શેરોમાં માર્કેટ કેપિટલાઈઝેશન ફરી પાંચ લાખ કરોડ ડોલરને પાર | Market capitalization in stocks crossed five lakh crore dollars again

ઈરાન અને અમેરિકા વચ્ચે યુદ્વના અંતની સમજૂતી :રૂપિયો મજબૂત બનતા સાનુકૂળ અસર

મુંબઈ : લાંબા સમયથી વિશ્વને અસ્થિરતામાં ધકેલનારા ઈરાન-અમેરિકા યુદ્વનો આખરે અંત લાવવા બન્ને દેશો વચ્ચે સમજૂતી થયાના સમાચારે વૈશ્વિક બજારોની સાથે ભારતીય શેર બજારોમાં મંદીના વાદળો વિખેરાઈ તેજી હિલોળા લેવા લાગતાં અને અમેરિકી ડોલર સામે ભારતીય રૂપિયો મજબૂત બનીને આજે ૧૦ પૈસા સુધરીને ૯૪.૫૦ થઈ જતાં શેરોમાં રોકાણકારોની સંપત્તિ-માર્કેટ કેપિટલાઈઝેશન આજે ફરી પાંચ લાખ કરોડનો આંક પાર કરી ગયું હતું. બીએસઈમાં લિસ્ટેડ કંપનીઓનું એક્ત્રિત માર્કેટ કેપિટલાઈઝેશન આજે રૂ.૨.૮૮ લાખ કરોડ વધીને રૂ.૪૭૫.૧૧ લાખ કરોડ એટલે કે ૫.૦૨ લાખ કરોડ ડોલરની ઊંચાઈએ પહોંચી ગયું છે.

Also Read

ભારતમાં વિદેશી રોકાણ પ્રવાહ વધારવા FCNR(બી), NRE થાપણો પરના વ્યાજ દરોની ટોચ મર્યાદા ઉઠાવતું RBI | RBI lifts cap on interest rates on FCNR B NRE deposits

ચાર ટ્રેડિંગ દિવસોમાં ભારતીય શેર બજારોમાં સેન્સેક્સમાં ૩૩૨૩.૦૭ પોઈન્ટ એટલે કે ૪.૫૦ ટકાનો અને નિફટી ૫૦ ઈન્ડેક્સમાં ૯૨૪.૦૧ પોઈન્ટ એટલે કે ૩.૯૮ ટકાનો ઉછાળો નોંધાયો છે. આ સાથે બન્ને બેન્ચમાર્ક છ અઠવાડિયાની ઊંચાઈએ પહોંચી ગયા છે. 

Also Read

અમદાવાદમાં NEETની તૈયારી કરતા 17 વર્ષીય વિદ્યાર્થીએ છઠ્ઠા માળેથી પડતું મૂકી આપઘાત કર્યો | NEET Aspirant Dies in Ahmedabad’s New Ranip Ahead of Exam

જ્યારે શેરોમાં એક્ત્રિત માર્કેટ કેપિટલાઈઝેશન-રોકાણકારોની સંપતિ જે ૧૧, જૂન ૨૦૨૬ના રોજ રૂ.૪૫૨.૩૩ લાખ કરોડની હતી, એ ચાર દિવસમાં રૂ.૨૨.૭૮ લાખ કરોડ વધીને રૂ.૪૭૫.૧૧ લાખ કરોડ પહોંચી છે. જે ડોલરના રૂ.૯૪.૫૦ ભાવ મુજબ માં ૫.૦૨ લાખ કરોડ ડોલરની ઊંચાઈએ પહોંચ્યું છે. આ માર્કેટ કેપિટલાઈઝેશન છેલ્લે ૮, મે ૨૦૨૬ના રોજ જોવાયું હતું. 

ચાર ટ્રેડિંગ સત્રમાં સેન્સેક્સ, નિફટીમાં તેજી સાથે સ્મોલ, મિડ કેપ શેરોમાં પણ વ્યાપક ખરીદીનું આકર્ષણ જોવાયું છે. એપ્રિલની શરૂઆતથી અત્યાર સુધીમાં સેન્સેક્સ ૭ ટકા જેટલો વધ્યો છે. જ્યારે બીએસઈ મિડ કેપ ૧૫૦ ઈન્ડેક્સ ૧૬ ટકા અને બીએસઈ સ્મોલ કેપ ઈન્ડેક્સ ૨૩ ટકા વધ્યા છે. અત્રે ઉલ્લેખનીય છે કે આ તેજીમાં અત્યારે માર્કેટ કેપિટલાઈઝેશન ૫.૦૨ લાખ કરોડ ડોલર પહોંચ્યા છતાં ઓલ ટાઈમ હાઈ સપ્ટેમ્બર ૨૦૨૪ની ૫.૭ લાખ કરોડ ડોલરની સર્વોચ્ચ રેકોર્ડ સપાટીથી હજુ માર્કેટ કેપ. નીચું છે.

ભારતીય શેર બજારોમાં લાંબા સમયથી સ્થાનિક સંસ્થાકીય રોકાણકારોની ખરીદી બાદ હવે વિદેશી સંસ્થાકીય રોકાણકારો પણ શેરોમાં ફરી ખરીદદાર બનતાં જોવાઈ રહ્યા છે. કેન્દ્ર સરકાર અને રિઝર્વ બેંક ઓફ ઈન્ડિયાએ વિદેશી રોકાણને આકર્ષવા લીધેલા પગલાં, પ્રોત્સાહનોના પરિણામે શેરોમાં ખરીદી વધતી જોવાઈ છે.

આ દરમિયાન ઈન્ડિયા વીઆઈએક્સ એટલે નિફટી વીઆઈએક્સ પણ આજે ૧.૩૧ ટકા ઘટીને ૧૩.૧૯ રહ્યો છે. જે બાવન સપ્તાહની ૨૮.૯૦ની ટોચથી ૫૪.૩૬ ટકા ઘટયો છે. અમેરિકી ડોલર સામે ભારતીય રૂપિયો ઓલ ટાઈમ નીચી સપાટી ૯૬.૯૬ની સપાટીથી મજબૂત બનીને હવે ૯૪.૫૦ ડોલર થઈ ગયો છે.

 ક્રુડ ઓઈલના આંતરરાષ્ટ્રીય ભાવ પણ તાજેતરની માર્ચ ૨૦૨૬ની બેરલ દીઠ ૧૧૯.૫૦ ડોલરની ઊંચી સપાટીથી ગબડીને ૮૦ ડોલરની સપાટીએ અને નાયમેક્ષ-ન્યુયોર્ક ક્રુડ ૭૭ ડોલરની સપાટીએ આવી જતાં શેર બજારમાં રોકાણકારોનો ફરી રોકાણ માટે ધસારો જોવાયો છે.

ઈરાન-અમેરિકા યુદ્વના અંતની ડિલ સાથે વડાપ્રધાન નરેન્દ્ર મોદીની અમેરિકી રાષ્ટ્રપતિ ડોનાલ્ડ ટ્રમ્પ સાથે જી-૭ મીટિંગની સાથે સાથે યોજાનારી મીટિંગમાં ભારત અને અમેરિકા વચ્ચે સંબંધો ફરી સુધરવાની અને બન્ને દેશો વચ્ચેની અપેક્ષિત ટ્રેડ ડિલને આખરી મહોર લાગવાની અપેક્ષાએ પણ આજે રોકાણકારોનો શેરોમાં ખરીદીનો ઉત્સાહ વધતો જોવાયો હતો. શેરોમાં સળંગ ચોથા દિવસે તેજી રહી ફંડોએ કેપિટલ ગુડઝમાં મોટી ખરીદી કરી હતી. આ સાથે પાવર, મેટલ, આઈટી, બેંકિંગ-ફાઈનાન્સ શેરોમાં ફંડો લેવાલ બન્યા હતા. સ્મોલ, મિડ કેપ શેરોમાં પણ આકર્ષણ વધતું જોવાયું હતું.