ફાયરિંગથી ધ્રૂજી ઊઠ્યું કડોદરા! બે જૂથો વચ્ચે ખૂની ખેલ, ચપ્પુના હુમલાથી દોડધામ

સુરત શહેરના કડોદરા વિસ્તારમાં આવેલી ક્રિષ્ના નગર સોસાયટીમાં ગત રાત્રે બે અસામાજિક જૂથો વચ્ચે હિંસક અને લોહિયાળ અથડામણ સર્જાઈ હતી. જાહેર વિસ્તારમાં થયેલા આ હુમલાના કારણે સ્થાનિક રહીશોમાં ભારે અફરાતફરી અને ભયનો માહોલ ફેલાઈ ગયો હતો. ઘટનાની જાણ થતાં જ પોલીસ કાફલો સ્થળ પર પહોંચી ગયો હતો.

અજય બાદશાહ અને સાહીલના જૂથ વચ્ચે હુમલો
સ્થાનિક લોકો અને મળતી વિગતો અનુસાર અજય બાદશાહ અને સાહીલ મકવાણા સાથે સંકળાયેલા જૂથોના માણસો સામસામે આવી ગયા હતા. સામાન્ય બાબતે શરૂ થયેલી તકરારે જોતજોતામાં ઉગ્ર સ્વરૂપ ધારણ કરી લીધું હતું. બંને પક્ષે તીક્ષ્ણ હથિયારો અને બંદૂક જેવા ઘાતક શસ્ત્રોનો ખુલ્લેઆમ ઉપયોગ થતાં સમગ્ર વિસ્તારમાં સન્નાટો વ્યાપી ગયો હતો.

ગોળીબારમાં એક યુવક ગંભીર રીતે ઘાયલ
આ લોહિયાળ ઝઘડા દરમિયાન અચાનક થયેલા ગોળીબારમાં નયન પાટીલ નામના વ્યક્તિના પગમાં ગોળી વાગી હતી. ગોળી વાગતાં જ યુવક ઢળી પડ્યો હતો, જેને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યો છે. જાહેર રસ્તા પર બંદૂકમાંથી ગોળીઓ છૂટતાં લોકો પોતાના ઘરના દરવાજા બંધ કરવા મજબૂર બન્યા હતા.

Also Read

મહેસાણામાં ‘મિર્ઝાપુર’ જેવી ગેંગવોર! સ્કોર્પિયો સવારોએ ફોર્ચ્યુનરને ટક્કર મારી ફાયરિંગ, ભાવેશ ઝીલિયા ઘાયલ

ચપ્પુના ઘા વાગતા અન્ય બે લોકો લોહીલુહાણ
અથડામણ દરમિયાન માત્ર બંદૂક જ નહીં પરંતુ તીક્ષ્ણ ચપ્પુ વડે પણ સામસામે હુમલા કરવામાં આવ્યા હતા. આ હુમલામાં અજય બાદશાહ અને કાલુ ઉર્ફે સંતોષ જયસવાલ ગંભીર રીતે ઈજાગ્રસ્ત થયા છે. શરીર પર ચપ્પુના ઊંડા ઘા વાગવાના કારણે બંનેને તાત્કાલિક ધોરણે સારવાર માટે સુરતની હોસ્પિટલમાં દાખલ કરવામાં આવ્યા છે.

Also Read

ઝોમેટો પર તુકારામ મુંઢેનો કડક એક્શન! ‘એનાલોગ પનીર’વાળી વાનગીઓ એપ પરથી હટાવી

પોલીસ કાર્યવાહી અને એક શખ્સની અટકાયત
ઘટના અંગેની જાણ થતાં જ કડોદરા પોલીસનો કાફલો ઘટનાસ્થળે દોડી આવ્યો હતો અને પરિસ્થિતિ પર કાબૂ મેળવ્યો હતો. પોલીસે ત્વરિત કાર્યવાહી કરીને સાહીલ મકવાણાની અટકાયત કરી લીધી છે. જોકે, હુમલામાં સામેલ પીન્કેશ નામનો શખ્સ સ્થળ પરથી ભાગી છૂટવામાં સફળ રહ્યો હોવાથી પોલીસ તેની શોધખોળ ચલાવી રહી છે.