IPL 2026માં સોમવારે સનરાઇઝર્સ હૈદરાબાદ અને રાજસ્થાન રોયલ્સ વચ્ચે મેચ રમાઈ હતી. આ મેચમાં સૌની નજર 15 વર્ષના વૈભવ સૂર્યવંશી પર હતી, પરંતુ આ વખતે પરિણામ એકદમ ઊંધું આવ્યું. શાનદાર ફોર્મમાં ચાલી રહેલા વૈભવે હૈદરાબાદ સામેની મેચમાં પહેલી જ બોલ પર આઉટ થઈને ગોલ્ડન ડકનો સામનો કર્યો.
આ પહેલાં સૂર્યવંશીએ આ સિઝનમાં 52, 31, 39 અને 78 જેવી જોરદાર ઇનિંગ્સ રમી હતી, પરંતુ આ મેચમાં તેમનું ખાતું પણ ખુલ્યું નહીં. આ તેમના IPL કરિયરનો પહેલો ગોલ્ડન ડક રહ્યો. આ પહેલાં તેઓ 2025માં એક વાર શૂન્ય પર આઉટ થયા હતા, પરંતુ ત્યારે તેમણે બે બોલ રમ્યા હતા.
પ્રફુલે મચાવી સનસનાટી
વૈભવની વિકેટ IPLમાં ડેબ્યુ કરી રહેલા પ્રફુલ હિંગેએ લીધી. પ્રફુલે તે કામ કર્યું જે આ સિઝનમાં જસપ્રીત બુમરાહ, ભુવનેશ્વર જેવા અનેક દિગ્ગજો પણ કરી ન શક્યા હતા. પ્રફુલે પોતાના ઓવરની બીજી જ બોલ પર વૈભવની વિકેટ લીધી.
પછી એ જ ઓવરમાં તેમણે ધ્રુવ જુરેલ અને પ્રોટેરિયસને પણ પેવેલિયન મોકલી દીધા. પ્રફુલ IPL ઇતિહાસના પહેલા એવા બોલર બની ગયા છે, જેમણે ઇનિંગના પહેલા જ ઓવરમાં ત્રણ વિકેટ લીધી હોય.
ઈશાન કિશનનો તોફાની દેખાવ
બીજી તરફ, ઈશાન કિશને કેપ્ટન્સી ઈનિંગ રમતાં 44 બોલમાં 91 રન બનાવી દીધા. તેમની ઇનિંગમાં 8 ચોગ્ગા અને 6 છગ્ગા સામેલ હતા. કિશને હેનરિક ક્લાસેન (40 રન) સાથે 88 રનની મહત્વપૂર્ણ ભાગીદારી કરી અને ટીમને મજબૂત સ્થિતિમાં પહોંચાડી. તેમની આ ઇનિંગના દમ પર હૈદરાબાદે 216 રન બનાવ્યા.
આ મેચની વાત કરીએ તો હૈદરાબાદના 217 રનના જવાબમાં રાજસ્થાનની ટીમ માત્ર 159 રન પર જ સમેટાઈ ગઈ. હૈદરાબાદના બે બોલર પ્રફુલ અને સાકિબ હુસૈને મળીને કુલ 8 વિકેટ લીધી. બંને આ મેચમાં પોતાનું ડેબ્યુ કરી રહ્યા હતા અને બંનેએ 4-4 વિકેટ ઝડપી.
Follow Us On Google News
Follow Us On WhatsApp
Follow Us On facebook
Leave a Comment