Gujarat Rain Update : ગુજરાતમાં મેઘરાજા હવે વિરામના મૂડમાં! સિઝનનો 68% વરસાદ પૂર્ણ, આગામી 6 દિવસ હળવી આગાહી

ગુજરાતમાં ચોમાસાએ અત્યાર સુધી જોરદાર બેટિંગ કરી છે અને રાજ્યમાં સિઝનનો સરેરાશ 68.58 ટકા વરસાદ નોંધાયો છે. ખાસ કરીને સૌરાષ્ટ્ર અને દક્ષિણ ગુજરાતમાં ભારે વરસાદ બાદ હવે મેઘરાજા થોડો વિરામ લેવાના મૂડમાં હોવાનું હવામાન વિભાગના અનુમાન પરથી જણાઈ રહ્યું છે. ભારતીય હવામાન વિભાગ (IMD) અનુસાર આગામી 6 દિવસ રાજ્યના મોટાભાગના વિસ્તારોમાં હળવાથી મધ્યમ વરસાદ વરસવાની શક્યતા છે.

13 જિલ્લાઓમાં યલો એલર્ટ જાહેર
હવામાન વિભાગે 2 ઓગસ્ટ માટે રાજ્યના 13 જિલ્લાઓમાં યલો એલર્ટ જાહેર કર્યું છે. જેમાં કચ્છ, મોરબી, સુરેન્દ્રનગર, રાજકોટ, જામનગર, દેવભૂમિ દ્વારકા, પોરબંદર, પાટણ, વાવ-થરાદ, બનાસકાંઠા, સાબરકાંઠા, અરવલ્લી અને મહેસાણા જિલ્લાઓમાં ગાજવીજ સાથે ભારે વરસાદની શક્યતા વ્યક્ત કરવામાં આવી છે.

3થી 8 ઓગસ્ટ સુધી કેવી રહેશે સ્થિતિ?
IMDના અનુમાન મુજબ 3 ઓગસ્ટથી 8 ઓગસ્ટ દરમિયાન રાજ્યના મોટાભાગના વિસ્તારોમાં વરસાદનું જોર ઘટશે. આ સમયગાળા દરમિયાન સામાન્ય રીતે હળવાથી મધ્યમ વરસાદની આગાહી કરવામાં આવી છે. ભારે વરસાદની શક્યતા ખૂબ મર્યાદિત રહેશે.

Also Read

Gyan Sahayak Bharti 2026 : ગુજરાતમાં 9,700 જ્ઞાન સહાયકોની ભરતી! પ્રાથમિક સ્કૂલોમાં અંગ્રેજી શિક્ષકોની મોટી તક

રાજ્યના 34 ડેમ હાઈ એલર્ટ પર
સતત વરસાદને કારણે રાજ્યના જળાશયોમાં પાણીની આવક યથાવત રહી છે. હાલમાં રાજ્યના 34 ડેમ હાઈ એલર્ટ પર છે. ઉપરાંત 8 ડેમ એલર્ટ પર જ્યારે 10 ડેમ માટે વોર્નિંગ જાહેર કરવામાં આવી છે. જળાશયોની સ્થિતિને ધ્યાનમાં રાખીને તંત્ર સતત મોનિટરિંગ કરી રહ્યું છે.

Also Read

Bihar Train Fire Incident : “મેં ફોન કર્યો તો રેલવેએ વીડિયો માગ્યો…”, બિહારમાં સિમરી ભક્તિયારપુર સ્ટેશન પર મેમુ ટ્રેન સળગી, મુસાફરો જીવ બચાવવા કૂદ્યા

બે મહિનામાં હજારો લોકોનું સ્થળાંતર અને રેસ્ક્યૂ
ચોમાસાની અસરને કારણે છેલ્લા બે મહિનામાં રાજ્યમાં મોટા પાયે બચાવ કામગીરી હાથ ધરવામાં આવી છે. સત્તાવાર માહિતી મુજબ અત્યાર સુધીમાં 83,932 લોકોનું સલામત સ્થળાંતર કરવામાં આવ્યું છે, જ્યારે 9,776 લોકોને રેસ્ક્યૂ કરવામાં આવ્યા છે.

488 રસ્તાઓ હજુ પણ પ્રભાવિત
ભારે વરસાદના કારણે રાજ્યમાં પરિવહન વ્યવસ્થાને પણ અસર પહોંચી છે. હાલમાં 3 નેશનલ હાઈવે, 26 સ્ટેટ હાઈવે સહિત કુલ 488 રસ્તાઓ પર વાહનવ્યવહાર બંધ અથવા પ્રભાવિત હોવાનું તંત્રએ જણાવ્યું છે. હવામાન વિભાગે લોકોને નદી-નાળાઓ અને નીચાણવાળા વિસ્તારોમાં સાવચેતી રાખવા તેમજ સ્થાનિક તંત્રની સૂચનાઓનું પાલન કરવાની અપીલ કરી છે.