ફ્લાયઓવર પરથી હાઇ સ્પીડ કાર નીચે પડી, ગાંધીનગરથી કેદારનાથ જઈ રહેલા 4 મિત્રોના મોત, એકની હાલત ગંભીર
ઉત્તર પ્રદેશના મુઝફ્ફરનગર જિલ્લામાં પાનીપત ખટીમા રાષ્ટ્રીય ધોરીમાર્ગ પર એક ઝડપી ગતિએ આવતી કાર કાબુ બહાર નીકળી ગઈ અને ફ્લાયઓવર પરથી નીચે પડી ગઈ હતી.
કારમાં મુસાફરી કરી રહેલા પાંચ મિત્રો ગંભીર રીતે ઘાયલ થયા હતા. ઘટનાની માહિતી મળતા જ પોલીસ ઘટનાસ્થળે પહોંચી ગઈ હતી અને તમામ ઘાયલોને તાત્કાલિક સારવાર માટે હોસ્પિટલમાં દાખલ કર્યા હતા. જ્યારે ચાર ઘાયલ મિત્રોનું સારવાર દરમિયાન દર્દનાક મોત નીપજ્યું હતું, જ્યારે એક યુવાનની હાલત ગંભીર છે.
ગાંધીનગરથી કેદારનાથ દર્શન કરવા જઈ રહ્યા હતા
કહેવામાં આવી રહ્યું છે કે કારમાં સવાર બધા યુવાનો મિત્રો હતા જેઓ ગાંધીનગરથી કેદારનાથના દર્શન કરવા જઈ રહ્યા હતા. સારવાર દરમિયાન ચાર મિત્રો અમિત, ભરત, કર્ણ અને વિપુલનું દુઃખદ મૃત્યુ થયું હતું,
જ્યારે જીગર નામનો એક યુવાન ગંભીર રીતે ઘાયલ થયો છે અને તેની હોસ્પિટલમાં સારવાર ચાલી રહી છે. ઘટના બાદ પોલીસે તમામ મૃતકોના મૃતદેહને કસ્ટડીમાં લઈ પોસ્ટમોર્ટમ માટે મોકલી દીધા છે અને આ કેસમાં આગળની કાર્યવાહી શરૂ કરી છે.
ફ્લાયઓવર પરથી નીચે પડી કાર
પોલીસના જણાવ્યા મુજબ, છપાર પોલીસ સ્ટેશનના ખટીમા પાનીપત રોડ પર એક કાર પૂરપાટ ઝડપે દોડી રહી હતી. તે ફ્લાયઓવર પરથી નીચે પડી ગઈ. તેમાં પાંચ લોકો સવાર હતા, જેમાંથી ચાર લોકોના મોત થયા છે અને એક વ્યક્તિ ગંભીર રીતે ઘાયલ થયો છે.
તેમને જિલ્લા હોસ્પિટલમાં લાવવામાં આવ્યા છે. એવું કહેવાય છે કે પાંચેય યુવાનો ગુજરાતના ગાંધીનગરના છે. જેમ જેમ આ કેસમાં વધુ તથ્યો સામે આવશે, તેમ તેમ તે મુજબ જાણ કરવામાં આવશે.
