Vadodara Corporation : વડોદરા કોર્પોરેશનમાં હંગામી ધોરણે ભરતી કરાયેલા ઇજનેરી સ્ટાફની સેવાઓ યથાવત રાખવા માટે તેમની નિમણૂકની મુદતમાં વધુ 11 મહિનાનો વધારો કરવાની દરખાસ્ત સ્થાયી સમિતિ સમક્ષ રજૂ કરવામાં આવી છે. સાથે સાથે ભવિષ્યમાં જરૂરિયાત મુજબ નિયમો અનુસાર આ મુદત વધુ લંબાવવાનો અધિકાર મ્યુનિસિપલ કમિશનરને સોંપવાની પણ ભલામણ કરવામાં આવી છે.
મ્યુનિસિપલ કોર્પોરેશન દ્વારા સ્માર્ટ સિટી મિશન, અમૃત યોજના, પ્રી-મોન્સૂન કામગીરી, ડ્રેનેજ, રોડ-રસ્તા તથા પાણી પુરવઠા નેટવર્ક જેવા વિવિધ વિકાસ પ્રોજેક્ટોના આયોજન, સાઇટ સુપરવિઝન અને ગુણવત્તા નિયંત્રણ માટે ઇજનેરી ક્ષેત્રના વધારાના માનવબળની જરૂરિયાત ઉભી થઈ હતી. તેના પગલે ફેબ્રુઆરી-2026 દરમિયાન છ માસની મુદત માટે ઉચ્ચ ફિક્સ વેતન પર કરાર આધારિત હંગામી નિમણૂકો કરવામાં આવી હતી.
આ ભરતી અંતર્ગત આસિસ્ટન્ટ એન્જિનિયર (સિવિલ, મિકેનિકલ અને ઇલેક્ટ્રિકલ) તેમજ વર્ક આસિસ્ટન્ટ (સિવિલ, મિકેનિકલ અને ઇલેક્ટ્રિકલ)ની નિમણૂક કરવામાં આવી હતી. હાલ વિવિધ પ્રોજેક્ટોની કામગીરી ચાલુ હોવાથી તેમની સેવાઓ સતત ઉપલબ્ધ રહે તે માટે મુદત વધારવાનો નિર્ણય લેવામાં આવી રહ્યો છે.
ઉલ્લેખનીય છે કે વડોદરા મહાનગરપાલિકામાં અનેક મહત્વના હોદ્દાઓ હજુ પણ હવાલાના ચાર્જથી ચલાવવામાં આવી રહ્યા છે. બીજી તરફ કર્મચારી સંગઠનો દ્વારા લાંબા સમયથી મહેકમની અછતને કારણે કામગીરી પર અસર પડતી હોવાની ફરિયાદો કરવામાં આવી રહી છે. આવી સ્થિતિમાં હંગામી કર્મચારીઓની મુદત વધારવાની દરખાસ્ત કોર્પોરેશનની કાયમી ભરતી પ્રક્રિયા અંગે પણ સવાલો ઊભા કરી રહી છે.
Follow Us On Google News
Follow Us On WhatsApp
Follow Us On facebook
Leave a Comment