શું તમે પણ નવો આઈફોન ખરીદવાનું વિચારી રહ્યા છો, તો હવે રાહ જુઓ કારણ કે યુએસ રાષ્ટ્રપતિ ડોનાલ્ડ ટ્રમ્પ દ્વારા લાદવામાં આવેલા ટેરિફને કારણે આઈફોનની કિંમતમાં ભારે વધારો થઈ શકે છે. અહેવાલો દર્શાવે છે કે, જો એપલ આ વધારાનો ખર્ચ ગ્રાહકો પર નાખે છે, તો આઇફોનના ભાવમાં 30% થી 40%નો વધારો થશે. તેની સૌથી મોટી અસર અમેરિકા પર જ પડશે, કારણ કે અમેરિકામાં વેચાતા મોટાભાગના આઇફોન મેડ ઇન ચાઇના છે.
આઈફોન કેટલો મોંઘો હશે?
હાલમાં, સૌથી સસ્તું iPhone 16 મોડેલની કિંમત $799 (આશરે રૂ. 68,000) છે. જો એપલ ટેરિફનો ખર્ચ ઉમેરવામાં આવે તો, કિંમત લગભગ $1,142 (લગભગ ₹97,000) સુધી વધી શકે છે એટલે કે લગભગ 43% નો વધારો. આ ઉપરાંત, iPhone 16 Pro Max જેવા પ્રીમિયમ મોડલ્સ વિશે વાત કરીએ તો, જેમાં 6.9-ઇંચ સ્ક્રીન અને 1 ટેરાબાઇટ સ્ટોરેજ છે, તેની કિંમત લગભગ $2,300 (લગભગ ₹2 લાખ) હશે.
ટેરિફ શા માટે લાદવામાં આવ્યો?
ટ્રમ્પ વહીવટીતંત્રે અમેરિકન કંપનીઓને ચીનમાંથી ઉત્પાદન ખસેડવા માટે પ્રોત્સાહિત કરવાના પ્રયાસરૂપે ચીનથી આયાત થતા તમામ ઉત્પાદનો પર ટેરિફ લાદ્યા છે. પહેલા એપલને કેટલાક ડિસ્કાઉન્ટ મળતા હતા જેના કારણે કિંમતોમાં કોઈ વધારો થતો ન હતો, હવે તેના પર કોઈ ડિસ્કાઉન્ટ આપવામાં આવી રહ્યું નથી.
