એન્ટરટેઇનમેન્ટ

Hera Pheri 3 પર મેકર્સ વચ્ચે મોટો વિવાદ: શું રાજૂ-બાબુરાવ-ઘનશ્યામ ફરી સાથે દેખાશે?

Updated: 23-03-2026, 01.27 PM

Hera Pheri 3 : હેરા ફેરી ફ્રેન્ચાઇઝીની ત્રીજી ફિલ્મ હેરા ફેરી 3 બનવામાં આવી રહેલી મુશ્કેલીઓ હજુ સુધી સમાપ્ત થતી નથી. અભિનેતા પરેશ રાવલ સાથેના વિવાદનું સમાધાન થઈ ગયા બાદ એવી આશા હતી કે, તેઓ સાથે અભિનેતા અક્ષય કુમાર અને સુનીલ શેટ્ટી મળીને ટૂંક સમયમાં ફિલ્મનું શૂટિંગ શરૂ કરશે, પરંતુ એવું થયું નથી અને ફિલ્મની રાહમાં એક નવી અડચણ આવી ગઈ છે. હવે આ અડચણનું કારણ નિર્માતા ફિરોઝ નાડિયાડવાલા અને વિજય કુમાર વચ્ચે ફિલ્મના IP રાઈટ્સને લઈને ચાલતી લડાઈ છે.

2000માં રિલીઝ થયેલી આ ફ્રેન્ચાઇઝીની પહેલી ફિલ્મ હેરા ફેરી મલયાલમ ફિલ્મ “રામોજી રાવ સ્પીકિંગ” ની હિન્દી રીમેક હતી. આ કારણે નિર્માતા વિજય કુમારે એક ઇન્ટરવ્યૂમાં દાવો કર્યો કે, “રામોજી રાવ સ્પીકિંગ” અને હેરા ફેરી ફ્રેન્ચાઇઝીના તમામ રાઈટ્સ તેમના પાસે છે. તેમણે કહ્યું કે, ફિરોઝને માત્ર એક ફિલ્મ “હેરા ફેરી” બનાવવાનો જ હક આપવામાં આવ્યો હતો.

વિજય કુમારે આક્ષેપ કર્યો કે, ફિરોઝે “ફિર હેરા ફેરી” તેમની પરવાનગી વગર બનાવી હતી, પરંતુ તે સમયે તેમણે કોઈ કાર્યવાહી કરી ન હતી. હવે ફિરોઝ ત્રીજી ફિલ્મ પણ એ જ રીતે બનાવવા જઈ રહ્યા હતા, તેથી તેમને કાનૂની કાર્યવાહી કરવી પડી. તેમણે પ્રોડ્યુસરને પત્ર પણ લખ્યો હતો, પરંતુ તેનો કોઈ જવાબ મળ્યો ન હતો. ત્યાર બાદ તેમણે કોર્ટનો દરવાજો ખખડાવ્યો.