એમ ચિન્નાસ્વામી સ્ટેડિયમમાં થયેલી ભાગદોડ કેસમાં કર્ણાટક હાઈકોર્ટે રાજ્ય ક્રિકેટ એસોસિએશનને મોટી રાહત આપી છે. શુક્રવારે પોતાના આદેશમાં, હાઈકોર્ટે અધિકારીઓને ક્રિકેટ એસોસિએશનના અધિકારીઓ સામે કોઈ દંડાત્મક કાર્યવાહી ન કરવા જણાવ્યું છે.
રાજ્ય ક્રિકેટ એસોસિએશનના અધિકારીઓએ ભાગદોડ કેસમાં તેમની સામે નોંધાયેલી FIR રદ કરવા માટે હાઇકોર્ટનો સંપર્ક કર્યો હતો. પહેલી વાર IPL જીત્યા બાદ, RCB ટીમે 4 જૂને એમ ચિન્નાસ્વામી સ્ટેડિયમમાં ઉજવણી કરી હતી. તે દરમિયાન, સ્ટેડિયમની બહાર ભાગદોડમાં 11 લોકોના મોત થયા હતા અને 56 અન્ય ઘાયલ થયા હતા.
પોલીસે આ કેસમાં RCB ઇવેન્ટ મેનેજમેન્ટ ફર્મ DNA એન્ટરટેઈનમેન્ટ નેટવર્ક્સ પ્રાઇવેટ લિમિટેડ અને કર્ણાટક સ્ટેટ ક્રિકેટ એસોસિએશન વિરુદ્ધ FIR નોંધી છે.
કન્નડ ભાષામાં નોંધાયેલી FIRમાં જણાવાયું છે કે કાર્યક્રમ પૂરતી વ્યવસ્થા વિના યોજાયો હતો. ચાહકોને શાંતિથી સ્ટેડિયમમાં પ્રવેશ મળે તે માટે જરૂરી પૂરતી સુરક્ષા વ્યવસ્થા નહોતી. FIRમાં RCB ફ્રેન્ચાઇઝી, DNA અને KSCA ના અધિકારીઓના નામ છે.
