જુનાગઢમાં ભારે પવન અને વરસાદ, Girnar Ropeway સતત ત્રીજા દિવસે બંધ

જુનાગઢ અને ગિરનાર પર્વત વિસ્તારમાં છેલ્લા કેટલાક દિવસોથી વરસાદી વાતાવરણ છે. ગિરનાર પર્વત પર વાદળછાયું વાતાવરણ છવાયેલું છે અને ધીમી ધારે વરસાદ વરસી રહ્યો છે. આ ઉપરાંત, પર્વતીય વિસ્તારમાં ફૂંકાતા ભારે પવનના કારણે રોપ-વેની કેબિનોનું સંચાલન કરવું અત્યંત મુશ્કેલ બની ગયું છે.

• વાતાવરણમાં સુધારો થયા બાદ રોપ-વે ફરીથી શરૂ કરવામાં આવશે

ખરાબ વાતાવરણ અને ભારે પવનની આ સ્થિતિને ધ્યાનમાં રાખીને રોપ-વે મેનેજમેન્ટે પ્રવાસીઓની સુરક્ષાને ધ્યાનમાં રાખીને તેને બંધ રાખવાનો નિર્ણય લીધો છે. આજે, સતત ત્રીજા દિવસે પણ રોપ-વે બંધ રહ્યો હતો. તંત્રએ સ્પષ્ટ કર્યું છે કે વાતાવરણમાં સુધારો થયા બાદ અને સલામત સ્થિતિ સામાન્ય થયા પછી જ રોપ-વે ફરીથી શરૂ કરવામાં આવશે.

• પગથિયાં ચઢીને શિખરે: શ્રદ્ધાળુઓનો અખૂટ ઉત્સાહ

રોપ-વે બંધ હોવા છતાં, ગિરનાર પ્રત્યે શ્રદ્ધાળુઓનો ઉત્સાહ સહેજ પણ ઓછો થયો નથી. મોટી સંખ્યામાં શ્રદ્ધાળુઓએ રોપ-વેની સુવિધા ન મળવા છતાં, પગથિયાં ચઢીને ગિરનાર પર્વત પર પહોંચવાનું ચાલુ રાખ્યું હતું.