Mithun with Rajinikanth: 30 વર્ષ પછી મિથુન અને રજનીકાંત સાથે દેખાશે, જાણો કેવી રીતે થઈ ‘જેલર 2’માં એન્ટ્રી
પીઢ અભિનેતા મિથુન ચક્રવર્તી 75 વર્ષની ઉંમરે પણ ફિલ્મોમાં સતત સક્રિય છે. તેઓ ટૂંક સમયમાં વિવેક અગ્નિહોત્રીની આગામી ફિલ્મ ‘ધ બંગાલ ફાઇલ્સ’માં જોવા મળશે.
આ ઉપરાંત મિથુન ચક્રવર્તી પાસે સાઉથના સુપરસ્ટાર રજનીકાંતની ફિલ્મ ‘જેલર 2’ પણ પાઇપલાઇનમાં છે. આ અંગે લાંબા સમયથી ચર્ચા ચાલી રહી હતી. હવે મિથુન ચક્રવર્તીએ આ ચર્ચાઓ પર પૂર્ણવિરામ મૂકી દીધું છે અને જણાવ્યું છે કે તેઓ રજનીકાંત સાથે ફિલ્મ ‘જેલર 2’માં જોવા મળશે.
ટૂંક સમયમાં જેલર 2 નું શૂટિંગ શરૂ થશે
મિથુન ચક્રવર્તીએ કહ્યું, “રજની સાથે મારી મિત્રતા ખૂબ જૂની છે. અમે અલગ અલગ ભાષાઓ અને ઇન્ડસ્ટ્રીમાંથી આવીએ છીએ, પરંતુ હંમેશા હૃદયથી જોડાયેલા છીએ. તાજેતરમાં અમે એક કાર્યક્રમમાં મળ્યા હતા.
રજનીએ મજાકમાં કહ્યું કે હવે આપણે સાથે કંઈક કરવું જોઈએ. મેં તરત જ હા પાડી દીધી. આ ફક્ત એક ફિલ્મ નથી પણ બે મિત્રોની મુલાકાત છે. જરા કલ્પના કરો, જ્યારે રજની અને મિથુન એકસાથે સ્ક્રીન પર દેખાશે, ત્યારે તે દર્શકો માટે કોઈ ઉત્સવથી ઓછું નહીં હોય.
અમે આ મહિનાની 25મી તારીખથી શૂટિંગ શરૂ કરી રહ્યા છીએ. મને ખાતરી છે કે આ ફિલ્મ લોકોને મનોરંજનની સાથે યાદગાર અનુભવ પણ આપશે.”
30 વર્ષ પહેલા એક બંગાળી ફિલ્મમાં સાથે જોવા મળ્યા
રજનીકાંત અને મિથુન લગભગ 30 વર્ષ પછી સાથે જોવા મળવાના છે. બંને છેલ્લે 1995માં બંગાળી ભાષાની ફિલ્મ ‘ભાગ્ય દેવતા’માં સાથે જોવા મળ્યા હતા. આ ફિલ્મમાં રજનીકાંતનો ખાસ રોલ હતો અને આ તેમની એકમાત્ર બંગાળી ફિલ્મ પણ છે.
આ પહેલા મિથુન અને રજનીકાંત 1989માં હિન્દી ફિલ્મ ‘ભ્રષ્ટાચાર’માં સાથે જોવા મળ્યા હતા. આ બંને ઉપરાંત, રમેશ સિપ્પી દ્વારા નિર્દેશિત આ ફિલ્મમાં રેખા, અનુપમ ખેર અને રઝા મુરાદ પણ મુખ્ય ભૂમિકામાં જોવા મળ્યા હતા.
આ ફિલ્મમાં રજનીકાંતનો પણ ખાસ રોલ છે. હવે લગભગ 30 વર્ષ પછી, બંને ફરી ‘જેલર 2’માં સાથે જોવા મળશે.
