1 ઓક્ટોબરથી ખિસ્સા પર પડશે સીધી અસર! ATMથી લઈને LPG અને FD સુધી બદલાશે 8 મોટા નિયમો

1 ઓક્ટોબર 2026થી સામાન્ય લોકોના બેન્કિંગ, LPG, ટેક્સ અને રોકાણ સાથે જોડાયેલા કેટલાક મહત્વના નિયમો અને ફેરફારો અમલમાં આવવાના છે. બીજી તરફ તહેવારોની સીઝન શરૂ થવા પહેલાં AC, TV, ફ્રિજ અને વોશિંગ મશીન જેવી કેટલીક વસ્તુઓના ભાવમાં પણ વધારો થવાની શક્યતા છે. આઠ મોટા ફેરફારો અંગે જાણી લો.

1. LPG સબસિડી માટે આધાર બાયોમેટ્રિક ઓથેન્ટિકેશન જરૂરી
   1 ઓક્ટોબરથી સબસિડીવાળા ઘરેલુ LPG રિફિલને નિયંત્રિત રિટેલ વેચાણ કિંમતે બુક કરવા માટે Biometric Aadhaar Authentication પૂર્ણ કરાવવું જરૂરી બનશે. પેટ્રોલિયમ મંત્રાલય અનુસાર 19 સપ્ટેમ્બર સુધી 27.43 કરોડ એટલે કે 89.9 ટકા ગ્રાહકોનું ઓથેન્ટિકેશન પૂર્ણ થઈ ચૂક્યું છે. બાકી ગ્રાહકો ડિલિવરી સમયે, ગેસ ડિસ્ટ્રિબ્યુટર શોરૂમ પર અથવા સંબંધિત OMCની મોબાઇલ એપથી પ્રક્રિયા પૂર્ણ કરી શકે છે.
2. SBIના કેટલાક ગ્રાહકો માટે ATMના નિયમોમાં ફેરફાર
   SBIના સેલેરી પેકેજ એકાઉન્ટ ધરાવતા ગ્રાહકો માટે 1 ઓક્ટોબરથી અન્ય બેન્કોના ATM/ADWM પર મફત ટ્રાન્ઝેક્શનની મહત્તમ મર્યાદા પાંચ પ્રતિ મહિનો રહેશે. મર્યાદા પૂરી થયા બાદ લાગુ પડતા સર્વિસ ચાર્જ ચૂકવવા પડી શકે છે. એટલે વારંવાર અન્ય બેન્કના ATMનો ઉપયોગ કરતા ગ્રાહકોએ આ ફેરફારનું ધ્યાન રાખવું પડશે.
3. SBI BSBD ખાતામાં કેશ ઉપાડ મર્યાદા
   SBIના Basic Savings Bank Deposit (BSBD) ખાતામાં 1 ઓક્ટોબરથી મહિનામાં ચાર કેશ ઉપાડ મફત રહેશે. ત્યારબાદના દરેક વધારાના ઉપાડ પર ₹15 અને લાગુ GST ચાર્જ વસૂલાશે. નવી વ્યવસ્થામાં AePS દ્વારા થતા કેશ ઉપાડને પણ મફત માસિક મર્યાદાની ગણતરીમાં સામેલ કરવામાં આવશે. ડિજિટલ ટ્રાન્ઝેક્શન માટે આ ચાર્જ લાગુ પડતો નથી.
4. ₹3 કરોડથી વધુની બલ્ક ડિપોઝિટ પર FD નિયમોમાં ફેરફાર
   RBIના ડિપોઝિટ નિયમો હેઠળ શેડ્યૂલ્ડ કોમર્શિયલ બેન્કો માટે ₹3 કરોડ કે તેથી વધુની ડિપોઝિટને બલ્ક ડિપોઝિટ તરીકે ગણવામાં આવે છે. આવી થાપણો પર બેન્કોને ડિફરન્શિયલ વ્યાજદર નક્કી કરવાની છૂટ હોય છે. આ ફેરફાર મુખ્યત્વે મોટા થાપણદારોને અસર કરે છે, સામાન્ય નાના FD ગ્રાહકોને નહીં.
5. RBIની MPC બેઠકમાં રેપો રેટ પર નજર
   ઓક્ટોબરમાં RBIની મોનેટરી પોલિસી કમિટીની બેઠક યોજાવાની છે, જેમાં રેપો રેટ અંગે નિર્ણય લેવામાં આવશે. રેપો રેટમાં ફેરફાર થાય તો હોમ લોન, પર્સનલ લોન સહિતના વ્યાજદર અને બેન્કોની FDના દરો પર પણ અસર થઈ શકે છે. જોકે નિર્ણય બેઠક બાદ જ સ્પષ્ટ થશે.
6. PPF, NSC અને સુકન્યા જેવી બચત યોજનાઓના દરની સમીક્ષા
   ઓક્ટોબરથી ડિસેમ્બર 2026ના ત્રિમાસિક માટે PPF, National Savings Certificate (NSC), Sukanya Samriddhi Account અને Senior Citizen Savings Scheme સહિતની Small Savings Schemesના વ્યાજદરની સમીક્ષા કરવામાં આવશે. સરકાર દ્વારા નવા દર જાહેર થયા બાદ રોકાણકારોને આગામી ત્રિમાસિકમાં મળનારા વ્યાજ અંગે સ્પષ્ટતા થશે.
7. ટેક્સ ઓડિટવાળા કરદાતાઓ માટે ITRની છેલ્લી તારીખ
   ટેક્સ ઓડિટ હેઠળ આવતા કરદાતાઓ માટે AY 2026-27નું ITR ફાઇલ કરવાની છેલ્લી તારીખ 31 ઓક્ટોબર 2026 છે. જોકે, આ તારીખ તમામ કરદાતાઓ માટે લાગુ પડતી નથી. ટ્રાન્સફર પ્રાઇસિંગ સંબંધિત કેસમાં અલગ સમયમર્યાદા લાગુ પડે છે, તેથી કરદાતાઓએ પોતાની કેટેગરી પ્રમાણે અંતિમ તારીખ ચકાસવી જરૂરી છે.
8. તહેવારો પહેલાં AC, TV અને હોમ એપ્લાયન્સિસ મોંઘા થઈ શકે
   તહેવારોની સીઝન શરૂ થવા પહેલાં AC, LED TV, ફ્રિજ અને વોશિંગ મશીન જેવી કન્ઝ્યુમર ઇલેક્ટ્રોનિક્સ વસ્તુઓના ભાવમાં વધારો થવાની શક્યતા છે. વિવિધ અહેવાલો મુજબ 1 ઓક્ટોબરથી કેટલીક કેટેગરીમાં આશરે 5થી 8 ટકા સુધીનો ભાવ વધારો થઈ શકે છે. કાચા માલ, શિપિંગ, ક્રૂડ ઓઇલ ડેરિવેટિવ્સ અને અન્ય ઇનપુટ ખર્ચ વધવાને કારણે કંપનીઓ ભાવમાં વધારો કરી રહી છે. કેટલાક ડીલરો પાસે જૂનો સ્ટોક હોવાથી શરૂઆતમાં જૂના ભાવે પણ માલ મળી શકે છે.