– યુપીના શાહજહાંપુરમાં નીટમાં નિષ્ફળ યુવકનું વિચિત્ર કારસ્તાન
– બ્રિગેડિયર જેવો ડ્રેસ-કેપ, વૈભવી કાર, ડ્રાઇવર અને એનએસજી કમાન્ડો જેવા લાગતા બે ગાર્ડ રાખ્યા હતા
નવી દિલ્હી : આજકાલ દેશમાં ફેક અધિકારીઓની ખૂબ ચર્ચાઓ છે. અત્યાર સુધી ફેક પોલીસ અધિકારીઓ કે ફેક જજો પકડવાના કિસ્સા ઘણા સામે આવ્યા છે. જોકે હવે સૈન્યના ફેક અધિકારી બનીને લોકોને મુર્ખ બનાવનારો એક મહાઠગ ઝડપાયો છે. ઉત્તર પ્રદેશના શાહજહાંપુરમાં સૈન્યના ફેક બ્રિગેડિયર બનીને ફરતો ૨૧ વર્ષીય યુવક ઝડપાયો છે. આર્યન વર્મા નામનો આ યુવક કેમ ફેક અધિકારી બનીને ફરતો હતો તેનું જે કારણ જણાવ્યું તે પણ આશ્ચર્યજનક છે.
આ સમગ્ર મામલો ઉત્તર પ્રદેશના શાહજહાંપુરનો છે, અહીંયા સૈન્યના બ્રિગેડિયરનો ફેક ડ્રેસ પહેરીને ફરતો ૨૧ વર્ષીય યુવક આર્યન વર્મા ઝડપાયો હતો. પોલીસે જ્યારે તેની પૂછપરછ કરી તો તેણે વિચિત્ર કારણ આપ્યું હતું. આર્યને જણાવ્યું હતું કે મે નીટની પરીક્ષા આપવા પ્રયાસ કર્યો હતો પણ સફળતા ના મળી. મારી માને હ્ય્દયની બીમારી છે, તેને સાંત્વના આપવા માટે મે જુઠ બોલ્યું કે મારી પસંદગી આર્મ્ડ ફોર્સિસ મેડિકલ કોલેજ એએફએમસીમાં ડોક્ટર તરીકે થઇ ગઇ છે.
આર્યન વર્માએ પોતાના આ જુઠને નાટકનું સ્વરુપ આપવા માટે સૈન્યના બ્રિગેડિયરનો ફેક ડ્રેસ પહેર્યો, ભાડેથી ગાર્ડ રાખ્યા અને કારનો ડ્રાવર પણ રાખ્યો. જોકે આ ફેક બ્રિગેડિયર હોવાની જાણકારી સૈન્યના પૂર્વ જવાનોને મળી ગઇ હતી. બાદમાં તેમણે પોલીસને જાણ કરતા અંતે યુવકની અટકાયત કરીને પૂછપરછ કરવામાં આવી હતી. આ યુવકની પાસે તો બધુ ફેક હતું જ તેના ડ્રાઇવર પાસેથી ભારત સરકારનું ઓળખપત્ર મળી આવ્યું છે. જ્યારે બન્ને ગાર્ડ પોતાને એનએસજી કમાન્ડો તરીકે દર્શાવવા પ્રયાસ કરી રહ્યા હતા. આ યુવકને પૂર્વ જવાનોએ તાલિમ આપવા માટે બોલાવ્યો હતો જ્યાં તે ઝડપાઇ ગયો હતો. માત્ર ૨૧ વર્ષની ઉંમરે સૈન્યના બ્રિગેડિયર બનવું લગભગ અશક્ય છે. આ શંકા જતા જ યુવકનો ભાંડો ફૂટયો હતો. યુવકની પાસેથી નકલી ડ્રેન, નકલી પિસ્તોલ, નકલી ઓળખકાર્ડ મળી આવ્યા છે.
Follow Us On Google News
Follow Us On WhatsApp
Follow Us On facebook
Leave a Comment