ભારતીય ટીમ વર્ષ 2027ના ICC વન-ડે વર્લ્ડ કપની લાંબા ગાળાની તૈયારીઓમાં વ્યસ્ત છે અને આવી મહત્વપૂર્ણ ક્ષણે હાર્દિક પંડ્યા જેવા મેચવિનર ઓલરાઉન્ડરની લાંબી ગેરહાજરી ટીમ મેનેજમેન્ટ માટે મોટો ઝટકો સાબિત થઈ રહી છે.
હાર્દિક છેલ્લે મે મહિનામાં IPL દરમિયાન સ્પર્ધાત્મક ક્રિકેટ રમતા નજરે પડ્યા હતા. હાલ તેઓ બેંગલુરુ સ્થિત BCCI સેન્ટર ઓફ એક્સેલન્સ ખાતે સઘન રિહેબિલિટેશન હેઠળ છે. કેપ્ટન શુભમન ગિલે સ્પષ્ટ સંકેત આપ્યા છે કે, રાષ્ટ્રીય ટીમમાં પુનરાગમન કરતાં પહેલાં હાર્દિકે ઘરેલુ ક્રિકેટમાં પોતાની ફિટનેસ અને બોલિંગ ક્ષમતા સાબિત કરવી પડશે.
શુભમન ગિલે કહ્યું- ‘તેમના જેવી કુશળતા દુનિયામાં બહુ ઓછા ખેલાડીઓ પાસે છે’
પ્રથમ વનડે પૂર્વે પ્રેસ કોન્ફરન્સમાં હાર્દિકની અનિવાર્યતા પર ભાર મૂકતાં કેપ્ટન શુભમન ગિલે જણાવ્યું હતું કે, “હાર્દિક પંડ્યા વિશ્વસ્તરીય ઓલરાઉન્ડર છે. ક્રિકેટ જગતમાં ખૂબ ઓછા ખેલાડીઓ પાસે તેમના જેવું સંતુલિત કૌશલ્ય છે. બોલર તરીકે તમે રમત દરમિયાન નવા બોલ અને જૂના બોલ બંનેથી તેમનો અસરકારક ઉપયોગ કરી શકો છો.
આ ઉપરાંત વનડે ટીમમાં નંબર-7 કે 8 પર બેટિંગ કરતી વખતે ડેથ ઓવર્સમાં ઝડપથી રન બનાવવાની તેમની ભૂમિકા અદભુત છે. અમારી તેમની સાથે સતત વાતચીત થઈ રહી છે. કમનસીબે ઇજાઓની બાબતમાં તેમનું નસીબ સાથ નથી આપી રહ્યું. અમને આશા છે કે તેઓ ટૂંક સમયમાં સ્થાનિક ક્રિકેટ રમીને સંપૂર્ણ ફિટનેસ સાથે ભારતીય ટીમમાં વાપસી કરશે.”
ઇજાઓના વિષચક્રએ કેવી રીતે વધારી હાર્દિક પંડ્યાની મુશ્કેલીઓ?
હાર્દિકની ફિટનેસની ગંભીર સમસ્યાઓ IPL દરમિયાન શરૂ થઈ હતી, જ્યારે પીઠના સ્નાયુઓમાં ખેંચાણને કારણે તેમણે મુંબઈ ઇન્ડિયન્સ તરફથી ત્રણ મેચો ગુમાવવી પડી હતી. ટુર્નામેન્ટના અંતિમ તબક્કામાં વાપસી કર્યા બાદ 24 મેના રોજ પોતાનો છેલ્લો મેચ રમીને તેઓ મેદાનથી દૂર થઈ ગયા હતા.
જૂન મહિનામાં રિહેબ દરમિયાન જાંઘના સ્નાયુ ખેંચાઈ જતાં તેઓ અફઘાનિસ્તાન અને ઇંગ્લેન્ડ સામેની શ્રેણીમાંથી બહાર ફેંકાયા હતા. ત્યારબાદ ફિલ્ડિંગ પ્રેક્ટિસ વખતે ઘૂંટણમાં દુખાવો ઉપડ્યો હતો. સપ્ટેમ્બરમાં ઓસ્ટ્રેલિયા ‘A’ સામે કમબેકની આશા હતી,
પરંતુ સ્કેનમાં જમણી પિંડીમાં ઇજા બહાર આવતાં તબીબોએ બે અઠવાડિયાના સંપૂર્ણ આરામની સલાહ આપી હતી. આ સતત ઇજાઓને પગલે તેઓ ન્યૂઝીલેન્ડ સામેની 5 ટી-20 અને 5 વન-ડેની સમગ્ર વ્હાઇટ બોલ સીરીઝ ગુમાવી ચૂક્યા છે.
Follow Us On Google News
Follow Us On WhatsApp
Follow Us On facebook