હવામાન વિભાગ દ્વારા અમદાવાદ શહેરમાં ભારેથી અતિભારે વરસાદની આગાહી સાથે રેડ એલર્ટ જાહેર કરવામાં આવ્યું છે. વિદ્યાર્થીઓની સુરક્ષાને પ્રાથમિકતા આપતા જિલ્લા કલેક્ટરના માર્ગદર્શન હેઠળ 31 જુલાઈ, 2026ના રોજ અમદાવાદ શહેરની તમામ શાળા અને કોલેજોમાં શૈક્ષણિક કામગીરી બંધ રાખીને રજા જાહેર કરવામાં આવી છે.
પૂર્વ અને પશ્ચિમ વિસ્તારની તમામ શૈક્ષણિક સંસ્થાઓમાં રજા
જિલ્લા શિક્ષણાધિકારી (DEO) દ્વારા આપવામાં આવેલી માહિતી મુજબ, આ નિર્ણય અમદાવાદ શહેરના પૂર્વ અને પશ્ચિમ બંને વિસ્તારોની તમામ શૈક્ષણિક સંસ્થાઓ માટે લાગુ પડશે.
આદેશ હેઠળ નીચેની તમામ સંસ્થાઓમાં શૈક્ષણિક કામગીરી બંધ રહેશે:
– તમામ સરકારી શાળાઓ
– અનુદાનિત (ગ્રાન્ટેડ) શાળાઓ
– સ્વનિર્ભર (પ્રાઇવેટ) શાળાઓ
– પ્રાથમિક, માધ્યમિક અને ઉચ્ચતર માધ્યમિક શાળાઓ
– અધ્યાપન મંદિરો
– તમામ કોલેજો
વાલીઓ અને વિદ્યાર્થીઓને તાત્કાલિક જાણ કરવા સૂચના
જિલ્લા વહીવટી તંત્ર અને જિલ્લા શિક્ષણાધિકારીએ તમામ શાળા અને કોલેજોના આચાર્યો તથા સંચાલકોને રજા અંગેની માહિતી વાલીઓ, વિદ્યાર્થીઓ અને શિક્ષકો સુધી તાત્કાલિક પહોંચાડવા સૂચના આપી છે.
વોટ્સએપ, SMS અથવા અન્ય ઉપલબ્ધ માધ્યમો દ્વારા અધિકૃત માહિતી પહોંચાડવાની તાકીદ કરવામાં આવી છે. સાથે જ લોકોને અફવાઓથી દૂર રહેવા અને માત્ર જિલ્લા તંત્ર તથા હવામાન વિભાગ દ્વારા જાહેર કરવામાં આવતી અધિકૃત સૂચનાઓનું જ પાલન કરવા અપીલ કરવામાં આવી છે.
વડોદરામાં પણ શાળા-કોલેજો બંધ
ભારે વરસાદની આગાહીને ધ્યાનમાં રાખીને વડોદરા શહેર અને જિલ્લામાં પણ 31 જુલાઈના રોજ તમામ આંગણવાડીઓ, શાળાઓ અને કોલેજોમાં રજા જાહેર કરવામાં આવી છે.
જિલ્લા કલેક્ટરે જાહેરનામું બહાર પાડીને તમામ શૈક્ષણિક સંસ્થાઓને આદેશનું પાલન કરવાની સૂચના આપી છે. આદેશનો ભંગ કરનાર સંસ્થાઓ સામે નિયમ મુજબ કાર્યવાહી કરવામાં આવશે તેવી પણ ચેતવણી આપવામાં આવી છે.
ઉલ્લેખનીય છે કે, ભારે વરસાદની આગાહીને કારણે ગત સપ્તાહે પણ વડોદરા શહેર અને જિલ્લામાં બે દિવસ માટે શાળાઓ બંધ રાખવાનો નિર્ણય લેવામાં આવ્યો હતો.
Follow Us On Google News
Follow Us On WhatsApp
Follow Us On facebook
Leave a Comment