ભારતીય ક્રિકેટ ટીમ ઇંગ્લેન્ડ સામેની ટેસ્ટ શ્રેણીની બીજી મેચની તૈયારીમાં વ્યસ્ત છે. આ મેચ 2 જુલાઈથી બર્મિંગહામના એજબેસ્ટન ક્રિકેટ ગ્રાઉન્ડ પર રમાશે. લીડ્સ ટેસ્ટ મેચમાં ટીમ ઈન્ડિયાને 5 વિકેટથી હારનો સામનો કરવો પડ્યો હતો, જેના કારણે તે શ્રેણીમાં 0-1 થી પાછળ છે. હવે શુભમન ગિલના નેતૃત્વમાં ટીમ ઈન્ડિયા એજબેસ્ટન ટેસ્ટ જીતવાના ઇરાદા સાથે મેદાનમાં ઉતરશે.
એજબેસ્ટન ટેસ્ટ પહેલા સ્પિન બોલર હરપ્રીત બ્રાર પણ ટીમ ઈન્ડિયાના નેટ સેશનમાં જોવા મળ્યો હતો. બ્રાર ટીમ ઈન્ડિયાના પ્રેક્ટિસ સેશનમાં બોલિંગ કરતો જોવા મળ્યો હતો. 29 વર્ષીય બ્રાર ટીમમાં ગેસ્ટ નેટ બોલર તરીકે જોડાયો હતો. હવે એવું સામે આવ્યું છે કે તે કેપ્ટન શુભમન ગિલના કહેવાથી પ્રેક્ટિસ સેશનમાં ટીમ ઈન્ડિયા સાથે જોડાયો હતો.
ગિલે કર્યો હતો મેસેજ
ભારતીય ક્રિકેટ કંટ્રોલ બોર્ડ (BCCI) એ આ સંબંધિત એક વીડિયો પણ શેર કર્યો છે, જેમાં હરપ્રીત બ્રાર કહી રહ્યો છે કે જ્યારે તેને શુભમન ગિલનો મેસેજ મળ્યો ત્યારે તે સ્વિંડનમાં હતો. હરપ્રીત બ્રારની પત્ની મોલી સંધુનું વતન સ્વિંડનમાં છે, જે બર્મિંગહામથી બહુ દૂર નથી. આ વીડિયોમાં હરપ્રીત બ્રાર કહે છે, ‘મારી પત્ની સ્વિંડનની છે. તે બર્મિંગહામની ખૂબ નજીક છે. સ્વિંડનથી અહીં પહોંચવામાં 1 થી 1.5 કલાક લાગે છે. હું શુભમન ગિલ સાથે વાત કરી રહ્યો હતો, તેણે ગઈકાલે મને મેસેજ કર્યો. તો મેં વિચાર્યું કે ચાલો ત્યાં (બર્મિંગહામ) જઈએ અને પ્રેક્ટિસ કરીએ.’
કેમ શરૂ થઈ હતી ચર્ચા?
28 જૂને ચર્ચા શરૂ થઈ હતી, જ્યારે હરપ્રીત બ્રાર ભારતીય બેટ્સમેનોને નેટ્સમાં બોલિંગ કરતો જોવા મળ્યો હતો. આવી સ્થિતિમાં, ચર્ચા તેજ થઈ ગઈ કે શું ટીમ ઈન્ડિયા સ્પિન વિભાગમાં કોઈ ફેરફાર કરવા જઈ રહી છે? બ્રાર સત્તાવાર ટ્રેનિંગ કીટમાં ન હોવાથી, તે સ્પષ્ટ થઈ ગયું કે તે ટીમનો ભાગ નથી અને તેને ફક્ત પ્રેક્ટિસ માટે બોલાવવામાં આવ્યો છે.
આવી છે બ્રારની IPL કારકિર્દી
હરપ્રીત બ્રારે IPLની તાજેતરની સીઝનમાં પંજાબ કિંગ્સનું પ્રતિનિધિત્વ કર્યું હતું. બ્રારે IPL 2025માં 8 મેચ રમી હતી અને 10 વિકેટ લીધી હતી. કુલ મળીને, બ્રારે IPLમાં પંજાબ કિંગ્સ માટે 49 મેચ રમી છે, જેમાં 31ની સરેરાશથી 35 વિકેટ લીધી છે.
વધુ એક ગેસ્ટ બોલર જોડાયો
હરપ્રીત બ્રાર ઉપરાંત, ચંદીગઢના યુવા ફાસ્ટ બોલર જગજીત સિંહ સંધુ પણ ટીમ ઈન્ડિયાના પ્રેક્ટિસ સેશનમાં ગેસ્ટ બોલર તરીકે જોડાયો હતો. આ દર્શાવે છે કે ટીમ ઈન્ડિયા એજબેસ્ટન ટેસ્ટ માટે તેની તૈયારીઓને મજબૂત બનાવવા માંગે છે. લીડ્સ ટેસ્ટમાં, જસપ્રીત બુમરાહે પ્રથમ ઇનિંગમાં પાંચ વિકેટ લીધી હતી,
પરંતુ બીજી ઇનિંગમાં ઇંગ્લિશ બેટ્સમેનોએ તેની સામે સાવધાનીપૂર્વક બેટિંગ કરી હતી. ઇંગ્લેન્ડે તે મેચમાં 371 રનનો ટાર્ગેટ હાંસલ કર્યો હતો. આ ખરાબ પ્રદર્શન બાદ, એવું અનુમાન લગાવવામાં આવી રહ્યું છે કે ટીમ ઈન્ડિયા બીજી ટેસ્ટમાં ચાઇનામેન કુલદીપ યાદવને તક આપી શકે છે, જેથી સ્પિન વિભાગ મજબૂત બને.
