લાંબા વેકેશન પછી બાળકોની શાળાઓ ફરીથી ખુલી રહી છે અને તેની સાથે જ બાળકોની દિનચર્યા ફરી એકવાર બદલાવા જઈ રહી છે. ગરમી બાદ હાલમાં અનેક સ્થાનો પર વરસાદનો માહોલ છે. આવી ઋતુમાં બાળકો માટે હેલ્ધી અને તાજું લંચબોક્સ પેક કરવું માતા-પિતા માટે એક મોટો પડકાર છે. કાળઝાળ ગરમી અને બીજી બાજુ વરસાદના કારણે ખોરાક ખૂબ ઝડપથી બગડી જાય છે. જો બાળકો આવો બગડેલો ખોરાક ખાય, તો તેમને પેટમાં દુખાવો, ઉલટી, ઝાડા અને ફૂડ પોઈઝનિંગ જેવી ગંભીર સમસ્યાઓ થઈ શકે છે. જો તમે પણ રોજ સવારે તમારા બાળક માટે સ્કૂલ ટિફિન તૈયાર કરો છો, તો લંચબોક્સ પેક કરતી વખતે આ સામાન્ય ભૂલો ટાળવી ખૂબ જ જરૂરી છે.
બાળકોના ટીફીન પેક કરવામાં આ બાબતનું રાખો ધ્યાન
વાસી કે ગઈ રાતનો બચેલો ખોરાક ન આપો : સવારની ઉતાવળમાં ઘણીવાર રાતના બચેલા શાકભાજી, વધેલી રોટલી કે ભાત સવારે વઘારીને ટિફિનમાં આપી દેવામાં આવે છે. સામાન્ય દિવસોમાં કદાચ આ ચાલી જાય, પરંતુ ગરમી અને વરસાદના મિશ્ર દિવસોમાં આ એક મોટી ભૂલ સાબિત થઈ શકે છે. બાળકોને હંમેશા સવારે બનાવેલો તાજો ખોરાક જ આપો. સમય બચાવવા માટે તમે રાત્રે જ શાકભાજી સમારીને એડવાન્સ તૈયારી કરી શકો છો.
ગરમ-ગરમ ખોરાક તરત જ પેક ન કરવો : ઉતાવળમાં ક્યારેક માતાઓ ગરમાગરમ રોટલી કે શાક સીધું જ લંચબોક્સમાં ભરીને બંધ કરી દે છે. આવું કરવાથી બોક્સની અંદર વરાળનો ભેજ જમા થાય છે, જેના કારણે બેક્ટેરિયા ખૂબ ઝડપથી વધે છે અને ખોરાક બગડી જાય છે. ટિફિન બંધ કરતાં પહેલાં ખોરાકને થોડો ઠંડો થવા દો.
ખૂબ વહેલું ભોજન બનાવવાનું ટાળો : જો તમે શાળા શરૂ થવાના ઘણા કલાકો પહેલાં જ રસોઈ બનાવીને પેક કરી દો છો, તો ગરમીમાં તે બપોર સુધીમાં બગડવાની શક્યતા વધી જાય છે. બને ત્યાં સુધી બાળક શાળાએ જાય તેના થોડા સમય પહેલાં જ ટિફિન તૈયાર કરવાનો આગ્રહ રાખો.
દહીં, મેયોનેઝ અને ક્રીમી ફૂડમાં સાવધાની : ઉનાળામાં ડેરી પ્રોડક્ટ્સ જેમ કે દહીં, ક્રીમ, ચીઝ કે મેયોનેઝથી બનેલી વસ્તુઓ ખૂબ જ ઝડપથી ખાટી અથવા ખરાબ થઈ જાય છે. જો તમારે આવી વસ્તુઓ આપવી જ હોય, તો માત્ર ઇન્સ્યુલેટેડ (ઇન્સ્યુલેશનવાળા) લંચબોક્સનો જ ઉપયોગ કરો અને ઓછી માત્રામાં આપો.
કાપેલા ફળો લાંબો સમય ન રાખો : પહેલેથી કાપીને રાખેલા ફળો ગરમીમાં ઓક્સિડાઇઝ થઈ જાય છે, જેથી તેમનો સ્વાદ અને પૌષ્ટિકતા બંને નષ્ટ થાય છે. ટિફિનમાં એવા ફળો આપો જે આખા આપી શકાય (જેમ કે કેળાં કે દ્રાક્ષ), અથવા તો તેને કાપીને સંપૂર્ણપણે એર-ટાઈટ (હવાચુસ્ત) કન્ટેનરમાં જ પેક કરો.
સૂકો અને ભીનો ખોરાક મિક્સ ન કરો : ભારે ગ્રેવીવાળા શાકભાજી સાથે પરાઠા કે સેન્ડવીચ પેક કરવાથી ભેજને કારણે લંચ જલ્દી બગડે છે. ટિફિન માટે સૂકા શાકભાજી, પોહા, ઉપમા, વેજીટેબલ રોલ અથવા સ્ટફ્ડ પરાઠા વધુ સુરક્ષિત અને શ્રેષ્ઠ વિકલ્પો છે.
યોગ્ય લંચબોક્સની પસંદગી અને સ્માર્ટ હેક
ઉનાળાની ઋતુમાં હંમેશા સારી ગુણવત્તાવાળા, એર-ટાઈટ અને ઇન્સ્યુલેટેડ લંચબોક્સનો જ ઉપયોગ કરો જે ખોરાકનું તાપમાન જાળવી રાખે. બાળકના લંચ બોક્સની સાથે બેગમાં એક નાનું ફ્રોઝન જેલ આઈસ પેક (Ice Pack) અથવા બરફના ઠંડા પાણીની બોટલ રાખો. આનાથી લંચ બેગની અંદરનું વાતાવરણ ઠંડુ રહેશે અને બપોરના રિસેસના સમય સુધી ખોરાક બિલકુલ ફ્રેશ રહેશે.
આ પણ વાંચો : Babymoon કેમ થઈ રહ્યું છે ટ્રેન્ડ, માતાપિતા બનતા કપલમાં ફેવરીટ
(Disclaimer: આ માહિતી વાચકોને વધારે વિગતો પુરી પાડવા માટે છે અને આ સંદર્ભમાં વધારે જાણકારી મેળવવા માટે આપ તજજ્ઞોનો સંપર્ક સાધી શકશો. )
Follow Us On Google News
Follow Us On WhatsApp
Follow Us On facebook
Leave a Comment