આ દરમિયાન વૉઇસ ઓવરમાં રામને દેવ નહીં, પરંતુ માનવતાની આશા તરીકે રજૂ કરવામાં આવ્યા છે. ફિલ્મના બીજા ટ્રેલરને લઈને પણ દર્શકોમાં ઉત્સુકતા વધી છે. અહેવાલો અનુસાર, 15 ઓક્ટોબરથી ફિલ્મનું આંતરરાષ્ટ્રીય પ્રમોશન શરૂ થઈ રહ્યું છે અને બેંગલુરુમાં ભવ્ય કાર્યક્રમ દરમિયાન બીજું ટ્રેલર રિલીઝ કરવાની તૈયારી છે.
નવા પ્રોમોમાં દેવરાજ ઇન્દ્ર અને રાવણ વચ્ચે જંગ
બુધવારે સામે આવેલા ટીવી સ્પોટમાં અભિનેતા કુણાલ કપૂર દેવરાજ ઇન્દ્રના પાત્રમાં જોવા મળે છે. પ્રોમોમાં ઇન્દ્ર અને રાવણ વચ્ચે જોરદાર યુદ્ધ દર્શાવવામાં આવ્યું છે. રાવણ દેવરાજ ઇન્દ્રના દિવ્ય વાહન એરાવતને જમીન પર પટકી દે છે અને કહે છે,
‘મારી સમક્ષ દરેક મસ્તક નમશે.’ આ દૃશ્ય સાથે વૉઇસ ઓવરમાં સંભળાય છે કે એવા સમયમાં, જ્યારે મનુષ્યો દેવતાઓની દુનિયામાં રહેતા હતા, ત્યારે અંધકારમાંથી અધર્મનો ઉદય થયો હતો. ત્યારબાદ પ્રોમોમાં એક સંવાદ સંભળાય છે, જેમાં રામને દેવ નહીં, પરંતુ માનવતાની એકમાત્ર આશા તરીકે રજૂ કરવામાં આવે છે.
‘હું નહીં રોકું તો આખી દુનિયાનો વિનાશ થશે’
પ્રોમોમાં રણબીર કપૂરની રામ તરીકેની ઝલક પણ જોવા મળે છે. તેઓ કહે છે, ‘જો હું તેને નહીં રોકું, તો આખી દુનિયાનો વિનાશ થઈ જશે.’ આ સંવાદ સાથે ફિલ્મની ભવ્યતા અને રામ-રાવણના સંઘર્ષની ઝલક રજૂ કરવામાં આવી છે.
પ્રોમોના અંતમાં ‘આ તો માત્ર શરૂઆત છે’ એવો સંદેશ આપવામાં આવે છે અને ફિલ્મનું આંતરરાષ્ટ્રીય ટાઇટલ ‘રામાયણ: ધ રાઇઝ ઓફ અ લેજન્ડ’ દર્શાવવામાં આવે છે.
બેંગલુરુમાં બીજા ટ્રેલરનું ભવ્ય લોન્ચિંગ
ફિલ્મનું બીજું ટ્રેલર બેંગલુરુમાં એક ભવ્ય કાર્યક્રમ દરમિયાન રજૂ કરવાની તૈયારી છે. આ ઇવેન્ટમાં રણબીર કપૂર, યશ, સાઈ પલ્લવી, દિગ્દર્શક નિતેશ તિવારી અને પ્રોડ્યુસર નમિત મલ્હોત્રા સહિતના કલાકારો તથા ફિલ્મમેકર્સ હાજર રહેવાની શક્યતા છે.
જોકે, ટ્રેલર રિલીઝનો ચોક્કસ સમય જાહેર કરવામાં આવ્યો હોવાની માહિતી નથી. આ પહેલાં ફિલ્મનું પ્રથમ ટ્રેલર નવી દિલ્હીમાં રજૂ કરવામાં આવ્યું હતું. હવે બેંગલુરુમાં કાર્યક્રમ યોજવાનો હેતુ દક્ષિણ ભારતના દર્શકો સુધી પણ ફિલ્મનું પ્રમોશન પહોંચાડવાનો હોવાનું અહેવાલોમાં જણાવાયું છે.
Follow Us On Google News
Follow Us On WhatsApp
Follow Us On facebook