વિશાળ વૃક્ષ ધરાશાયી થતાં જામનગરનાં મહિલા પોલીસ મથકનો કચ્ચરઘાણ | Jamnagar’s women’s police station destroyed after huge tree collapses

બનાવ વહેલી સવારે બનતાં સદ્ભાગ્યે જાનહાની ટળી : મકાનની છત અને નળિયા તૂટી પડયાં, અંદર કાટમાળના ઢગલા, વીજ પુરવઠો ખોરવાયોઃ પોલીસે બહાર બેસી કામ કરવાનો વારો આવ્યો

જામનગર, : જામનગરમાં ફૂંકાઈ રહેલા તીવ્ર પવનના કારણે મહિલા પોલીસ મથકની બાજુમાં આવેલા વિશાળ વૃક્ષોમાંથી એક વૃક્ષ મૂળ સહિત ઉખડી જઈ સીધું પોલીસ મથક ઉપર ધરાશાયી થતાં પોલીસ મથકનો કચ્ચરઘાણ નીકળી ગયો હતો. સદ્ભાગ્યે બનાવ સમયે પોલીસ મથક બંધ હોવાથી કોઈ જાનહાનિ થઈ નથી.

Also Read

ટ્રક ડ્રાયવરને દોડાવીને ટોળાંએ બેલ્ટ ફટકારી રોષ ઠાલવ્યો હતો | The mob vented its anger by beating the truck driver with belts forcing him to run

મળતી માહિતી મુજબ આજે વહેલી સવારે અંદાજે પાંચ વાગ્યાના અરસામાં અચાનક જોરદાર ધડાકા સાથે વિશાળ વૃક્ષ મહિલા પોલીસ મથક ઉપર પડયું હતું. જૂના નળિયાવાળા મકાનમાં ચાલતા મહિલા પોલીસ મથકની છત અને નળિયાં તૂટી પડતાં અંદર કાટમાળના ઢગલા સર્જાયા હતા. ઘટનાના કારણે પોલીસ મથકમાં રાખવામાં આવેલું ફનચર, દસ્તાવેજો અને અન્ય સરકારી સામાનને નુકસાન થયું હોવાનું જાણવા મળ્યું છે.

Also Read

10 લાખ શ્રદ્ધાળુ કેદારનાથ પહોંચ્યા ભારે વરસાદને પગલે યાત્રા અટકાવાઇ | 10 lakh devotees reach Kedarnath pilgrimage halted due to heavy rains

ઘટનાની જાણ સવારે મહિલા પોલીસ કર્મચારી ફરજ પર પહોંચ્યા ત્યારે થઈ હતી તેથી તાત્કાલિક ઉચ્ચ અધિકારીઓને જાણ કરી હતી. સાથે જ મહાનગરપાલિકાની ફાયર બ્રિગેડ શાખાને પણ મદદ માટે બોલાવવામાં આવી હતી. ફાયર બ્રિગેડની ટીમે વૃક્ષની વિશાળ ડાળીઓ અને થડને કાપી દૂર કર્યા હતા.

વૃક્ષ પડતાં વીજ વાયરો તૂટી ગયા હતા તેમજ વીજ મીટર ઉખડીને લટકી જતાં સમગ્ર પોલીસ મથકનો વીજ પુરવઠો ખોરવાઈ ગયો હતો, જેના કારણે પોલીસ મથકમાં વીજળી સંબંધિત કામગીરી પણ સંપૂર્ણપણે બંધ થઈ ગઈ હતી.

બનાવ બાદ મહિલા પોલીસ મથકના 20થી વધુ મહિલા પોલીસ કર્મચારીઓએ પોલીસ મથકની બહાર ખુરશીઓ ગોઠવી કામકાજ શરૂ કરવાનો પ્રયાસ કર્યો હતો. જોકે ઇમારતની હાલત અને અંદર પડેલા કાટમાળને કારણે નિયમિત કામગીરી શક્ય બની નહોતી. ઘટનાની ગંભીરતાને ધ્યાનમાં રાખી ઉચ્ચ પોલીસ અધિકારીઓએ મહિલા પોલીસ મથકને તાત્કાલિક ધોરણે અન્ય યોગ્ય સ્થળે સ્થળાંતર કરવાની પ્રક્રિયા હાથ ધરી હોવાનું જાણવા મળે છે.