દીપક ચહરના પિતા લોકેન્દ્ર ચહર આગ્રામાં ક્રિકેટ એકેડમી ચલાવે છે. અહેવાલો અનુસાર દીપક ત્યાં પ્રેક્ટિસ માટે ગયા હતા. તેમણે પોતાની કિટ એક જગ્યાએ રાખી હતી અને પ્રેક્ટિસ શરૂ કરી હતી. લગભગ એક કલાક બાદ જ્યારે તેઓ બેટિંગ પ્રેક્ટિસ માટે પોતાના બેટ લેવા ગયા ત્યારે ત્રણેય બેટ ગાયબ હોવાનું જાણવા મળ્યું. આ ત્રણેય બેટ ખાસ ‘પ્લેયર એડિશન’ના હોવાનું જણાવાયું છે.
ત્રણ બેટની કિંમત આશરે ₹1.5 લાખ
સોશિયલ મીડિયા પર શેર કરેલા વીડિયોમાં દીપક ચહરે કહ્યું કે તેમના ત્રણ બેટ ખૂબ મોંઘા હતા અને તેની કુલ કિંમત લગભગ ₹1.5 લાખ છે. તેમણે ચોરને સંબોધીને કહ્યું કે કદાચ તેને બેટની વાસ્તવિક કિંમતની જાણ નહીં હોય. સાથે જ તેમણે અપીલ કરી કે જો પૈસાની જરૂર હતી તો તેમની પાસે માગ્યા હોત, તેઓ મદદ કરી શક્યા હોત. દીપકે ચોરને બેટ પરત કરવા વિનંતી કરી અને કહ્યું કે તે બેટ પાછા મળી જાય તો આ મામલો આગળ ન વધારવા માટે પણ તેઓ તૈયાર છે.
‘પોલીસ, યોગીજી કે મોદીજી પાસે જાઉં?’
બેટ ચોરીની ઘટના અંગે દીપક ચહરે રમૂજી અંદાજમાં કહ્યું કે હવે તેમની પાસે થોડા વિકલ્પો જ બચ્યા છે. તેમણે સવાલ કર્યો કે તેઓ પોલીસ પાસે જાય, ઉત્તર પ્રદેશના મુખ્યમંત્રી યોગી આદિત્યનાથ પાસે જાય કે પછી વડાપ્રધાન નરેન્દ્ર મોદી પાસે જાય. અંતે તેમણે ભગવાનને પ્રાર્થના કરવાની વાત પણ કરી અને ચોરને બેટ પરત કરવાની અપીલ કરી. તેમના આ વીડિયો બાદ સોશિયલ મીડિયા પર પણ ચર્ચા શરૂ થઈ છે.
2026માં મુંબઈ ઇન્ડિયન્સ તરફથી રમ્યા
દીપક ચહર છેલ્લા કેટલાક સમયથી ભારતીય ટીમની બહાર છે. જોકે, 2026ની IPL સીઝનમાં તેઓ મુંબઈ ઇન્ડિયન્સ તરફથી રમ્યા હતા. IPLના સત્તાવાર રેકોર્ડ મુજબ 2026ની સીઝનમાં તેમણે મુંબઈ ઇન્ડિયન્સ માટે 8 મેચમાં 8 વિકેટ લીધી હતી. આંતરરાષ્ટ્રીય ક્રિકેટમાં તેમણે ભારત માટે 13 ODIમાં 16 વિકેટ અને 25 T20Iમાં 31 વિકેટ ઝડપી છે.
Follow Us On Google News
Follow Us On WhatsApp
Follow Us On facebook