ગુજરાતના સ્ટાર ઓલરાઉન્ડર રવિન્દ્ર જાડેજાની એક સોશિયલ મીડિયા કોમેન્ટે ક્રિકેટ ચાહકોનું ધ્યાન ખેંચ્યું છે. BCCIની ભરતી અંગેની પોસ્ટ પર જાડેજાએ મજાકિયા અંદાજમાં સવાલ પૂછતાં ચાહકોમાં ચર્ચા શરૂ થઈ હતી.
BCCIની પોસ્ટ પર જાડેજાએ શું લખ્યું?
BCCIએ સોશિયલ મીડિયા પ્લેટફોર્મ X પર ચીફ સિલેક્ટરના પદ માટે અરજી પ્રક્રિયા શરૂ થવાની માહિતી શેર કરી હતી. આ પોસ્ટ પર પ્રતિક્રિયા આપતાં રવિન્દ્ર જાડેજાએ લખ્યું, ‘What the procedure?’ એટલે કે, અરજી કરવાની પ્રક્રિયા શું છે?
જાડેજાની આ કોમેન્ટ મજાકિયા અંદાજમાં કરવામાં આવી હતી. જોકે, ચીફ સિલેક્ટરના પદ માટે નવી ભરતીની ચર્ચા વચ્ચે તેમની આ પ્રતિક્રિયા તરત જ ચર્ચાનો વિષય બની ગઈ. કેટલાક ચાહકો આ કોમેન્ટને લઈને મજાક કરતા જોવા મળ્યા, તો કેટલાકે તેમના સવાલને રસપ્રદ ગણાવ્યો.
શું રવિન્દ્ર જાડેજા ચીફ સિલેક્ટર બની શકે?
જાડેજાની કોમેન્ટ બાદ સવાલ ઊભો થાય છે કે શું તેઓ ખરેખર BCCIના ચીફ સિલેક્ટર બની શકે? જોકે, આ પદ માટેના નિયમો અને જાડેજાની હાલની ક્રિકેટ કારકિર્દી વચ્ચે મોટો તફાવત છે.
BCCIના પસંદગીકાર બનવા માટે ઉમેદવારે નિર્ધારિત લાયકાત પૂરી કરવી પડે છે. તેમાં ક્રિકેટમાંથી નિવૃત્તિ અને અન્ય પાત્રતા સંબંધિત શરતોનો સમાવેશ થાય છે. જાડેજાએ T20 વર્લ્ડ કપ 2024 બાદ T20 આંતરરાષ્ટ્રીય ક્રિકેટમાંથી નિવૃત્તિ જાહેર કરી હતી,
પરંતુ તેઓ ટેસ્ટ અને વનડે ક્રિકેટમાં રમવાનું ચાલુ રાખ્યું છે. આ ઉપરાંત, તેઓ IPLમાં પણ સક્રિય છે. આથી, તેમની સોશિયલ મીડિયા કોમેન્ટને ચીફ સિલેક્ટરના પદ માટે ખરેખર અરજી કરવાની જાહેરાત તરીકે જોવી યોગ્ય નથી. તેમની ટિપ્પણી મજાકિયા પ્રતિક્રિયા હતી.
અજીત અગરકરના કાર્યકાળની ચર્ચા
અજીત અગરકરે વર્ષ 2023માં ભારતીય ટીમના ચીફ સિલેક્ટર તરીકે જવાબદારી સંભાળી હતી. તેમના કાર્યકાળ દરમિયાન ભારતીય ટીમે અનેક મહત્ત્વપૂર્ણ ટુર્નામેન્ટમાં સફળતા મેળવી હતી.
ભારતે T20 વર્લ્ડ કપ 2024 અને ચેમ્પિયન્સ ટ્રોફી 2025 જીતી હતી. ભારતીય ટીમે 2023ના વનડે વર્લ્ડ કપની ફાઇનલમાં પણ સ્થાન મેળવ્યું હતું. અગરકરના કાર્યકાળમાં ટીમની પસંદગી, ખેલાડીઓની ભૂમિકા અને ભવિષ્યની ટીમ તૈયાર કરવાની પ્રક્રિયા અંગે અનેક વખત ચર્ચા થઈ હતી. હવે નવા ચીફ સિલેક્ટરની નિમણૂકને લઈને ક્રિકેટ જગતની નજર BCCIના આગામી નિર્ણય પર છે.
Follow Us On Google News
Follow Us On WhatsApp
Follow Us On facebook