કુબેરનગરમાં પશુ માંસની તસ્કરી પર્દાફાશ: રિક્ષાની સીટ નીચે છુપાવેલો જથ્થો ઝડપાયો

અમદાવાદના કુબેરનગર વિસ્તારમાં રિક્ષામાં છુપાવીને કરવામાં આવતી પશુ માંસની હેરાફેરીનો ચોંકાવનારો કિસ્સો સામે આવ્યો છે. સ્થાનિક ગૌરક્ષકોએ બાતમીના આધારે પશુ માંસ ભરેલી રિક્ષાને ઝડપી પાડી હતી. આ ઘટના દરમિયાન ઉશ્કેરાયેલા ટોળા અને ગૌરક્ષકોએ રિક્ષાચાલકને ઢોર માર મારતા સમગ્ર વિસ્તારમાં ચકચાર મચી ગઈ છે. હાલમાં સરદારનગર પોલીસે આ મામલે પશુ માંસનો જથ્થો જપ્ત કરી કાયદેસરની તપાસ હાથ ધરી છે.

કેવી રીતે ઝડપાઈ રિક્ષા?

ઘટનાની વિગતો મુજબ, સ્થાનિક ગૌરક્ષકોને અગાઉથી એક ચોક્કસ બાતમી મળી હતી કે કુબેરનગર વિસ્તારમાંથી એક રિક્ષા પસાર થવાની છે, જેમાં મોટા પ્રમાણમાં પશુ માંસની હેરાફેરી કરવામાં આવી રહી છે. આ બાતમીના આધારે ગૌરક્ષકોએ કુબેરનગરના મુખ્ય માર્ગ પર વોચ ગોઠવી હતી. દરમિયાન, બાતમી મુજબની શંકાસ્પદ રિક્ષા ત્યાંથી પસાર થતા જ ગૌરક્ષકોએ તેને આંતરી હતી.

શરૂઆતમાં રિક્ષાચાલકે સામાન્ય મુસાફર હોવાનો ડોળ કર્યો હતો, પરંતુ જ્યારે રિક્ષાની જીણવટભરી તપાસ કરવામાં આવી ત્યારે ચોંકાવનારી વિગતો બહાર આવી હતી. તસ્કરી માટે રિક્ષામાં ખાસ પ્રકારના ખાના બનાવવામાં આવ્યા હતા. ડ્રાઇવર સીટની નીચે અને રિક્ષાના પાછળના ભાગે સીટની અંદર છુપાવીને રાખવામાં આવેલો પશુ માંસનો મોટો જથ્થો મળી આવ્યો હતો. કાપેલી હાલતમાં રહેલા માંસના ટુકડાઓ જોઈને ગૌરક્ષકો અને ત્યાં એકઠા થયેલા સ્થાનિકોમાં ભારે રોષ ફેલાયો હતો.

રિક્ષામાંથી પશુ માંસનો જથ્થો પકડાતા જ મામલો ગરમાયો હતો. હેરાફેરી કરનાર રિક્ષાચાલકને પકડીને ત્યાં હાજર લોકોએ પૂછપરછ શરૂ કરી હતી, જે દરમિયાન લોકોનો ગુસ્સો સાતમા આસમાને પહોંચ્યો હતો. ગૌરક્ષકો અને સ્થાનિકોએ રિક્ષાચાલકને રસ્તા પર જ ઢોર માર મારવાનું શરૂ કર્યું હતું. આ હુમલામાં રિક્ષાચાલકને શરીર અને મોઢાના ભાગે ગંભીર ઈજાઓ પહોંચી હતી અને તે લોહીલુહાણ થઈ ગયો હતો.

ઘટનાની જાણ થતા જ સરદારનગર પોલીસનો કાફલો તાત્કાલિક સ્થળ પર દોડી આવ્યો હતો. પોલીસે પરિસ્થિતિ પર કાબૂ મેળવી ઇજાગ્રસ્ત રિક્ષાચાલકને ટોળામાંથી છોડાવ્યો હતો. તેની હાલત ગંભીર હોવાથી પોલીસે તેને તાત્કાલિક સારવાર માટે અમદાવાદની સિવિલ હોસ્પિટલ ખાતે ખસેડ્યો છે. બીજી તરફ, અકસ્માત અને હિંસાની આશંકાને જોતા પોલીસે વિસ્તારમાં ચુસ્ત બંદોબસ્ત ગોઠવી દીધો હતો.