2 જુલાઈનો દિવસ રાષ્ટ્રીય અને આંતરરાષ્ટ્રીય સ્તરે અત્યંત મહત્વપૂર્ણ ઘટનાઓથી ભરેલો છે. રાજદ્વારી મોરચે ભારત અને જાપાન વચ્ચે વ્યૂહાત્મક બેઠક યોજાવા જઈ રહી છે, તો રમતગમત ક્ષેત્રે ફિફા વર્લ્ડ કપ 2026ના રોમાંચક મુકાબલા શરૂ થઈ રહ્યા છે. આ સાથે ધાર્મિક રીતે અમરનાથ યાત્રાનો પ્રારંભ અને જ્યોતિષીય દ્રષ્ટિએ શનિનું મોટું નક્ષત્ર પરિવર્તન આ દિવસને ખાસ બનાવે છે. ઇતિહાસમાં પણ આ દિવસે અમેરિકાના સિવિલ રાઇટ્સ એક્ટ અને ભારતના ઐતિહાસિક શિમલા કરાર જેવી મોટી ઘટનાઓ નોંધાયેલી છે.
જાપાનના વડાપ્રધાનનો ભારત પ્રવાસ
જાપાનના વડાપ્રધાન ભારતના સત્તાવાર પ્રવાસે આવી રહ્યા છે. 2 જુલાઈના રોજ સવારે 10:00 વાગ્યે રાષ્ટ્રપતિ ભવનમાં તેમનું સ્વાગત કરાશે, ત્યારબાદ 11:30 વાગ્યે હૈદરાબાદ હાઉસમાં વડાપ્રધાન મોદી સાથે મુલાકાત કરશે. બપોરે કરારોની આપ-લે થશે, જેમાં આર્થિક સુરક્ષા, ટેકનોલોજી અને વ્યૂહાત્મક સહયોગ પર મુખ્ય ચર્ચા થશે.
પશ્ચિમ બંગાળમાં UCC લાવવાની તૈયારી
ઉત્તરાખંડ, ગુજરાત અને અસમ બાદ હવે પશ્ચિમ બંગાળમાં પણ યુનિફોર્મ સિવિલ કોડ લાવવાની તૈયારીઓ થઈ રહી છે. ભાજપની શુભેન્દુ સરકાર 2 જુલાઈના રોજ કેબિનેટ બેઠકમાં આ અંગેનો ડ્રાફ્ટ રજૂ કરી શકે છે.
અમરનાથ યાત્રા અને ટ્રાફિક એડવાઇઝરી
2 જુલાઈથી જમ્મુમાં અમરનાથ યાત્રાને લઈને કડક ટ્રાફિક પ્રતિબંધો અને પોલીસ એડવાઇઝરી લાગુ થઈ જશે. તીર્થયાત્રીઓનો પ્રથમ જથ્થો 2 જુલાઈએ જમ્મુના ભગવતી નગર બેઝ કેમ્પથી રવાના થશે, જ્યારે સત્તાવાર યાત્રા 3 જુલાઈથી બાલટાલ અને પહેલગામથી શરૂ થશે.
EPFO ની ઓનલાઈન સેવાઓ પુનઃ શરૂ
26 જૂનથી ચાલી રહેલા સિસ્ટમ અપગ્રેડેશનના કામ બાદ, 2 જુલાઈના રોજથી EPFO ની ઓનલાઈન સેવાઓ ફરી શરૂ થઈ જશે. આ અપગ્રેડ પછી PF સેટલમેન્ટ ઘણું સરળ બનશે અને UPIના માધ્યમથી પણ પૈસા ઉપાડી શકાશે.
TMC ના બાગી જૂથની દિલ્હી કૂચ
પશ્ચિમ બંગાળ વિધાનસભાના વિપક્ષી નેતા રિતબ્રત બેનર્જી 10 ધારાસભ્યો સાથે 2 જુલાઈના રોજ દિલ્હીમાં ચૂંટણી પંચની મુલાકાત લેશે. આ બાગી જૂથ ચૂંટણી પંચ સમક્ષ ટીએમસીના સત્તાવાર પક્ષ પ્રતીક પર પોતાનો દાવો રજૂ કરશે.
દેશના 19 રાજ્યોમાં ભારે વરસાદનું એલર્ટ
હવામાન વિભાગ દ્વારા 2 જુલાઈના રોજ ગુજરાત, ઉત્તર પ્રદેશ, દિલ્હી અને બિહાર સહિત દેશના 19 રાજ્યોમાં ભારે વરસાદ અને વાવાઝોડાનું એલર્ટ જાહેર કરવામાં આવ્યું છે. આ દરમિયાન તીવ્ર ગતિએ પવન ફૂંકાવાની અને વીજળી પડવાની સંભાવના છે.
ફીફા વર્લ્ડ કપ 2026: રાઉન્ડ ઓફ 32 નું શિડ્યુલ
ફિફા વર્લ્ડ કપ 2026 અંતર્ગત 2 જુલાઈએ ‘રાઉન્ડ ઓફ 32’ ના બે મહત્વના મુકાબલા રમાશે. ભારતીય સમયાનુસાર મોડી રાત્રે 01:30 વાગ્યે સિએટલ સ્ટેડિયમમાં બેલ્જિયમ વર્સિસ સેનેગલ અને સવારે 05:30 વાગ્યે સાન ફ્રાન્સિસ્કોમાં યુએસએ વર્સિસ બોસ્નિયા એન્ડ હર્ઝેગોવિના વચ્ચે મેચ યોજાશે.
શનિનું નક્ષત્ર પરિવર્તન અને જ્યોતિષીય અસર
2 જુલાઈ 2026 ના રોજ સવારે 08:22 વાગ્યે શનિ દેવ રેવતી નક્ષત્રના બીજા ચરણમાં પ્રવેશ કરશે. જ્યોતિષીઓના મતે શનિનું આ ગોચર અત્યંત પ્રભાવશાળી રહેશે અને તેના કારણે ચાર ચોક્કસ રાશિના જાતકોએ આગામી સમયમાં મુશ્કેલીઓ અને સમસ્યાઓનો સામનો કરવો પડી શકે છે.
માણાવદરમાં જલારામ મંદિરનો પુનઃ પ્રાણ પ્રતિષ્ઠા મહોત્સવ
માણાવદરની પંચશીલ સોસાયટી સ્થિત શ્રી જલારામ મંદિરમાં 2 થી 5 જુલાઈ દરમિયાન ચાર દિવસીય પુનઃ પ્રાણ પ્રતિષ્ઠા મહોત્સવ યોજાશે. પ્રથમ દિવસે બપોરે ગોરણી અને બ્રહ્મદેવો માટે ભોજન પ્રસાદ તેમજ રાત્રે રાંદલ માતાજીના 18 લોટાની સ્થાપના અને સમૂહરાસનું આયોજન કરવામાં આવ્યું છે.
મેરકોમ ઇન્ડિયા રિન્યુએબલ સમિટ 2026
નવી દિલ્હીમાં દેશના પુનઃપ્રાપ્ય ઊર્જા ક્ષેત્રને નવી ગતિ આપવા અને ભવિષ્યના રોડમેપ અંગે ચર્ચા કરવા માટે આયોજિત બે દિવસીય મહત્વપૂર્ણ સમિટનો 2 જુલાઈના રોજ અંતિમ દિવસ છે.
વિશ્વ ખેલ પત્રકારિતા દિવસ
રમતગમતના પ્રચારમાં સ્પોર્ટ્સ જર્નાલિસ્ટ્સના યોગદાનને બિરદાવવા દર વર્ષે 2 જુલાઈના રોજ આ દિવસ ઉજવાય છે. ઇન્ટરનેશનલ સ્પોર્ટ્સ પ્રેસ એસોસિએશન દ્વારા 1994 માં આ દિવસની સ્થાપના 1924 ના પેરિસ ઓલિમ્પિક્સ દરમિયાન થયેલી સંસ્થાની સ્થાપનાની યાદમાં કરવામાં આવી હતી.
વિશ્વ યુએફઓ દિવસ
લોકોમાં અજ્ઞાત ઉડતી વસ્તુઓ (UFO) અને એલિયન્સના અસ્તિત્વ વિશે જાગૃતિ ફેલાવવા દર વર્ષે 2 જુલાઈના રોજ આ દિવસ મનાવાય છે. 2001 માં યુએફઓ સંશોધક હકાતન અકડોગન દ્વારા આ દિવસની શરૂઆત કરવામાં આવી હતી.
વર્ષનું મધ્યબિંદુ
સામાન્ય વર્ષ દરમિયાન 2 જુલાઈના રોજ આખા વર્ષનો બરાબર મધ્યનો દિવસ ગણાય છે. આ દિવસ દર્શાવે છે કે, વર્ષનો અડધો ભાગ પૂર્ણ થઈ ગયો છે અને હવે વર્ષનો બીજો અડધો ભાગ શરૂ થાય છે.
2 જુલાઈની ઐતિહાસિક ઘટનાઓ
- 1306 – અલાઉદ્દીન ખિલજી દ્વારા સિવાણા કિલ્લા પર હુમલો કરવામાં આવ્યો, જે તે સમયે ચૌહાણ સરદાર શીતલદેવના કબજામાં હતો.
- 1698 – થોમસ સવરી દ્વારા પ્રથમ વરાળ યંત્ર પેટન્ટ કરાવવામાં આવ્યું.
- 1776 – અમેરિકન ક્રાંતિ દરમિયાન કોન્ટિનેંટલ કોંગ્રેસે બ્રિટનથી અલગ થવાનો ઐતિહાસિક પ્રસ્તાવ સ્વીકાર્યો.
- 1850 – બેન્જામિન જે. લેન દ્વારા સ્વનિયંત્રીત ગેસ માસ્કના પેટન્ટ અધિકારો મેળવવામાં આવ્યા.
- 1878 – અમદાવાદની પ્રથમ રથયાત્રા: અષાઢી બીજના પવિત્ર દિવસે મહંત શ્રી સારંગદાસજી મહારાજની પ્રેરણાથી જગન્નાથ મંદિરથી રથયાત્રાની શરૂઆત થઈ.
- 1890 – યુએસ કોંગ્રેસે વ્યાપારિક એકાધિકાર વિરોધી શેરમન એન્ટિટ્રસ્ટ એક્ટ પસાર કર્યો.
- 1897 – ઇટાલિયન વૈજ્ઞાનિક ગુગ્લિએલ્મો માર્કોનીએ લંડનમાં રેડિયો (Radio)ના પેટન્ટ હક્કો મેળવ્યા.
- 1940 – બ્રિટિશ સરકાર દ્વારા ભારતીય સ્વાતંત્ર્ય સેનાની સુભાષચંદ્ર બોઝની કલકત્તામાં બળવાને ઉશ્કેરવાના આરોપસર ધરપકડ કરાઈ.
- 1962 – વિશ્વની સૌથી મોટી રીટેલ ચેન Walmart એ અમેરિકાના અરકાનસાસમાં પોતાનો સૌથી પહેલો સ્ટોર શરૂ કર્યો.
- 1964 – અમેરિકાના રાષ્ટ્રપતિ લિંડન બી. જોહ્ન્સને ‘સિવિલ રાઇટ્સ એક્ટ’ પર હસ્તાક્ષર કરી જાતિભેદ આધારિત અસમાનતાનો અંત આણ્યો.
- 1972 – ભારત અને પાકિસ્તાન વચ્ચે ઐતિહાસિક ‘શિમલા કરાર’ પર હસ્તાક્ષર કરવામાં આવ્યા.
- 1985 – આન્દ્રે ગ્રોમીકો સોવિયેત સંઘના નવા પ્રમુખ તરીકે ચૂંટાયા.
- 1990 – મક્કાની એક પેડેસ્ટ્રિયન ટનલમાં કરુણ નાસભાગ થતાં 1400 થી વધુ યાત્રાળુઓના શ્વાસ રૂંધાવાથી મોત થયા.
- 2001 – તબીબી ક્ષેત્રે ક્રાંતિ સર્જતા વિશ્વમાં પ્રથમ વખત કૃત્રિમ હૃદયનું પ્રત્યારોપણ કરવામાં આવ્યું.
- 2002 – સ્ટીવ ફોસેટ બલૂનમાં કોઈની પણ મદદ વિના વિશ્વભરમાં એકલા ઉડાન ભરનાર પ્રથમ વ્યક્તિ બન્યા.
- 2004 – ભારત અને પાકિસ્તાનના વિદેશ મંત્રીઓ વચ્ચે જકાર્તામાં દ્વિપક્ષીય મંત્રણા યોજાઈ.
- 2006 – ઈંગ્લેન્ડ ફૂટબોલ ટીમના પ્રખ્યાત કેપ્ટન ડેવિડ બેકહામે પોતાના કેપ્ટન પદ પરથી રાજીનામું આપ્યું.
- 2015 – વૈજ્ઞાનિકોએ પૃથ્વીના ઇતિહાસમાં સૌથી મોટું ઓઝોન સ્તરનું છિદ્ર અન્ટાર્કટિકા પર હોવાની સત્તાવાર પુષ્ટિ કરી.
- 2020 – ભારતીય રેલ્વેએ 4 એન્જિનોની મદદથી 2.8 કિલોમીટર લાંબી દેશની સૌથી લાંબી ગુડ્સ ટ્રેન ‘શેષનાગ’ ચલાવી ઇતિહાસ રચ્યો.
2 જુલાઈએ જન્મેલી પ્રખ્યાત વ્યક્તિઓ
- 1877 – હર્મન હેસે – જર્મન-સ્વિસ મૂળના જગવિખ્યાત નવલકથાકાર અને કવિ, જેમને ૧૯૪૬માં સાહિત્યનું નોબેલ પ્રાઈઝ મળ્યું હતું.
- 1893 – ચંદુલાલ માધવલાલ ત્રિવેદી – પ્રખર વહીવટકર્તા અને આંધ્ર પ્રદેશના પ્રથમ રાજ્યપાલ.
- 1901 – કાલિંદી ચરણ પાણિગ્રહી – પ્રખ્યાત ઉડિયા કવિ, નવલકથાકાર અને નાટ્યકાર.
- 1925 – સ્વામી રામ – ભારતના પ્રખ્યાત યોગાચાર્ય.
- 1925 – પેટ્રિસ લુમુમ્બા – કોંગો દેશના મહાન સ્વાતંત્ર્ય સેનાની અને દેશના પ્રથમ વડાપ્રધાન.
- 1941 – આશલતા વાબગાંવકર – મરાઠી અને હિન્દી ફિલ્મોની જાણીતી અભિનેત્રી.
- 1945 – વિદ્યા વિંદુ સિંહ – લોક સાહિત્ય ક્ષેત્રના જાણીતા લેખિકા.
- 1948 – આલોક ધનવા – હિન્દી સાહિત્યના પ્રખ્યાત જનકવિ.
- 1948 – આલોક નાથ – ભારતીય સિનેમા અને ટીવીના જાણીતા પીઢ અભિનેતા (સંસ્કારી પિતાના પાત્ર માટે પ્રખ્યાત).
- 1954 – મોહમ્મદ અઝીઝ – બોલિવૂડના પ્રખ્યાત અને લોકપ્રિય પ્લેબેક સિંગર.
- 1956 – તુફાની સરોજ – ઉત્તર પ્રદેશના રાજનેતા અને તેરમી તેમજ પંદરમી લોકસભાના સભ્ય.
- 1956 – ગૌતમ ચેટર્જી – પશ્ચિમ બંગાળના પ્રખ્યાત સંગીતકાર અને જાણીતા રોક બેન્ડ ‘મોહીનર ઘોરાગુલિ’ના સ્થાપક.
- 1962 – મુક્તાબેન ડગલી – ગુજરાતના જાણીતા સામાજિક કાર્યકર, જેમને અંધ અને વિકલાંગોની સેવા બદલ ૨૦૧૯માં ‘પદ્મશ્રી’ એવોર્ડ મળ્યો હતો.
- 1983 – સુહાસ એલ.વાય. – ભારતના પ્રખ્યાત પેરા બેડમિન્ટન ખેલાડી અને આઈએએસ અધિકારી.
- 1984 – યુસુફ પઠાણ – ભારતીય ક્રિકેટ ટીમના પૂર્વ ઓલરાઉન્ડર ખેલાડી અને વર્તમાન રાજકારણી.
2 જુલાઈએ પ્રખ્યાત વ્યક્તિઓની પુણ્યતિથિ
- 1934 – અસિત ભટ્ટાચાર્ય – ભારતીય સ્વતંત્રતા સંગ્રામના મહાન ક્રાંતિકારી.
- 1950 – યુસુફ મહેરઅલી – અગ્રણી સ્વતંત્રતા સેનાની અને જાણીતા સમાજ સુધારક.
- 1961 – અર્નેસ્ટ હેમિંગ્વે – અમેરિકાના જગવિખ્યાત નવલકથાકાર, ટૂંકી વાર્તા લેખક અને પત્રકાર.
- 1985 – લક્ષ્મણ માધવ કાત્રે – ભારતીય વાયુસેનાના એર ચીફ માર્શલ, જેમનું દિલ્હીમાં અવસાન થયું હતું.
- 1999 – કેપ્ટન મનોજ કુમાર પાંડે – કારગિલ યુદ્ધના વીર શહીદ, જેમને મરણોત્તર ભારતનો સર્વોચ્ચ સૈન્ય પુરસ્કાર ‘પરમવીર ચક્ર’ એનાયત કરાયો હતો.
આ પણ વાંચો – Gujarat Rain Update: ગુજરાતમાં સાયક્લોનિક સર્ક્યુલેશન સક્રિય થતાં ધોધમાર વરસાદ, જાણો કયા કેટલો વરસાદ?
Follow Us On Google News
Follow Us On WhatsApp
Follow Us On facebook
Leave a Comment