India vs West Indies : T-20માં રેકોર્ડનો વરસાદ! ભારત સામે સૌથી મોટો રનચેઝ, મેચમાં બન્યા 500થી વધુ રન

પ્રથમ બેટિંગ કરતા ટીમ ઇન્ડિયાએ નિર્ધારિત 20 ઓવરમાં 5 વિકેટે 249 રનનો સ્કોર બનાવ્યો હતો. જવાબમાં વેસ્ટઇન્ડીઝની ટીમે 18.3 ઓવરમાં જ 4 વિકેટ ગુમાવીને 252 રન બનાવીને લક્ષ્યાંક પાર કરી લીધો હતો.

આ વિજય સાથે વેસ્ટઇન્ડીઝે ભારત વિરુદ્ધ ટી-20 ક્રિકેટ ઇતિહાસનો સૌથી મોટો સફળ રનચેઝ કરવાનો રેકોર્ડ પોતાના નામે કર્યો છે. અગાઉ આ રેકોર્ડ ઓસ્ટ્રેલિયાના નામે હતો, જેણે 2023માં 223 રનનો ટાર્ગેટ ચેઝ કર્યો હતો.

એક વર્ષમાં 300 કે તેથી વધુ સિક્સર ફટકારનાર વિશ્વની પ્રથમ ટીમ બન્યું ભારત
આ મેચની પ્રથમ ઇનિંગ્સ દરમિયાન ભારતીય બેટ્સમેનોએ કુલ 13 ગગનચુંબી છગ્ગા ફટકાર્યા હતા. આ સાથે જ ટીમ ઇન્ડિયા પુરુષ ક્રિકેટમાં કોઈ એક કેલેન્ડર વર્ષ દરમિયાન સત્તાવાર રીતે 300 કે તેથી વધુ સિક્સર ફટકારનાર વિશ્વની પ્રથમ ‘ફુલ મેમ્બર’ (ટેસ્ટ રમતી) ટીમ બનવાનો અદ્ભુત રેકોર્ડ પોતાના નામે કર્યો છે.

Also Read

Shreyas Iyer : 250 રન બનાવીને પણ ભારત હાર્યું! શ્રેયસ ઐયરે સંજુ સેમસન અને મયંક યાદવના કર્યા વખાણ

ભારતે વર્ષ 2026ના અત્યાર સુધીના ટી-20 ઇન્ટરનેશનલ મુકાબલાઓમાં કુલ 311 છગ્ગા ફટકાર્યા છે. અગાઉ આ રેકોર્ડ પણ ભારતના જ નામે હતો, જ્યારે વર્ષ 2022માં ટીમ ઇન્ડિયાએ 289 સિક્સર ફટકાર્યા હતા.

Also Read

Ex Agniveer Gujarat Police : અગ્નિવીરો માટે ખુશખબર! ગુજરાત પોલીસમાં સીધી ભરતીની જાહેરાત, જાણો કોણ લઈ શકશે લાભ

ટી-20 ઇન્ટરનેશનલ ક્રિકેટમાં માત્ર બીજી વખત બન્યા 500થી વધુ રન
રાંચીના આ રોમાંચક મુકાબલામાં બંને ઇનિંગ્સ મળીને કુલ 501 રન બન્યા હતા. પુરુષ ટી-20 ઇન્ટરનેશનલ ક્રિકેટ ઇતિહાસમાં આ માત્ર બીજો એવો પ્રસંગ છે જ્યારે કોઈ મેચમાં સંયુક્ત રીતે 500 કે તેથી વધુ રન બનાવ્યા હોય. આ યાદીમાં પ્રથમ સ્થાન સાઉથ આફ્રિકા અને વેસ્ટઇન્ડીઝ વચ્ચે 2009માં સેન્ચુરિયન ખાતે રમાયેલી મેચનું છે, જેમાં કુલ 517 રન બન્યા હતા.

આ ઉપરાંત, આ મેચમાં કુલ 79 બાઉન્ડ્રી (46 ચોગ્ગા અને 33 છગ્ગા) વાગ્યા હતા, જે ટી-20 ક્રિકેટના ઇતિહાસમાં સૌથી વધુ બાઉન્ડ્રીના રેકોર્ડની અત્યંત નજીક પહોંચી ગઈ છે.

શા હોપની વિસ્ફોટક સદી અને રેકોર્ડ્સની ઝડી
વેસ્ટઇન્ડીઝની જીતમાં ઓપનર શા હોપે અતિમહત્વપૂર્ણ ભૂમિકા ભજવી હતી. હોપે માત્ર 45 બોલમાં 6 ચોગ્ગા અને 9 છગ્ગાની મદદથી અણનમ 102 રનની ઐતિહાસિક સદી ફટકારી હતી.

આ સાથે જ તે વેસ્ટઇન્ડીઝ માટે ટી-20 ઇન્ટરનેશનલ ક્રિકેટમાં સૌથી ઝડપી સદી ફટકારનારા બેટ્સમેનોમાં બીજા સ્થાને પહોંચી ગયો છે (પ્રથમ સ્થાને 39 બોલ સાથે જોન્સન ચાર્લ્સ છે). શા હોપ ટી-20 આંતરરાષ્ટ્રીય ક્રિકેટમાં બે કે તેથી વધુ સદી ફટકારનાર વેસ્ટઇન્ડીઝનો ત્રીજો બેટ્સમેન બન્યો છે.

આ ઉપરાંત શેરોન રુધરફોર્ડ પણ 37 બોલમાં અણનમ 84 રનની ઇનિંગ રમીને ટીમને વિજય અપાવવામાં મોટો ફાળો આપ્યો હતો.