9સુઈગામના રાવળવાસ વિસ્તારમાં રહેતા અશોકભાઈ જીતાભાઈ રાવળની પત્ની છેલ્લા કેટલાક સમયથી રિસામણે હતી. તેથી અશોકભાઈ પોતાના અઢી વર્ષના પુત્ર નવઘણ સાથે રહેતા હતા. ફરિયાદમાં કરાયેલા આક્ષેપ મુજબ, 13 ઓક્ટોબર, 2026ના રોજ બપોરે આશરે એકથી બે વાગ્યાની વચ્ચે અશોકભાઈએ બાળક પર પેટ્રોલ છાંટીને તેને આગ ચાંપી દીધી હતી.
આ ઘટનામાં બાળક ગંભીર રીતે દાઝી ગયું હતું. ત્યારબાદ તેને ખાનગી વાહન મારફતે હોસ્પિટલ લઈ જવામાં આવ્યું હતું, જ્યાં ટૂંકી સારવાર બાદ તેનું મોત થયું હતું.
બાળકના મૃતદેહને સ્મશાનમાં દાટી અંતિમ વિધિ કરી દીધી
બાળકના મોત બાદ પણ મામલો વધુ ગંભીર બન્યો હોવાનો આક્ષેપ છે. ફરિયાદ મુજબ, ઘટનાનું સાચું કારણ બહાર ન આવે તે માટે આરોપીએ અન્ય લોકોની મદદથી બાળકના મૃતદેહને સ્મશાનમાં દાટી અંતિમ વિધિ કરી દીધી હતી.
આ દરમિયાન મુદ્રા વિસ્તારમાં મજૂરીકામ માટે ગયેલા મૃતક બાળકના કાકા બાબુભાઈ લખમણભાઈ રાવળને ઘટનાની જાણ થઈ હતી. જાણ થતાં તેઓ તાત્કાલિક સુઈગામ પહોંચ્યા હતા અને સમગ્ર મામલે વિગતો મેળવવાનો પ્રયાસ કર્યો હતો.
પુરાવાનો નાશ કરવા સહિતના ગંભીર આરોપો હેઠળ ગુનો નોંધ્યો
ત્યારબાદ બાબુભાઈ રાવળે સુઈગામ પોલીસ સ્ટેશનમાં પહોંચીને અશોક રાવળ વિરુદ્ધ ફરિયાદ નોંધાવી હતી. ફરિયાદના આધારે પોલીસે બાળકની હત્યા અને પુરાવાનો નાશ કરવા સહિતના ગંભીર આરોપો હેઠળ ગુનો નોંધ્યો છે.
પોલીસે સમગ્ર ઘટનાની તપાસ શરૂ કરી છે અને બનાવ પાછળનાં કારણો, ઘટનાક્રમ તથા મૃતદેહને દફનાવવાની પરિસ્થિતિ અંગે વધુ તપાસ હાથ ધરી છે. આ કેસમાં આરોપ સામેના આક્ષેપોની તપાસ અને કાયદાકીય પ્રક્રિયા દ્વારા હકીકતો સ્પષ્ટ થશે.
Follow Us On Google News
Follow Us On WhatsApp
Follow Us On facebook