IPL 2025 MI vs KKR: મુંબઈ ઈન્ડિયન્સે IPL 2025 માં પ્રથમ જીત નોંધાવી, કોલકાતા નાઈટ રાઈડર્સને સતત બીજી હારનો સામનો કરવો પડ્યો
IPL 2025 ની 12મી મેચ મુંબઈ ઈન્ડિયન્સ અને કોલકાતા નાઈટ રાઈડર્સ વચ્ચે રમાઈ હતી. મુંબઈના વાનખેડે સ્ટેડિયમ ખાતે રમાયેલી આ મેચમાં MI એ KKR ને 8 વિકેટે હરાવ્યું. આ સાથે, મુંબઈ ઈન્ડિયન્સે સિઝનની પહેલી જીત મેળવી છે. જ્યારે કેકેઆરનો આ સતત બીજો પરાજય છે.
ટોસ હારીને પ્રથમ બેટિંગ કરતા KKR 16.2 ઓવરમાં 116 રનમાં ઓલઆઉટ થઈ ગયું. જેના જવાબમાં મુંબઈએ માત્ર ૧૨.૫ ઓવરમાં લક્ષ્ય હાંસલ કરી લીધું. રાયન રિકેલ્ટન (62*) એ અડધી સદી ફટકારીને રન ચેઝમાં મુખ્ય ભૂમિકા ભજવી. આ પહેલા, મુંબઈ તરફથી ડેબ્યુ કરનાર અશ્વિની કુમારે 4 વિકેટ લીધી હતી. દીપક ચહરે બે વિકેટ લીધી, જ્યારે બોલ્ટ, હાર્દિક, વિગ્નેશ અને સેન્ટનરે એક-એક વિકેટ લીધી. કોલકાતા તરફથી અંગક્રિશ રઘુવંશીએ સૌથી વધુ 26 રનની ઇનિંગ રમી. જ્યારે 5 બેટ્સમેન સિંગલ ડિજિટમાં આઉટ થયા હતા.
મુંબઈની ઇનિંગ્સની વાત કરીએ તો, રોહિત શર્મા ઇમ્પેક્ટ સબ પ્લેયર તરીકે મેદાન પર આવ્યો હતો. તેણે રાયન રિકેલ્ટન સાથે મળીને મુંબઈને સારી શરૂઆત અપાવી. બંનેએ મળીને પ્રથમ વિકેટ માટે ૫.૨ ઓવરમાં ૪૬ રનની ભાગીદારી કરી. રોહિત ફોર્મમાં દેખાતો હતો પરંતુ તેની શરૂઆતને મોટા સ્કોરમાં રૂપાંતરિત કરવામાં નિષ્ફળ ગયો કારણ કે તે આન્દ્રે રસેલના બોલ પર હર્ષિત રાણા દ્વારા કેચ આઉટ થયો.
રોહિતે ૧૨ બોલમાં ૧ છગ્ગાની મદદથી ૧૩ રન બનાવ્યા. અહીંથી, રાયન રિકેલ્ટને KKR ને કોઈ તક આપી નહીં અને તોફાની ફિફ્ટી ફટકારી. તેણે ૪૧ બોલમાં પાંચ ચોગ્ગા અને ચાર છગ્ગાની મદદથી અણનમ ૬૨ રન બનાવ્યા. સૂર્યકુમાર યાદવ પણ 27 રન બનાવીને અણનમ પરત ફર્યા. KKR તરફથી આન્દ્રે રસેલે બંને વિકેટ લીધી.
જ્યારે કેકેઆરની ઇનિંગ્સની શરૂઆત ખૂબ જ ખરાબ રહી હતી. તેણે પાવર પ્લેમાં જ 4 વિકેટ ગુમાવી દીધી. અગાઉ, ડાબા હાથના ઝડપી બોલર ટ્રેન્ટ બોલ્ટે સુનીલ નારાયણ (0) ને ક્લીન બોલ્ડ કર્યો હતો. ત્યારબાદ દીપક ચહરે વિકેટકીપર-બેટ્સમેન ક્વિન્ટન ડી કોક (1) ને આઉટ કર્યો. આ પછી, અશ્વિની કુમારે તેની ડેબ્યૂ મેચના પહેલા જ બોલ પર કેપ્ટન અજિંક્ય રહાણેને તિલક વર્માના હાથે કેચ આઉટ કરાવ્યો. જ્યારે દીપક ચહરે વેંકટેશ ઐયર (3) ને આઉટ કર્યો. વેંકટેશ ઐયરના આઉટ થયા સમયે, KKRનો સ્કોર 4 વિકેટના નુકસાન પર 41 રન હતો.
અંગક્રિશ રઘુવંશી ટચમાં દેખાતો હતો પરંતુ હાર્દિક પંડ્યાના બોલ પર મોટો શોટ રમવાનો પ્રયાસ કરતી વખતે, તે નમન ધીરના હાથે કેચ થઈ ગયો. રઘુવંશીએ ૧૬ બોલમાં ૩ ચોગ્ગા અને એક છગ્ગાની મદદથી ૨૬ રન બનાવ્યા. ત્યારબાદ ડેબ્યુટ કરનાર અશ્વિની કુમારે રિંક સિંહ (૧૭), ઈમ્પેક્ટ સબ મનીષ પાંડે (૧૯) અને આન્દ્રે રસેલ (૫) ને આઉટ કરીને કેકેઆરની કમર તોડી નાખી. ત્યારબાદ હર્ષિત રાણાને વિગ્નેશ પુરુર દ્વારા આઉટ કર્યો હતો. તો રમનદીપ સિંહ 22 રન બનાવીને મિશેલ સેન્ટનરનો શિકાર બન્યો.
