બાળકોને કફ-એલર્જીની દવા આપતા પહેલાં સાવધાન! 4 વર્ષથી નાની ઉંમરના બાળકો માટે આ FDC પર કેન્દ્રનો પ્રતિબંધ

નવા નિયમ મુજબ દવા બનાવતી કંપનીઓએ દરેક પેક, લેબલ, પેકેજ ઇન્સર્ટ અને પ્રમોશનલ સામગ્રી પર સ્પષ્ટપણે ‘4 વર્ષથી નાના બાળકો માટે ઉપયોગ કરવો નહીં’ તેવી વૈધાનિક ચેતવણી છાપવી પડશે. આ નિયમ Chlorpheniramine Maleate અને Phenylephrine Hydrochlorideના કોમ્બિનેશન ધરાવતી તમામ FDC દવાઓ પર લાગુ થશે. તેમાં સિરપ, ડ્રોપ્સ સહિતની વિવિધ દવા બનાવટોનો સમાવેશ થાય છે.

નાના બાળકો માટે કેમ લેવાયો આ નિર્ણય?
આ કોમ્બિનેશન સામાન્ય રીતે નાક બંધ થવું, નાક વહેવું, છીંક, એલર્જી અને ફ્લૂ જેવા લક્ષણોમાં રાહત આપવા માટે ઉપયોગમાં લેવાય છે. જોકે, નિષ્ણાત સમિતિ અને Drugs Technical Advisory Board (DTAB)ની સમીક્ષા બાદ 4 વર્ષથી ઓછી ઉંમરના બાળકોમાં તેના ઉપયોગને લઈને આરોગ્ય સંબંધિત જોખમો સામે આવ્યા હતા. નિષ્ણાતોના મતે નાના બાળકોમાં આ પ્રકારની દવાઓ ગંભીર આડઅસર ઊભી કરી શકે છે. આ વયજૂથ માટે અન્ય પ્રમાણમાં સુરક્ષિત વિકલ્પો ઉપલબ્ધ હોવાથી જોખમી કોમ્બિનેશનના બિનજરૂરી ઉપયોગને રોકવાની જરૂરિયાત વ્યક્ત કરવામાં આવી હતી.

ડ્રગ્સ એન્ડ કોસ્મેટિક્સ એક્ટની કલમ 26A હેઠળ કાર્યવાહી
કેન્દ્ર સરકારે Drugs and Cosmetics Act, 1940ની Section 26A હેઠળ મળેલી સત્તાનો ઉપયોગ કરીને આ નિર્ણય લીધો છે. સત્તાવાર ગેઝેટમાં આદેશ પ્રકાશિત થયા બાદ તે સમગ્ર દેશમાં લાગુ થયો છે. દવા ઉત્પાદકો, ડિસ્ટ્રીબ્યુટર્સ અને રિટેલર્સને નવા નિયમોનું પાલન કરવા સૂચના આપવામાં આવી છે. નિયમોનું ઉલ્લંઘન થવા પર સંબંધિત કાયદા હેઠળ કાર્યવાહી થઈ શકે છે.

Also Read

ઘરમાં ડેન્ગ્યુનો દર્દી છે? ગભરાશો નહીં, આ 5 બાબતોનું ખાસ ધ્યાન રાખો! દિવસના સમયે પણ મચ્છરથી બચો અને પરિવારને ડેન્ગ્યુથી સુરક્ષિત રાખો

માતા-પિતાએ શું ધ્યાન રાખવું?
માતા-પિતાએ ખાસ કરીને 4 વર્ષથી ઓછી ઉંમરના બાળકોને કફ, શરદી કે એલર્જીની દવા પોતાની રીતે આપવાનું ટાળવું જોઈએ. બાળક માટે કોઈ દવા જરૂરી હોય તો તેની ઉંમર અને સ્થિતિ અનુસાર યોગ્ય દવા અંગે ડૉક્ટર અથવા લાયકાત ધરાવતા આરોગ્ય નિષ્ણાતની સલાહ લેવી વધુ સુરક્ષિત છે.

Also Read

ફિલ્મી ચમક છોડીને ખેતરમાં ઉતર્યો આ સુપરસ્ટાર! વરુણ ધવને ખરીદ્યું પોતાનું ખેતર, VIDEOમાં જણાવ્યું ખાસ કારણ