Dhurandhar 2 Movie Controversy : આદિત્ય ધર દ્વારા દિગ્દર્શિત ફિલ્મ “ધુરંધર 2” હાલમાં બોક્સ ઓફિસ પર રેકોર્ડબ્રેક કમાણી કરી રહી છે. ફિલ્મના વિષય અને નિર્માણની પ્રશંસા થઈ રહી છે, પરંતુ આ સફળતાની વચ્ચે ફિલ્મ એક ગંભીર વિવાદમાં સપડાઈ છે. એક ઉભરતા લેખક અને ફિલ્મ નિર્માતાએ આદિત્ય ધર અને ફિલ્મના નિર્માતાઓ પર વાર્તા ચોરી કરવાનો સનસનાટીભર્યો આરોપ લગાવ્યો છે. આ દાવાએ બોલિવૂડમાં નવી ચર્ચા જગાવી છે.
સંતોષ કુમાર આરએસનો દાવો
લેખક અને ફિલ્મ નિર્માતા સંતોષ કુમાર આરએસે જાહેરમાં આરોપ લગાવ્યો છે કે ‘ધુરંધર 2’ ની વાર્તા અને સ્ક્રિપ્ટ તેમણે પોતે લખી હતી. સંતોષના જણાવ્યા અનુસાર, તેમણે વર્ષ 2023માં આ વાર્તા પર ખૂબ મહેનત કરી હતી અને તેઓ આ વાર્તા પર આદિત્ય રોય કપૂરને મુખ્ય ભૂમિકામાં લઈને ફિલ્મ બનાવવા માંગતા હતા. જોકે, તેમના આશ્ચર્ય વચ્ચે, આદિત્ય ધરે આ જ વાર્તા પર ફિલ્મ બનાવીને તેને ‘ધુરંધર 2’ તરીકે રજૂ કરી દીધી છે. સંતોષ કુમારે આ બાબતે અત્યંત દુઃખ વ્યક્ત કરતા જણાવ્યું છે કે તેમની સર્જનાત્મકતાનો દુરુપયોગ કરવામાં આવ્યો છે.
સ્ક્રીનરાઇટર્સ એસોસિએશનમાં નોંધણી અને પુરાવા
સંતોષ કુમાર માત્ર મૌખિક આરોપો જ નથી લગાવી રહ્યા, પરંતુ તેમની પાસે નક્કર પુરાવા હોવાનો પણ દાવો કરી રહ્યા છે. તેમણે મીડિયા સાથે વાત કરતા જણાવ્યું કે, “મેં નવેમ્બર 2023માં જ મારી આ સ્ક્રિપ્ટ ‘સ્ક્રીનરાઇટર્સ એસોસિએશન’ (SWA) માં ઔપચારિક રીતે નોંધાવી હતી. મારી પાસે આ બાબતના રજીસ્ટ્રેશન ડોક્યુમેન્ટ્સ અને ઇમેઇલ રેકોર્ડ્સ પણ ઉપલબ્ધ છે.” તેમણે વધુમાં ઉમેર્યું કે, જ્યારે તેમણે થિયેટરમાં ‘ધુરંધર 2’ જોઈ, ત્યારે તેમને સમજાયું કે ફિલ્મની વાર્તા અને તેમની સ્ક્રિપ્ટમાં અકલ્પનીય સમાનતાઓ છે.
મોટા પ્રોડક્શન હાઉસીસને સ્ક્રિપ્ટ પિચ કરી હતી
પોતાની સંઘર્ષની વાર્તા કહેતા સંતોષે ખુલાસો કર્યો કે તેમણે આ સ્ક્રિપ્ટ સોની પિક્ચર્સ, ઝી સ્ટુડિયો, ટી-સિરીઝ અને ધર્મા પ્રોડક્શન્સ સહિતના અનેક મોટા કોર્પોરેટ હાઉસને બતાવી હતી. તેમને સલાહ આપવામાં આવી હતી કે જો તેઓ કોઈ મોટા સુપરસ્ટાર સાથે ફિલ્મ બનાવવા માંગતા હોય, તો તેમને મોટા પ્રોડક્શન હાઉસના સમર્થનની જરૂર પડશે. સંતોષનો આરોપ છે કે આ પ્રક્રિયા દરમિયાન ક્યાંકથી તેમની સ્ક્રિપ્ટ લીક થઈ અથવા તો તેનો અયોગ્ય રીતે ઉપયોગ કરવામાં આવ્યો છે.
Follow Us On Google News
Follow Us On WhatsApp
Follow Us On facebook
Leave a Comment