– કેરળના પૂર્વ સીએમની પુત્રી સામે ઇડીની મની લોન્ડરિંગની તપાસથી વિવાદ
– હાઇકોર્ટે કાર્યવાહી સામે અરજી ફગાવ્યાના બીજા જ દિવસે ત્રાટકેલી ઇડીના વાહનોને ડાબેરીઓએ ઘેરી લીધા
તિરુવનંતપુરમ : કેન્દ્રીય તપાસ એજન્સી ઇડીએ કેરળના પૂર્વ મુખ્યમંત્રી વિજયનને ત્યાં દરોડા પાડયા હતા, જોકે આ દરોડા દરમિયાન ઇડીના અધિકારીઓ પર વિજયનના સમર્થકો અને ડાબેરી પક્ષ સીપીઆઇ(એમ)ના કાર્યકર્તાઓએ હુમલો કર્યો હતો, એટલુ જ નહીં સમગ્ર કેરળમાં આ દરોડાને લઇને વિરોધ પ્રદર્શનો કરવામાં આવ્યા હતા. ઇડીના અધિકારીઓના વાહનો પર પથ્થરમારો પણ કરવામાં આવ્યો હતો. જ્યારે ઇંડા ફેકવાની ઘટના પણ સામે આવી હતી.
કેરળના પૂર્વ મુખ્યમંત્રી પિનારયી વિજયનની પુત્રીની કંપની અને રેત ખનન સાથે સંકળાયેલી એક કંપની વચ્ચે નાણાકીય ડીલને લઇને ઇડી દ્વારા આ દરોડા પાડવામાં આવ્યા હતા. ઇડીના અધિકારીઓ પૂર્વ મુખ્યમંત્રી વિજયનના ભાડાના મકાને પહોંચ્યા હતા અને તપાસ કરી હતી. આ દરમિયાન ઘરની બહાર મોટી સંખ્યામાં ડાબેરીઓ એકઠા થઇ ગયા હતા, અને ઇડી વિરુદ્ધ સુત્રોચ્ચાર કરવા લાગ્યા હતા. ભીડ વધી જતા બાદમાં હિંસાની ઘટનાઓ સામે આવવા લાગી હતી. દરોડા દરમિયાન ઘરની આસપાસ આઠ સુરક્ષાકર્મીઓને તૈનાત કરવામાં આવ્યા હતા. જેવા આ તમામ લોકો ઘરની બહાર નીકળ્યા કે તરત જ સ્થિતિ કાબુ બહાર જવા લાગી હતી, ડાબેરી પક્ષના કાર્યકર્તાઓએ ઇડીના વાહનોને ઘેરી લીધા હતા, ત્રણ જગ્યાએ પથ્થરમારાની પણ ઘટના સામે આવી હતી.
બહુ જ મોટી સંખ્યામાં લોકો એકઠા થયા હતા અને ઇડી તેમજ કેન્દ્ર સરકાર વિરુદ્ધ ઉગ્ર સુત્રોચ્ચાર પણ કર્યો હતો. એટલુ જ ઇડીના અધિકારીઓ પર કેટલાક લોકોએ ઇંડા પણ ફેક્યા હતા. પથ્થરમારો અને લાકડીઓ દ્વારા હુમલાની આ ઘટનામાં એક ડ્રાઇવરને ઇજા પહોંચી હતી. જ્યારે બીજી તરફ કેરળ સરકારે એક નિવેદન જાહેર કરીને જણાવ્યું હતું કે ઇડીના અધિકારીઓ દરોડા પાડવા આવવાના છે તેવી કોઇ જ માહિતી અમને આપવામાં નહોતી આવી. એટલુ જ નહીં પોલીસની પણ કોઇ જ મદદ માગવામાં નહોતી આવી. જ્યારે ભાજપે આ ઘટનાની ટિકા કરી હતી. નોંધનીય છે કે વિજયનના પુત્રી વીણાની સોફ્ટવેર કંપની એક્સાલોજિક સોલ્યુશન અને કોચિન મિનરલ નામની કંપની વચ્ચે નાણાકીય વ્યવહારને લઇને ઇડી દ્વારા મની લોન્ડરિંગની તપાસ શરૂ કરાઇ હતી, જેની સામે કંપનીએ જે અરજી કરી હતી તેને હાઇકોર્ટે ફગાવી દીધી જેના બીજા જ દિવસે ઇડી આ દરોડા પાડવા પહોંચી ગઇ હતી.
Follow Us On Google News
Follow Us On WhatsApp
Follow Us On facebook
Leave a Comment