તહેવારો દરમિયાન મીઠાઈ, બિસ્કિટ અને અન્ય ફૂડ પ્રોસેસિંગ ઉદ્યોગોમાં ખાંડની માંગમાં મોટો વધારો થાય છે. આવી સ્થિતિમાં વેપારીઓ દ્વારા જરૂરિયાત કરતાં વધુ ખાંડનો જથ્થો સંગ્રહિત કરવામાં આવે તો બજારમાં કૃત્રિમ અછત સર્જાઈ શકે છે અને ભાવ વધી શકે છે. આ જ કારણસર સરકારે અગાઉ વેપારીઓ માટે 30 દિવસ સુધીનો સ્ટોક રાખવાની મર્યાદા નક્કી કરી હતી. જોકે, ખાંડના ભાવમાં વધારો ચાલુ રહેતાં હવે આ મર્યાદા ઘટાડીને 15 દિવસ કરવામાં આવી છે. સરકારનો હેતુ તહેવારોની સિઝનમાં બજારમાં ખાંડનો પૂરતો પુરવઠો જાળવી રાખવાનો અને જમાખોરી પર નિયંત્રણ લાવવાનો છે.
એક મહિનામાં ખાંડના ભાવમાં આશરે 10%નો વધારો
રિપોર્ટ્સ અનુસાર, છેલ્લા એક મહિનામાં ખાંડના ભાવમાં આશરે 10 ટકાનો વધારો થયો છે. ઉદ્યોગ સંગઠનના આંકડા મુજબ, તાજેતરમાં દેશમાં ખાંડની સરેરાશ એક્સ-મિલ કિંમત આશરે ₹5,400થી ₹5,500 પ્રતિ ક્વિન્ટલ રહી હતી. એક વર્ષ પહેલાં આ કિંમત લગભગ ₹3,900 પ્રતિ ક્વિન્ટલ હતી. એટલે કે હોલસેલ સ્તરે પણ ખાંડના ભાવમાં નોંધપાત્ર વધારો થયો છે. રિટેલ બજારમાં પણ ભાવ વધ્યા છે. 18 ઓગસ્ટે ખાંડની સરેરાશ રિટેલ કિંમત ₹52.30 પ્રતિ કિલો પહોંચી હતી, જ્યારે ગયા વર્ષે આ જ સમયગાળામાં તે આશરે ₹46.34 પ્રતિ કિલો હતી. એટલે કે વાર્ષિક ધોરણે રિટેલ ભાવમાં લગભગ 13 ટકાનો વધારો નોંધાયો છે.
ઓછા વરસાદથી શેરડીના પાક પર અસરની ચિંતા
ખાંડની નવી સિઝન 1 ઓક્ટોબરથી શરૂ થવાની છે. જોકે, નવી સિઝનની શરૂઆતમાં ઉપલબ્ધ સ્ટોકને લઈને ઉદ્યોગમાં ચિંતા જોવા મળી રહી છે. ઉદ્યોગના અંદાજ મુજબ નવી સિઝનની શરૂઆતમાં આશરે 40થી 42 લાખ ટન ખાંડ ઉપલબ્ધ હોઈ શકે છે, જ્યારે દેશની માસિક સ્થાનિક જરૂરિયાત લગભગ 50 લાખ ટન છે. આ ઉપરાંત કેટલાક શેરડી ઉત્પાદક વિસ્તારોમાં ઓછો વરસાદ અને સૂકું વાતાવરણ રહેવાને કારણે શેરડીના પાક પર અસર થવાની ચિંતા વ્યક્ત કરવામાં આવી છે. જો ઉત્પાદન પર તેની અસર પડે તો આગામી મહિનાઓમાં ખાંડના ભાવ પર પણ દબાણ આવી શકે છે.
2025-26 સિઝનમાં કેટલો ખાંડનો સ્ટોક?
હાલની 2025-26ની સિઝનમાં દેશમાં ખાંડની કુલ ઉપલબ્ધતા આશરે 320 લાખ ટન રહેવાનો અંદાજ છે. તેની સામે સ્થાનિક વપરાશ આશરે 285 લાખ ટન રહેવાની શક્યતા છે. આ ઉપરાંત આશરે 7 લાખ ટન ખાંડની નિકાસ બાદ સિઝનના અંતે લગભગ 35 લાખ ટન સ્ટોક બચી શકે છે.
Follow Us On Google News
Follow Us On WhatsApp
Follow Us On facebook
Leave a Comment