ઘરકંકાશથી કંટાળીને પિતાએ 6 વર્ષની પુત્રી સાથે નદીમાં ઝમ્પલાવ્યું, બન્નેનાં મોત

ધોરાજી અને જામકંડોરણા વચ્ચે ભાદર નદી પર આવેલા પુલ નીચે પાણીમાંથી પિતા અને પુત્રની લાશ મળી આવી હતી. અહીં જુનાગઢ રહેતા પિતાએ 6 વર્ષની પુત્રી સાથે નદીમાં ઝંપલાવ્યાનું હોવાનું પ્રાથમિક તારણ સામે આવ્યું છે.

પિતાની સાથે કપડાંથી બાંધેલી હતી પુત્રી

મળેલી માહિતી મુજબ, પોલીસને જાણ કરવામાં આવી હતી કે ધોરાજી અને જામકંડોરણા વચ્ચે ભાદર નદીના પુલ પર મોટરસાયકલ પડેલું છે. આ અંગે જાણ થતા જ પોલીસની ટીમ ઘટનાસ્થળે પહોંચી હતી. જ્યાં ભાદર નદી પુલ પાસેના ભાગમાં પિતા અને પુત્રીની લાશ મળી આવી હતી. મૃતક પિતાની સાથે પુત્રીને કપડાંથી બાંધેલી હતી.

જૂનાગઢના રહેવાસી હતા પિતા અને પુત્રી

ત્યારબાદ પોલીસ દ્વારા બંનેની લાશ બહાર કાઢી સરકારી હોસ્પિટલ ખાતે પીએમ માટે ખસેડવામાં આવી હતી. મૃતક પિતાનું નામ ગફાર વિજળીવાળા અને પુત્રીનું નામ અનામ ફાતિમા છે. તેઓ જુનાગઢના સુખનાથ ચોક વિસ્તારમાં રહેતા હતા.

ઘરકંકાશથી કંટાળી પિતાએ ભર્યું આ પગલું

આંટો મારવાનું કહી ઘરેથી નીકળ્યા હતા. સોમવારે જામકંડોરણા અને ધોરાજી વચ્ચે ભાદર નદીના પુલ નીચે મૃતદેહ મળી આવતા ચકચાર મચી જવા પામી હતી. પોલીસની પ્રાથમિક તપાસમાં સામે આવ્યું છે કે દીકરી બહુ બિમાર રહેતી હોવાથી ગૃહકંકાશ વધી જતાં પિતાએ કંટાળીને આ પગલું ભર્યું હતું.