ય લાગી રહ્યું છે.