CJ Chavda Audio Clip Viral: મહેસાણા જિલ્લા ભાજપમાં યાદવાસ્થળી બરોબર જામી છે. સ્થાનિક નેતાઓ એકબીજાની રાજકીય કારકિર્દી ખરડવા મેદાને પડ્યાં છે. વિજાપુરના ભાજપના ધારાસભ્ય સી.જે.ચાવડાની કથિત ઓડિયો ક્લિપ વાઈરલ થઈ છે. જેમાં તેઓ એવું કબૂલી રહ્યાં છે કે, ‘જ્યારે હું વિધાનસભાની ચૂંટણી લડ્યો, ત્યારે કોંગ્રેસમાંથી ભાજપમાં આવ્યો હતો એટલે મને બે કરોડ આપ્યા હતા. પક્ષ પલટાના બદલામાં જ નહીં, પણ ચૂંટણી લડવા માટે પણ કરોડો રૂપિયાનું ફંડિંગ આપવામાં આવી રહ્યું છે.’ આ સ્ફોટક વાતોને લઈને રાજકારણ ગરમાયુ છે.
પૂર્વ નાયબ મુખ્યમંત્રી, સાંસદ મયંક નાયક બાદ હવે સી. જે. ચાવડાની ઓડિયો ક્લિપથી પ્રદેશ નેતાગીરી ચિંતિત
સ્થાનિક સ્વરાજ્યની ચૂંટણી બાદ મહેસાણા જિલ્લામાં ભાજપમાં આંતરિક જૂથવાદ ચરમસીમાએ પહોંચ્યુ છે. આ જ સપ્તાહમાં પૂર્વ નાયબ મુખ્યમંત્રી નીતિન પટેલની રાજકીય કારકિર્દી પતાવી દીધી છે તેવો દાવો કરતાં કોર્પોરેટર ચંદ્રકાંત પટેલની ઓડિયો ક્લિપે હંગામો મચાવી દીધો છે. આ મામલો હજુ શાંત પડ્યો નથી ત્યાં રાજ્યસભાના સભ્ય મયંક નાયક તો ઝીરો છે તેવી ઓડિયો ક્લિપે સ્થાનિક રાજકારણમાં હલચલ મચાવી દીધી છે.
હવે વિજાપુરના ધારાસભ્ય સી.જે.ચાવડાની એક કથિત ઓડિયો ક્લિપ સોશિયલ મીડિયા પર વાઈરલ થતાં રાજકીય ગલિયારીમાં ચર્ચાનો વિષય બન્યો છે. આ ઓડિયો ક્લિપમાં ચૂંટણી વખતે મતદારોને રીઝવવા માટે પક્ષ દ્વારા અપાતા રૂપિયાને લઈને ભાજપના ધારાસભ્ય કબૂલાત કરી રહ્યાં છે. ધારાસભ્ય સી.જે.ચાવડા એવું કહેતા સંભળાય છે કે, ‘હું જ્યારે વિધાનસભાની ચૂંટણી લડ્યો, ત્યારે કોંગ્રેસમાંથી ભાજપમાં આવ્યો હતો. આ કારણોસર (પક્ષપલટાને લીધે) મને બે કરોડ રૂપિયા આપ્યા હતા.’
બાકી સામાન્ય રીતે પક્ષ દ્વારા પચાસ લાખથી વધુ કોઈને એક પૈસોય અપાતો નથી. એવું અનુમાન કરવામાં આવી રહ્યું છે કે, સ્થાનિક સ્વરાજ્યની ચૂંટણીના વખતની આ ઓડિયો ક્લિપ હોઈ શકે છે. આ ઓડિયો ક્લિપે ભાજપની આંતરિક યાદવાસ્થળીને ખુલ્લી પાડી છે. એટલું જ નહીં, ભાજપના નેતાઓની એક પછી એક ઓડિયો ક્લિપ વાયરલ થતાં પ્રદેશ નેતાગીરીની પણ ચિંતા વધી છે.
Follow Us On Google News
Follow Us On WhatsApp
Follow Us On facebook
Leave a Comment