Mau road accident Scorpio trailer collision : ઉત્તર પ્રદેશના દોહરીઘાટ પોલીસ સ્ટેશન વિસ્તાર હેઠળના હાઇવે પર બરસાતપુર અહિરાની ગામ પાસે શુક્રવારે મોડી રાત્રે કાળમુખો અકસ્માત સર્જાયો હતો. પૂરઝડપે જતી એક સ્કોર્પિયો ગાડી સામેથી આવી રહેલા વિશાળ ટ્રેલર ટ્રક સાથે ધડાકાભેર અથડાઈ હતી. આ ટક્કર બાદ ચીસાચીસ અને અફડાતફડી મચી ગઈ હતી. ઘટનાની જાણ થતા જ સ્થાનિક લોકો મદદ માટે દોડી આવ્યા હતા, પરંતુ ટક્કર એટલી ગંભીર હતી કે વાહનમાં સવાર પાંચેય લોકોએ ઘટનાસ્થળે જ દમ તોડી દીધો હતો.
એક હસતો-રમતો પરિવાર વિખેરાઈ ગયો
આ અકસ્માતમાં સૌથી વધુ કરુણતા એ છે કે મૃતકોમાં એક જ પરિવારના ત્રણ સભ્યોનો સમાવેશ થાય છે. અહેવાલો મુજબ, મૃતકોમાં પતિ, પત્ની અને તેમના માસૂમ પુત્રનો સમાવેશ થાય છે. મુસાફરી કરી રહેલો આ પરિવારને ખબર નહોતી કે આ સફર તેમની અંતિમ સફર બની રહેશે. અકસ્માત બાદ ઘટનાસ્થળે લોહીના ખાબોચિયા ભરાઈ ગયા હતા.
પોલીસની કામગીરી અને મૃતદેહોનું પોસ્ટમોર્ટમ
સ્થાનિકોની જાણ બાદ દોહરીઘાટ પોલીસ કાફલો તાત્કાલિક ઘટનાસ્થળે પહોંચી ગયો હતો. ગાડીના પતરા કાપીને ભારે જહેમત બાદ અંદર ફસાયેલા મૃતદેહોને બહાર કાઢવામાં આવ્યા હતા. પોલીસે પંચનામું કરી તમામ પાંચ મૃતદેહોને કબજે લીધા હતા અને પોસ્ટમોર્ટમ માટે જિલ્લા હોસ્પિટલના શબઘરમાં ખસેડ્યા હતા. પોલીસ અત્યારે મૃતકોની ચોક્કસ ઓળખ કરવા અને તેમના પરિવારજનોનો સંપર્ક કરવા માટેની પ્રક્રિયા હાથ ધરી રહી છે.
ઝડપ અને બેદરકારીએ લીધો ભોગ?
પોલીસ અધિકારીઓના જણાવ્યા અનુસાર, અકસ્માતનું ચોક્કસ કારણ જાણવા તપાસ શરૂ કરવામાં આવી છે. પ્રાથમિક દ્રષ્ટિએ એવું લાગે છે કે સ્કોર્પિયોની વધુ પડતી ઝડપ અને બેદરકારીને કારણે આ અકસ્માત સર્જાયો હોઈ શકે છે. જોકે, ટ્રેલર ડ્રાઇવરની ભૂમિકા અને ટેકનિકલ પાસાઓની તપાસ બાદ જ સાચું કારણ સ્પષ્ટ થશે. પોલીસ હાઇવે પરના સીસીટીવી ફૂટેજ પણ તપાસી રહી છે.
Follow Us On Google News
Follow Us On WhatsApp
Follow Us On facebook
Leave a Comment