Gen-Z બાદ હવે Gen-Alphaનો આક્રોશ! 5 રાજ્યોમાં વિદ્યાર્થીઓ રસ્તા પર ઉતર્યા, સરકારો સામે વધતી ચિંતા

ઉત્તર પ્રદેશની રાજધાની લખનઉમાં શાળાના વિદ્યાર્થીઓનો આક્રોશ ફરી એકવાર રસ્તા પર જોવા મળ્યો છે. દુબગ્ગા સ્થિત જયપ્રકાશ નારાયણ સર્વોદય વિદ્યાલયના સેંકડો વિદ્યાર્થીઓએ શિક્ષકોની અછત અને શાળાની ગેરવ્યવસ્થાને લઈને બાલાગંજ ચોકડી પર ચક્કાજામ કરી વિરોધ નોંધાવ્યો હતો. વિદ્યાર્થીઓના આ વિરોધથી લાંબા સમય સુધી વાહનવ્યવહાર પણ ખોરવાયો હતો.

ત્રણ દિવસમાં બીજી વખત વિદ્યાર્થીઓ રસ્તા પર
આ સમગ્ર વિવાદ ત્રણ દિવસ પહેલા શરૂ થયો હતો. શાળામાં શિક્ષકોની અછતને લઈને વિદ્યાર્થીઓએ પ્રથમ વખત વિરોધ નોંધાવ્યો હતો. તે સમયે મંત્રી અસીમ અરૂણ અને વિભાગના ડિરેક્ટર અનુરાગ યાદવે વિદ્યાર્થીઓ સાથે વાતચીત કરી હતી અને ટૂંક સમયમાં શિક્ષકોની નિમણૂક કરવાની ખાતરી આપી હતી. જો, કે ત્રણ દિવસ બાદ પણ પરિસ્થિતિમાં કોઈ ખાસ સુધારો ન થતાં સોમવારે વિદ્યાર્થીઓની ધીરજ ખૂટી ગઈ હતી અને તેઓ ફરી રસ્તા પર ઉતરી આવ્યા હતા.

ચક્કાજામથી વાહનવ્યવહાર ખોરવાયો
વિદ્યાર્થીઓના વિરોધને કારણે દુબગ્ગા અને બાલાગંજ રોડ પર વાહનોની લાંબી કતારો લાગી ગઈ હતી. ઓફિસે જતા લોકો અને અન્ય વાહનચાલકોને પણ મુશ્કેલીનો સામનો કરવો પડ્યો હતો. પોલીસ અને વહીવટી અધિકારીઓ ઘટનાસ્થળે પહોંચ્યા બાદ વિદ્યાર્થીઓને સમજાવવામાં આવ્યા હતા. ત્યારબાદ રસ્તા પરથી ધરણાં સમાપ્ત થયા, પરંતુ વિદ્યાર્થીઓ પોતાની માંગણીઓ લઈને મુખ્યમંત્રી આવાસ તરફ આગળ વધ્યા હતા. પોલીસે બાલાગંજ ચોકડી પાસે તેમને રોક્યા હતા. સવારે લગભગ 10 વાગ્યે અધિકારીઓની ખાતરી બાદ વાહનવ્યવહાર ફરી શરૂ થયો હતો.

Also Read

UPમાં પૂરનો કહેર! પ્રયાગરાજમાં 3 ફૂટ પાણીમાં ઘરો ગરકાવ, ઓડિશામાં 312 વિદ્યાર્થીઓ ફસાયા; બચાવ કામગીરી તેજ

Gen-Alphaનો વિરોધ માત્ર લખનઉ પૂરતો સીમિત નથી
શાળાના બાળકો એટલે કે Gen-Alpha દ્વારા મૂળભૂત સુવિધાઓ અને શિક્ષણ સંબંધિત માંગણીઓને લઈને કરવામાં આવી રહેલા વિરોધના કિસ્સાઓ માત્ર લખનઉ પૂરતા સીમિત નથી રહ્યા. ઉત્તર પ્રદેશના અન્ય જિલ્લાઓ સહિત દેશના વિવિધ રાજ્યોમાંથી પણ આવા વિરોધના અહેવાલો સામે આવ્યા છે.

Also Read

OMG! શુભમન ગિલે એક હાથે અદભુત કેચ પકડ્યો! ‘Superman Shubman’ બની સોશિયલ મીડિયાની ચર્ચા

• હમીરપુર, ઉત્તર પ્રદેશ: વિદ્યાર્થીઓ શાળાએ પહોંચવા માટે પાકી સડકની માંગ કરી રહ્યા છે અને હાથમાં તિરંગો લઈને વિરોધ નોંધાવી રહ્યા છે.
• અલ્વર, રાજસ્થાન: શાળાની જર્જરિત છત પડી ગયા બાદ વિદ્યાર્થીઓ દ્વારા વિરોધ કરવામાં આવ્યો.
• કન્નૌજ, ઉત્તર પ્રદેશ: શાળાના મિડ-ડે મીલની ગુણવત્તા સામે વિદ્યાર્થીઓએ ભોજનનો બહિષ્કાર કર્યો.
• બિહાર, મધ્ય પ્રદેશ અને મહારાષ્ટ્ર: વિદ્યાર્થીઓ પંખા, પીવાનું સ્વચ્છ પાણી, શૌચાલય, બસ ભાડામાં રાહત અને શિક્ષકોની નિમણૂક જેવી મૂળભૂત સુવિધાઓ માટે અવાજ ઉઠાવી રહ્યા છે.