રવિવારે પુણેના તાલેગાંવ વિસ્તારમાં ઇન્દ્રાયણી નદી પરનો એક જૂનો પુલ અચાનક તૂટી પડ્યો. આ અકસ્માતમાં 20-25 લોકો નદીમાં તણાઈ ગયા હોવાના અહેવાલ છે. અત્યાર સુધીમાં બે લોકોના મોતની પુષ્ટિ થઈ છે. સ્થાનિક વહીવટીતંત્ર તાત્કાલિક સક્રિય થઈ ગયું છે અને ગુમ થયેલા લોકોની શોધ અને બચાવ કામગીરી યુદ્ધના ધોરણે ચાલી રહી છે.
પિંપરી-ચિંચવડ પોલીસના જણાવ્યા અનુસાર, આ અકસ્માત કુંડમાલા ગામ નજીક થયો હતો. પોલીસે જણાવ્યું હતું કે આ ઘટનામાં 10 થી 15 લોકો ફસાયા હોવાની આશંકા છે, જેમાંથી અત્યાર સુધીમાં 5 થી 6 લોકોને બચાવી લેવામાં આવ્યા છે.
બહાર આવેલી માહિતી મુજબ, પુલની હાલત પહેલાથી જ ખૂબ જ જર્જરિત હતી, જેના કારણે છેલ્લા કેટલાક મહિનાઓથી તે વાહનોની અવરજવર માટે બંધ હતો. એવું કહેવામાં આવી રહ્યું છે કે નદીમાં અચાનક વહેણ આવવાને કારણે પુલ તૂટી પડ્યો હતો. જોકે, અકસ્માતનું ચોક્કસ કારણ હજુ સુધી બહાર આવ્યું નથી.
ઘટના અંગે માહિતી આપતાં, કેન્ટોનમેન્ટ બોર્ડ દેહુ રોડના ભૂતપૂર્વ ઉપપ્રમુખ રઘુવીર શેલારે જણાવ્યું હતું કે, ‘અહીં સાંજે 4 વાગ્યાની આસપાસ એક જૂનો પુલ તૂટી પડ્યો હતો. પુલ પર તે જ જગ્યાએ લગભગ 125 પ્રવાસીઓ ઉભા હતા અને અચાનક તે તૂટી પડ્યો હતો. લગભગ 20-25 લોકો નદીમાં તણાઈ ગયા હતા. તેમાંથી કેટલાકને સ્થાનિક કામદારોએ બહાર કાઢ્યા હતા, જ્યારે 4-5 લોકો હજુ પણ પુલ નીચે ફસાયેલા છે.’
#WATCH | Pune, Maharashtra | A bridge collapsed on the Indrayani River, near Kundamala village, under the Pimpri-Chinchwad Police station. 10 to 15 people feared trapped. 5 to 6 people have been rescued. More details awaited: Pimpri Chinchwad Police https://t.co/CiYAnNDiyS pic.twitter.com/g0jm7QE9Xv
— ANI (@ANI) June 15, 2025
