T20 અને ટેસ્ટ ક્રિકેટમાં મોટા ફેરફાર, 1 ઓક્ટોબરથી અમલી નવા નિયમોથી બેટરને જલસા, બોલરો પરેશાન | icc announces major rule changes in test and t20 cricket

ICC On Test And T20 Cricket: ક્રિકેટની રમતને વધુ રોમાંચક, ઝડપી અને રસપ્રદ બનાવવા માટે આંતરરાષ્ટ્રીય ક્રિકેટ પરિષદ (ICC)એ નિયમોમાં મોટા ફેરફારોની જાહેરાત કરી છે. તાજેતરમાં 31 મેના રોજ અમદાવાદમાં યોજાયેલી ICC બોર્ડ મીટિંગમાં એક્ઝિક્યુટિવ કમિટીની ભલામણોને મંજૂરી અપાઈ છે. આ નવા નિયમો આ વર્ષે 1 ઓક્ટોબરથી આંતરરાષ્ટ્રીય ક્રિકેટમાં ફરજિયાતપણે લાગુ થઈ જશે. ટેસ્ટ અને T20 ફોર્મેટમાં આવી રહેલા આ ફેરફાર માત્ર રમતની ગતિ જ નહીં, પરંતુ ખેલાડીઓની વ્યૂહરચના અને માનસિકતા પર પણ ઊંડી અસર કરશે. 

ચાલો વિગતવાર સમજીએ આ 3 નિયમો કયા છે અને તેની અસરો કેવી થશે.

Also Read

ટીમ ઈન્ડિયામાં ક્યારે પસંદ કરશો?’ વૈભવ સૂર્યવંશી માટે મેદાને આવ્યા અજય જાડેજા, BCCIને કર્યો સીધો સવાલ! | vaibhav sooryavanshi team india selection ajay jadeja demand

1. ખરાબ પ્રકાશની ચિંતા દૂર કરવા ટેસ્ટ ક્રિકેટમાં ગુલાબી બોલનું ‘સરપ્રાઈઝ’

Also Read

‘સરકારને શક્તિ ન હોય તો ખેડૂતોને અવળે માર્ગે ના દોરે…’ નસવાડી APMCમાં મકાઈ વેચવા આવેલા ખેડૂતોમાં રોષ | farmers angry as maize buying quota reduced at naswadi apmc

ટેસ્ટ મેચમાં અવારનવાર ઓછા પ્રકાશને કારણે રમત રોકવી પડતી હોય છે, જેનાથી મેચનો રોમાંચ મરી જાય છે. હવે ICC એ આનો સ્માર્ટ ઉકેલ શોધ્યો છે.

– નવો નિયમ: જો ઓછા પ્રકાશને કારણે ટેસ્ટ મેચ બંધ થવાની અણી પર હોય તો બંને ટીમના કેપ્ટન પરસ્પર સંમતિ સાધીને લાલ બોલની જગ્યાએ ગુલાબી બોલથી રમત ચાલુ રાખી શકે છે.

– નિયમનો દેખીતો ફાયદો: આનાથી રમતનો સમય બગડતો અટકશે. લાલ બોલની સરખામણીએ ગુલાબી બોલ ઓછા પ્રકાશમાં પણ વધુ સારો દેખાતો હોવાથી મેદાન પર રમત અટકશે નહીં.

ખેલાડીઓ પર કેવી અસર પડશે?

– ફાસ્ટ બોલર્સ: લાલ બોલ શરૂઆતની 10-15 ઓવરમાં સારો સ્વિંગ થાય છે અને બાદમાં રિવર્સ સ્વિંગ માટે તૈયાર કરી શકાય છે. બીજી તરફ, ગુલાબી બોલ પર જાડું લિક્વિડ કોટિંગ હોવાથી તે 20-25 ઓવર સુધી ચમકતો રહે છે. જો કે, આ કોટિંગના કારણે બોલ ખરબચડો ઓછો થાય છે, જેથી ગુલાબી બોલથી મદદથી લાલ બોલ જેટલો ‘રિવર્સ સ્વિંગ’ મેળવવો મુશ્કેલ બનશે.

– સ્પિનર્સ માટે મોટો પડકાર: લાલ બોલ જૂનો થતાં તેની સીમ પરનું કોટિંગ ઉખડી જાય છે, જેથી સ્પિનર્સને મજબૂત પકડ (Grip) મળે છે. જ્યારે ગુલાબી બોલ પરનું ભારે કોટિંગ તેને લાંબો સમય સુધી હાથમાંથી લપસાવે છે. ગુલાબી બોલની ચમક ધીમે-ધીમે ઘટતી હોવાથી સ્પિનર્સને પિચ પરથી મદદ મેળવવામાં વધુ સમય લાગશે.

– બેટ્સમેન અને ફિલ્ડરો પર અસર: લાલ બોલની સીમ સફેદ દોરાની હોય છે, જ્યારે ગુલાબી બોલની સીમ કાળા કે ઘેરા લીલા દોરાથી કરાય છે, જેથી તે સ્પષ્ટ દેખાય. ખેલાડીઓએ માનસિક રીતે આ અચાનક બદલાવ માટે નેટ્સમાં ખાસ પ્રેક્ટિસ કરવી પડશે.

2. T20 માં સુપરફાસ્ટ એક્શન: બ્રેક ટાઈમ ઘટશે, કોચની મેદાન પર એન્ટ્રી થશે

ટૂંકા ફોર્મેટને વધુ ઝડપી બનાવવા માટે ICC એ સમયના પાલન પર વધુ ભાર મૂક્યો છે.

– નવો નિયમ: T20 મેચોમાં બે ઇનિંગ્સ વચ્ચેનો વિરામ સમય 20 મિનિટથી ઘટાડીને 15 મિનિટનો કરી દેવાયો છે. આ ઉપરાંત, અત્યાર સુધી ડ્રિંક્સ બ્રેક દરમિયાન ફક્ત વધારાના ખેલાડીને જ મેદાન પર જવાની છૂટ હતી, તેના બદલે હવે મુખ્ય કોચ અથવા સ્ટાફના સભ્ય પોતે મેદાન પર જઈને વ્યૂહરચના ઘડી શકશે.

– નિયમનો દેખીતો ફાયદો: આ ફેરફારથી ફૂટબોલની જેમ મેદાન પર જ લાઈવ કોચિંગ જોવા મળશે. કોચની સીધી સલાહથી બેટ્સમેનોને રમતની મધ્યમાં વધુ સ્પષ્ટતા મળશે.

ખેલાડીઓ પર પ્રેશર વધશે.

આ નિયમની સૌથી વધુ અસર ખેલાડીઓની ફિટનેસ અને સ્પીડ પર પડશે. ફિલ્ડિંગ કરીને આવેલી ટીમના ઓપનિંગ બેટ્સમેનને પેડ્સ અને ગ્લવ્ઝ પહેરીને બેટિંગ માટે ખૂબ જ ઝડપથી તૈયાર થવું પડશે. સંજુ સેમસન જેવા વિકેટકીપર અને ઓપનિંગ બેટ્સમેનને આરામ કરવા માટે 5 મિનિટ ઓછી મળશે. બીજી તરફ, બીજા ક્રમે બોલિંગ કરનારી ટીમને વોર્મ-અપ માટે ઓછો સમય મળશે, જેના કારણે હવે ખેલાડીઓએ પોતાની ફિઝિકલ ટ્રેનિંગમાં ‘ક્વિક વોર્મ-અપ’ (ઝડપથી શરીર તૈયાર કરવાની) તકનીકો શીખવી પડશે.

3. લેગ-સાઇડ વાઇડના નિયમથી બેટ્સમેનોને જલસા, બોલરોની તકલીફ વધશે

અત્યાર સુધી લેગ સાઇડની વાઇડ બોલ આપવા બાબતે અમ્પાયરોના નિર્ણયમાં થોડી લવચીકતા કે વ્યક્તિગત અભિપ્રાય જોવા મળતો હતો, પણ હવે ચિત્ર બદલાઈ ગયું છે.

– નવો નિયમ: હવે લેગ સ્ટમ્પની બહાર જતા બોલ પર અમ્પાયરની પોતાની સમજ કે વિવેકબુદ્ધિનો સ્કોપ ખતમ કરી દેવાયો છે. બેટ્સમેન ક્રીઝમાં ગમે ત્યાં ઊભો હોય, જો બોલ તેને અડ્યા વગર લેગ સ્ટમ્પની લાઇનથી સહેજ પણ બહાર જશે, તો તેને તરત જ ‘વાઇડ’ જાહેર કરાશે. 

– રમત અને સ્કોર પર અસર: આ નિયમથી બેટ્સમેનો મુક્ત મનથી શૉટ્સ રમી શકશે. માનસિક રીતે તેઓ હળવા રહેશે કારણ કે તેમને લેગ સાઇડની ચિંતા નહીં રહે અને તેઓ મિડલ કે ઓફ સ્ટમ્પ પર ફોકસ કરી શકશે. પરિણામે, T20 માં અત્યારે બને છે તેના કરતાં પણ વધુ મોટા સ્કોર અને રનનો વરસાદ જોવા મળશે.

બોલર્સ માટે મુશ્કેલીઓનો પહાડ

– પેસર્સ (Pacers): ફાસ્ટ બોલરો માટે હવે ભૂલની કોઈ ગુંજાઈશ (Margin of Error) નથી. યોર્કર ફેંકતી વખતે કે ફ્લિક શોટ રમવા મજબૂર કરતા બોલ ફેંકતી વખતે જો સહેજ પણ લાઇન ચૂકાશે, તો રન અને એક્સ્ટ્રા બોલ બંને ભોગવવા પડશે.

– સ્પિનર્સ (Spinners): ખાસ કરીને ઓફ-સ્પિનર્સ માટે આ દબાણ બમણું થશે. સ્પિનરો સામાન્ય રીતે લેગ સાઇડ પર ફિલ્ડરો ગોઠવીને લેગ સ્ટમ્પ પર બોલિંગ કરતા હોય છે. હવે જો બોલ સહેજ પણ લાઇન બહાર ટર્ન થયો, તો બેટ્સમેન તેને ફક્ત છોડી દેશે અને અમ્પાયર વાઇડ આપી દેશે.

ક્રિકેટ વધુ આક્રમક અને હાઈ-સ્કોરિંગ બનશે

1 ઓક્ટોબરથી લાગુ થઈ રહેલા ICC ના આ ત્રણેય નિયમો સ્પષ્ટપણે દર્શાવે છે કે આધુનિક ક્રિકેટ વધુ આક્રમક અને હાઈ-સ્કોરિંગ ગેમ બનવા તરફ જઈ રહ્યું છે. એક તરફ જ્યાં બેટ્સમેનોને રન બનાવવાની નવી મોકળાશ મળશે, તો બીજી તરફ બોલરોએ પોતાની લાઇન-લેન્થ પર વધુ કમાન્ડ મેળવવી પડશે. બદલાતા ક્રિકેટ સાથે કઈ ટીમ આ નિયમોને ઝડપથી અપનાવે છે તે જોવું રસપ્રદ રહેશે.