હવામાન વિભાગે દક્ષિણ ગુજરાતના નવસારી અને વલસાડ જિલ્લામાં ભારે વરસાદની આગાહીને પગલે ઓરેન્જ અલર્ટ જાહેર કર્યું છે. જ્યારે સુરત અને તાપી જિલ્લામાં યલો અલર્ટ આપવામાં આવ્યું છે. ભારે વરસાદને કારણે નીચાણવાળા વિસ્તારોમાં પાણી ભરાવા, નદી-નાળામાં જળસ્તર વધવા અને શહેરી વિસ્તારોમાં પાણી ભરાવાની સ્થિતિ સર્જાઈ શકે છે.
માછીમારોને દરિયો ન ખેડવાની સલાહ
અરબી સમુદ્રમાં ભારે પવન અને ઊંચા મોજાં ઉછળવાની શક્યતાને ધ્યાનમાં રાખીને હવામાન વિભાગે માછીમારોને આગામી ચાર દિવસ સુધી દરિયો ન ખેડવાની સૂચના આપી છે. દરિયાકાંઠાના વિસ્તારોમાં રહેતા લોકોને પણ સાવચેતી રાખવા અને તંત્રની સૂચનાઓનું પાલન કરવાની અપીલ કરવામાં આવી છે.
સૌરાષ્ટ્ર-કચ્છમાં હળવાથી મધ્યમ વરસાદની શક્યતા
દક્ષિણ ગુજરાત સિવાય સૌરાષ્ટ્ર અને કચ્છના વિસ્તારોમાં પણ હળવાથી મધ્યમ વરસાદની આગાહી કરવામાં આવી છે. જ્યારે ઉત્તર અને મધ્ય ગુજરાતમાં સામાન્ય વરસાદી ઝાપટાં પડવાની શક્યતા છે. ખેતી માટે આ વરસાદ લાભદાયી સાબિત થઈ શકે છે, જો, કે ભારે વરસાદની સંભાવના ધરાવતા વિસ્તારોમાં લોકોને સાવચેત રહેવાની સલાહ આપવામાં આવી છે.
અમદાવાદમાં પણ વરસાદી ઝાપટાંની સંભાવના
અમદાવાદ શહેરમાં વાદળછાયું વાતાવરણ રહેવાની સાથે છૂટાછવાયા વરસાદી ઝાપટાં પડવાની શક્યતા છે. વરસાદને કારણે તાપમાનમાં ઘટાડો થવાથી લોકોને ગરમીમાંથી રાહત મળી શકે છે. હવામાન વિભાગે નાગરિકોને વરસાદ દરમિયાન સાવચેતી રાખવા અને સત્તાવાર હવામાન અપડેટ પર નજર રાખવાની સલાહ આપી છે.
Follow Us On Google News
Follow Us On WhatsApp
Follow Us On facebook
Leave a Comment