Gujarat Traffic Police Fine Collection: ગુજરાતમાં માર્ગ અકસ્માતોનું પ્રમાણ ઘટાડવા અને વાહનચાલકોમાં સુરક્ષા પ્રત્યે જાગૃતિ લાવવા માટે 1 મે થી 31 મે દરમિયાન રાજ્યવ્યાપી વિશેષ ‘હેલ્મેટ ડ્રાઇવ’નું આયોજન કરવામાં આવ્યું હતું. એક મહિના સુધી ચાલેલી આ ઝુંબેશ દરમિયાન સ્ટેટ ટ્રાફિક બ્રાન્ચ દ્વારા રાજ્યભરમાં નિયમોનું ઉલ્લંઘન કરનારા કુલ 1.88 લાખથી વધુ વાહનચાલકો સામે દંડનીય કાર્યવાહી કરવામાં આવી છે. આ સમગ્ર ડ્રાઈવ દરમિયાન નિયમભંગ કરનારાઓ પાસેથી કુલ રૂ. 5.21 કરોડની માતબર રકમનો દંડ વસૂલ કરવામાં આવ્યો છે.
સરકારી બાબુઓ સામે પણ કડક કાર્યવાહી
આ વિશેષ ઝુંબેશ દરમિયાન સામાન્ય નાગરિકોની સાથે સાથે સરકારી અધિકારીઓ અને કર્મચારીઓને પણ ટ્રાફિકનો પાઠ ભણાવવામાં આવ્યો હતો. રાજ્યની વિવિધ સરકારી કચેરીઓના પ્રવેશદ્વારે જ ટ્રાફિક પોલીસ તૈનાત કરીને ચેકિંગ હાથ ધરવામાં આવ્યું હતું. જેમાં હેલ્મેટ વગર ઓફિસે આવતા 5,123 સરકારી અધિકારીઓ અને કર્મચારીઓ ઝડપાયા હતા, જેમની પાસેથી કુલ રૂ. 16.58 લાખનો દંડ વસૂલ કરવામાં આવ્યો હતો.
દંડ નહીં, સુરક્ષા અને જાગૃતિ મુખ્ય હેતુ
પોલીસ તંત્રના જણાવ્યા અનુસાર, આ ડ્રાઈવનો મુખ્ય હેતુ માત્ર દંડ વસૂલવાનો નથી, પરંતુ નાગરિકોની જિંદગી બચાવવાનો અને માર્ગ સુરક્ષા સુનિશ્ચિત કરવાનો છે. વાહનચાલક તેમજ પાછળ બેસનાર વ્યક્તિ માત્ર પોલીસના ડર કે આર્થિક દંડથી બચવા માટે નહીં, પરંતુ પોતાના પરિવારની સુરક્ષા માટે હેલ્મેટ અને સીટ બેલ્ટનો નિયમિત ઉપયોગ કરે તે અત્યંત જરૂરી છે. માર્ગ સુરક્ષાને માત્ર સરકારી તંત્રની નહીં પરંતુ સમાજની સામૂહિક જવાબદારી ગણાવવામાં આવી છે.
ઘણી જગ્યાએ દંડના બદલે ગુલાબ અને હેલ્મેટ પણ અપાયા
માર્ગ અકસ્માતોના અનેક કિસ્સાઓમાં જોવા મળ્યું છે કે હેલ્મેટના કારણે વાહનચાલકોના જીવ બચી જતા હોય છે, જ્યારે હેલ્મેટ ન પહેરવાના કારણે પરિવારોએ કાયમી આઘાત સહન કરવો પડે છે. આ બાબતને ધ્યાનમાં રાખીને વહીવટી તંત્ર દ્વારા માત્ર દંડ આપવા પર જ ભાર નથી મુકાયો. ડ્રાઈવ દરમિયાન પ્રશાસન દ્વારા અવારનવાર એવા પણ પ્રયોગો કરાયા હતા જેમાં નિયમભંગ કરનારા વાહનચાલકોને દંડ કરવાને બદલે ગુલાબનું ફૂલ અથવા હેલ્મેટ આપીને ટ્રાફિક નિયમોનું મહત્વ સમજાવવામાં આવ્યું હતું, જેથી નાગરિકોમાં ટ્રાફિક સેન્સ કેળવી શકાય.
Follow Us On Google News
Follow Us On WhatsApp
Follow Us On facebook
Leave a Comment