Ahmedabad News: ગુજરાતમાં પ્રતિબંધિત ઈ-સિગારેટ અને વેપિંગ પ્રોડક્ટ્સના ગેરકાયદે વેચાણ વિરુદ્ધ ગાંધીનગર સ્પેશિયલ મોનિટરિંગ સેલ (SMC) દ્વારા મોટી કાર્યવાહી કરવામાં આવી છે. SMCની ટીમે અમદાવાદ ગ્રામ્યના સાઉથ બોપલ વિસ્તારમાં આવેલા એક પાન પાર્લર પર દરોડો પાડીને લાખો રૂપિયાની કિંમતની ઈ-સિગારેટ, રોકડ અને મોબાઈલ ફોન સહિત કુલ 1.89 લાખ રૂપિયાનો મુદ્દામાલ જપ્ત કર્યો છે. આ મામલે પોલીસે એક આરોપીની ધરપકડ કરી છે, જ્યારે માલ સપ્લાય કરનારા અન્ય બે શખ્સોને વોન્ટેડ જાહેર કર્યા છે.
લાખોની ઇ-સિગારેટ અને રોકડ જપ્ત કરાઈ
આ રેડ આજે ૩ જૂનના રોજ અમદાવાદ ગ્રામ્ય જિલ્લાના બોપલ પોલીસ સ્ટેશનની હદમાં આવેલા સાઉથ બોપલના ‘સન સાઉથ પાર્ક’ નામના શોપિંગ સેન્ટરમાં દુકાન નંબર 11, ‘અશોક પાન પાર્લર’ ખાતે કરવામાં આવી હતી. આ ઓપરેશન દરમિયાન પોલીસે સ્થળ પરથી 1.26 લાખ રૂપિયાની કિંમતની 42 નંગ ઈ-સિગારેટ અને વેપિંગ રિફિલ જપ્ત કરી હતી. આ ઉપરાંત અધિકારીઓએ 50,000ની કિંમતનો એક મોબાઈલ ફોન અને 13,540 રૂપિયાની રોકડ રકમ પણ કબજે લીધી હતી, જેથી જપ્ત કરાયેલી કુલ સંપત્તિની કિંમત આશરે 1.89 લાખ રૂપિયા આંકવામાં આવી છે.
આરોપી હર્ષિલ શાહની ધરપકડ, બે મુખ્ય સપ્લાયર્સ વોન્ટેડ જાહેર
આ કેસમાં ધરપકડ કરાયેલા આરોપીની ઓળખ સાઉથ બોપલના રહેવાસી હર્ષિલ પ્રશાંતભાઈ શાહ તરીકે થઈ છે. ધરપકડ બાદ આગળની કાયદેસરની કાર્યવાહી માટે તેને બોપલ પોલીસ સ્ટેશનને સોંપવામાં આવ્યો છે. પોલીસે આ કેસમાં માલ સપ્લાય કરનારા અન્ય બે આરોપીઓને પણ વોન્ટેડ જાહેર કર્યા છે. જેમા અમદાવાદના જીવરાજ પાર્ક વિસ્તારનો રહેવાસી વિકી મારવાડી અને કાલુપુર વિસ્તારનો રહેવાસી તાહીર સામેલ છે. તપાસકર્તાઓને શંકા છે કે આ બંને ઈસમો જ દુકાનમાં ઈ-સિગારેટ સપ્લાય કરતા હતા.
પ્રતિબંધિત ઇ-સિગારેટ એક્ટ હેઠળ ગુનો નોંધાયો
આ સમગ્ર મામલે સિગારેટ અને અન્ય તમાકુ ઉત્પાદન અધિનિયમ, 2003 (COTPA) તેમજ ઇલેક્ટ્રોનિક સિગારેટ પ્રતિબંધ અધિનિયમ, 2019ની સંબંધિત જોગવાઈઓ હેઠળ ગુનો નોંધવામાં આવ્યો છે. પ્રતિબંધિત વેપિંગ પ્રોડક્ટ્સ મેળવવા અને તેની વહેંચણી કરવા પાછળ કઈ સપ્લાય ચેન કામ કરી રહી છે તથા અન્ય કયા લોકો સામેલ છે તે શોધવા માટે આગળની તપાસ ચાલી રહી છે. હાલમાં પોલીસ ફરાર આરોપીઓને પકડવા અને આ ગેરકાયદેસર વેપાર પાછળના મોટા નેટવર્કનો પર્દાફાશ કરવાના પ્રયાસો કરી રહી છે.
Follow Us On Google News
Follow Us On WhatsApp
Follow Us On facebook
Leave a Comment