દેશભરમાં ચકચાર જગાવનારા મેઘાલયના ‘શિલોંગ હનીમૂન મર્ડર કેસ’ માં એક નવો વળાંક આવ્યો છે. આ હાઈપ્રોફાઈલ હત્યા કેસની મુખ્ય આરોપી સોનમ રઘુવંશીને મળેલી જામીનને પડકારતા મેઘાલય સરકાર સુપ્રીમ કોર્ટના દ્વારે પહોંચી છે. રાજ્ય સરકારે આ મામલે તાકીદે સુનાવણી કરવાની માંગ કરી છે, જેના પર દેશની સર્વોચ્ચ અદાલતે પણ વહેલી તકે સુનાવણીની ખાતરી આપી છે.
સૉલિસિટર જનરલે કરી તાકીદે સુનાવણીની માંગ
મેઘાલય સરકાર વતી દેશના સૉલિસિટર જનરલ તુષાર મહેતાએ જસ્ટિસ સુંદરેશની ખંડપીઠ સમક્ષ આ અત્યંત સંવેદનશીલ કેસની રજૂઆત કરી હતી. તેમણે કોર્ટને જણાવ્યું કે આ કેસમાં તાત્કાલિક સુનાવણીની જરૂર છે અને આવતીકાલે જ એટલે કે ૩ જુલાઈએ આ અરજી પર કોર્ટ વિચારણા કરે તેવી માંગ કરી છે.
માત્ર એક ટાઈપિંગ ભૂલના કારણે મળ્યા જામીન!
કોર્ટ સમક્ષ દલીલ કરતા સૉલિસિટર જનરલ તુષાર મહેતાએ એક ચોંકાવનારો ખુલાસો કર્યો હતો. તેમણે જણાવ્યું કે આરોપી સોનમ રઘુવંશીને જામીન મળવા પાછળનું કારણ માત્ર એક કાનૂની અને ટેકનિકલ ભૂલ છે. ધરપકડ સમયે તમામ કારણો યોગ્ય રીતે રજૂ કરી શકાયા નહોતા અને ધરપકડના સત્તાવાર દસ્તાવેજોમાં એક કાનૂની કલમનો નંબર લખવામાં ટાઈપિંગ એરર (લખવાની ભૂલ) થઈ ગઈ હતી.
તુષાર મહેતાએ કોર્ટમાં ભારપૂર્વક જણાવ્યું કે, હત્યા જેવો ગંભીર અને સંગીન ગુનો આચરનાર આરોપીને માત્ર આવી સામાન્ય કારકુની કે ટેકનિકલ ખામીના આધારે જામીન પર મુક્ત ન કરી શકાય.
આરોપી દેશ છોડીને ભાગી જવાની આશંકા
સરકારે કોર્ટ સમક્ષ એવી ભીતિ પણ વ્યક્ત કરી છે કે સોનમ રઘુવંશી એક પ્રભાવશાળી આરોપી છે. જો તેની જામીન પર વચગાળાની રોક લગાવવામાં નહીં આવે અથવા જામીન રદ નહીં થાય, તો તે કાયદાની પકડમાંથી બચવા માટે દેશ છોડીને ફરાર થઈ શકે છે. તેથી ન્યાયના હિતમાં તેની જામીન તાત્કાલિક રદ થવી જરૂરી છે.
શું છે સમગ્ર મામલો?
આરોપી સોનમ રઘુવંશી પર એવો ગંભીર આરોપ છે કે તેણીએ પોતાના નવપરિણિત પતિની હનીમૂન દરમિયાન મેઘાલયની રાજધાની શિલોંગમાં નિર્મમ હત્યા કરી નાખી હતી. લગ્નના પવિત્ર બંધન બાદ હનીમૂન ટ્રીપ પર થયેલી આ હત્યાની ઘટનાએ સમગ્ર દેશને હચમચાવી દીધો હતો. હવે મેઘાલય સરકાર સુપ્રીમ કોર્ટના માધ્યમથી આરોપીને જેલના સળિયા પાછળ ધકેલીને કડક સજા અપાવવા માટે કાનૂની લડાઈ લડી રહી છે.
આ પણ વાંચો:Iran: ખામેનીને શ્રદ્ધાંજલિ આપવા જશે મહેબૂબા મુફ્તી, તેહરાનથી મળ્યું ખાસ આમંત્રણ
Follow Us On Google News
Follow Us On WhatsApp
Follow Us On facebook
Leave a Comment